ISRO വീണ്ടും വിജയവഴിയിൽ; ജിഎസ്എൽവി എഫ്-17 വിജയകരമായി വിക്ഷേപിച്ചു

ന്യൂഡൽഹി : ഇന്ത്യയുടെ അത്യാധുനിക ഭൗമ നിരീക്ഷണ ഉപഗ്രഹമായ ഇഒഎസ്-05 വഹിച്ചുകൊണ്ടുള്ള ജിഎസ്എൽവി എഫ്-17 റോക്കറ്റ് ശ്രീഹരിക്കോട്ടയിൽ നിന്ന് വിജയകരമായി വിക്ഷേപിച്ചു. ജിഎസ്എൽവിയുടെ പത്തൊമ്പതാം ദൗത്യമാണിത്. എട്ട് മാസത്തെ ഇടവേളയ്ക്ക് ശേഷം ഐഎസ്ആർഒ വീണ്ടും വിജയവഴിയിൽ തിരിച്ചെത്തിയെന്ന പ്രത്യേകതയും ഈ ദൗത്യത്തിനുണ്ട്. പുലർച്ചെ 2.55-നായിരുന്നു വിക്ഷേപണം.

​കഴിഞ്ഞ ജനുവരിയിൽ നടന്ന പിഎസ്എൽവി സി-62 ദൗത്യത്തിന്റെ പരാജയത്തിന് ശേഷമുള്ള ഐഎസ്ആർഒയുടെ ആദ്യ വിക്ഷേപണമാണിത്. ഇരുപത്തിയേഴര മണിക്കൂർ നീണ്ട കൗണ്ട് ഡൗണിനൊടുവിലായിരുന്നു റോക്കറ്റ് കുതിച്ചുയർന്നത്. രാജ്യസുരക്ഷയ്ക്കും ദുരന്തനിവാരണത്തിനും ഒരുപോലെ പ്രയോജനപ്പെടുന്ന 'ജിയോ ഇമേജിംഗ് സാറ്റലൈറ്റ് വൺ എ' (ഇഒഎസ്-05) ഭൂസ്ഥിര പരിക്രമണപഥത്തിൽ നിന്ന് ഇന്ത്യൻ ഉപഭൂഖണ്ഡത്തെ മുഴുവൻ സമയവും നിരീക്ഷിക്കും. 2021 ഓഗസ്റ്റിൽ നടന്ന ജിഎസ്എൽവി എഫ്-10 ദൗത്യം പരാജയപ്പെട്ടതിനെ തുടർന്ന് അതിന് പകരമായി നിർമ്മിച്ചതാണ് ഈ പുതിയ ഉപഗ്രഹം.

​2367 കിലോഗ്രാം ഭാരമുള്ള ഉപഗ്രഹം റോക്കറ്റിൽ നിന്ന് വേർപെട്ട ശേഷം സ്വന്തം പ്രൊപ്പൽഷൻ സംവിധാനം ഉപയോഗിച്ചാണ് നിശ്ചിത ഭ്രമണപഥത്തിലേക്ക് എത്തുക. വിക്ഷേപണത്തിന് റോക്കറ്റ് മുൻപേ സജ്ജമായിരുന്നെങ്കിലും പിഎസ്എൽവി പരാജയത്തെ തുടർന്ന് പരിശോധനകൾക്കായാണ് ദൗത്യം വൈകിയത്. ഈ ദൗത്യം വിജയകരമായതോടെ ആദ്യ ആളില്ലാ ഗഗൻയാൻ ദൗത്യം ഈ വർഷം തന്നെ നടക്കുമെന്ന് ഐഎസ്ആർഒ ചെയർമാൻ വി. നാരായണൻ വ്യക്തമാക്കി. മാർച്ചിന് മുമ്പ് ആറ് വിക്ഷേപണങ്ങൾ കൂടി നടത്താൻ പദ്ധതിയുണ്ടെന്നും അദ്ദേഹം അറിയിച്ചു.