നേപ്പാളിലെ മിന്നൽ പ്രളയം: ഇന്ത്യയുടെ അതിർത്തി ജില്ലകളിൽ അതീവ ജാഗ്രത; അധിക NDRF സംഘങ്ങൾ സജ്ജം

ന്യൂഡൽഹി: നേപ്പാളിലെ മിന്നൽ പ്രളയത്തെ തുടർന്ന് ഇന്ത്യയുടെ അതിർത്തി ജില്ലകളിൽ അതീവ ജാഗ്രതാ നിർദേശം നൽകി. സാഹചര്യം വിലയിരുത്താൻ കേന്ദ്ര ആഭ്യന്തരമന്ത്രി അമിത് ഷാ ബിഹാർ, ഉത്തർപ്രദേശ് മുഖ്യമന്ത്രിമാരുമായി സംസാരിക്കുകയും അതിർത്തി ജില്ലകൾക്ക് ആവശ്യമായ എല്ലാ സഹായങ്ങളും വാഗ്ദാനം ചെയ്യുകയും ചെയ്തു. അടിയന്തര സാഹചര്യം നേരിടാൻ അധിക ദേശീയ ദുരന്ത പ്രതികരണ സേന (NDRF) സംഘങ്ങളെ വിന്യസിക്കുമെന്ന് അമിത് ഷാ വ്യക്തമാക്കി. പ്രതിസന്ധി ഘട്ടത്തിൽ നേപ്പാളിനൊപ്പം ഇന്ത്യയുണ്ടാകുമെന്നും അദ്ദേഹം എക്‌സിൽ കുറിച്ചു.

​നേപ്പാൾ-ചൈന അതിർത്തി മേഖലയിലുണ്ടായ പ്രളയത്തെ തുടർന്ന് ഫുർകെ ഖോലയ്ക്ക് സമീപമുള്ള ത്രിശൂലി നദിയിൽ ജലനിരപ്പ് ഉയർന്നതായി എൻ.ഡി.ആർ.എഫ് അറിയിച്ചിട്ടുണ്ട്. ഈ പ്രളയജലം താഴേക്ക് ഒഴുകി ഗണ്ഡക് നദിയിലേക്ക് എത്താൻ സാധ്യതയുള്ളതിനാലാണ് അതിർത്തിയോട് ചേർന്നുള്ള ബിഹാർ, യു.പി. ജില്ലകളിൽ ജാഗ്രത ശക്തമാക്കിയത്. നിലവിൽ കേന്ദ്ര ആഭ്യന്തര, വിദേശകാര്യ, ജല, പ്രതിരോധ മന്ത്രാലയങ്ങൾ സ്ഥിതിഗതികൾ നിരീക്ഷിച്ചു വരികയാണ്. നേപ്പാളിലെ ജലസംഭരണികളിൽ നിലവിൽ ജലനിരപ്പ് കുറയുന്നുണ്ടെന്നും പരിഭ്രാന്തിപ്പെടേണ്ട സാഹചര്യമില്ലെന്നും കേന്ദ്ര ജല കമ്മീഷൻ വ്യക്തമാക്കിയിട്ടുണ്ട്.