യു.പി.ഐ. ഇടപാടിന് ഫീസ്: കേന്ദ്രത്തോടും ആർ.ബി.ഐ.യോടും സുപ്രീംകോടതി വിശദീകരണം തേടി; സ്റ്റേ അനുവദിച്ചില്ല

ന്യൂഡൽഹി: രണ്ടായിരം രൂപയ്ക്ക് മുകളിലുള്ള യു.പി.ഐ. ഇടപാടുകൾക്ക് വ്യാപാരികളിൽനിന്ന് ഫീസ് (എം.ഡി.ആർ) ഈടാക്കാനുള്ള തീരുമാനത്തിൽ സുപ്രീംകോടതി കേന്ദ്രസർക്കാരിനോടും റിസർവ് ബാങ്കിനോടും എൻ.പി.സി.ഐ.യോടും വിശദീകരണം തേടി. ഏത് നിയമത്തിന്റെ അടിസ്ഥാനത്തിലാണ് ഫീസ് ഈടാക്കുന്നതെന്നും ഈ വരുമാനം ആർക്കാണ് ലഭിക്കുന്നതെന്നും വ്യക്തമാക്കണമെന്ന് കോടതി ആവശ്യപ്പെട്ടു. എന്നാൽ ഈ ഉത്തരവ് സ്റ്റേ ചെയ്യാൻ കോടതി വിസമ്മതിച്ചു.

​സെപ്റ്റംബർ 15-നാണ് രണ്ടായിരം രൂപയ്ക്ക് മുകളിലുള്ള യു.പി.ഐ. ഇടപാടുകൾക്ക് വ്യാപാരികളിൽനിന്ന് എം.ഡി.ആർ. ഈടാക്കുമെന്ന് കേന്ദ്രസർക്കാർ പ്രഖ്യാപിച്ചത്. ഈ തീരുമാനം ഭരണഘടനാ വിരുദ്ധമാണെന്നും റദ്ദാക്കണമെന്നും ആവശ്യപ്പെട്ട് അഭിഭാഷകനായ അഞ്ജൻ ദത്ത സമർപ്പിച്ച പൊതുതാൽപ്പര്യ ഹർജിയിലാണ് സുപ്രീംകോടതി നടപടി. വിശദമായ സത്യവാങ്മൂലം സമർപ്പിക്കാൻ നിർദേശിച്ച കോടതി, അത് ലഭിച്ചശേഷം ഹർജി വീണ്ടും പരിഗണിക്കുമെന്ന് വ്യക്തമാക്കി.