വീഴ്ച വരുത്തിയവർക്കെതിരെ കർശന നടപടിയുണ്ടാകും; യു.ജി.സി. നെറ്റ് പരീക്ഷാ വിവാദത്തിൽ പ്രതികരണവുമായി എൻ.ടി.എ.

ന്യൂഡൽഹി: യു.ജി.സി. നെറ്റ് പരീക്ഷയിലെ പിഴവുകളുമായി ബന്ധപ്പെട്ട് കുറ്റക്കാരായവർക്കെതിരെ കർശന നടപടിയുണ്ടാകുമെന്ന് നാഷണൽ ടെസ്റ്റിംഗ് ഏജൻസി (എൻ.ടി.എ.) അറിയിച്ചു. കഴിഞ്ഞ പരീക്ഷയിലുണ്ടായ വീഴ്ചകൾ ആവർത്തിക്കാതിരിക്കാൻ പരീക്ഷാ നടത്തിപ്പ് കൂടുതൽ സുതാര്യവും കുറ്റമറ്റതുമാക്കുമെന്നും വിദ്യാർത്ഥികളുടെ താല്പര്യം മുൻനിർത്തി ആവശ്യമായ മാറ്റങ്ങൾ നടപ്പിലാക്കുമെന്നും എൻ.ടി.എ. വൃത്തങ്ങൾ വ്യക്തമാക്കി.

​പരീക്ഷാ നടത്തിപ്പിലെ വീഴ്ചകളെ തുടർന്ന് കേന്ദ്ര വിദ്യാഭ്യാസ മന്ത്രി എൻ.ടി.എ. അധികൃതരുമായി ഉയർന്നതല യോഗം ചേരുകയും പ്രോട്ടോക്കോളുകൾ കർശനമായി പാലിക്കാൻ നിർദ്ദേശം നൽകുകയും ചെയ്തു. പരീക്ഷാ നടപടികൾ പൂർണ്ണമായും സമഗ്രമായ ഓഡിറ്റിന് വിധേയമാക്കണമെന്നും തിരുത്തൽ നടപടികൾ വ്യക്തമാക്കുന്ന റിപ്പോർട്ട് സമർപ്പിക്കണമെന്നും മന്ത്രി ആവശ്യപ്പെട്ടിട്ടുണ്ട്.

​ചോദ്യപേപ്പറുകളിലെ ഗുരുതര പിഴവുകൾ കാരണം ഇംഗ്ലീഷ്, കൊമേഴ്സ്, സോഷ്യോളജി എന്നീ മൂന്ന് വിഷയങ്ങളിൽ പുനഃപരീക്ഷ നടത്താൻ എൻ.ടി.എ. നേരത്തെ തീരുമാനിച്ചിരുന്നു. സെപ്റ്റംബർ 9, 10 തീയതികളിലാണ് ഈ പരീക്ഷകൾ നടക്കുന്നത്. സെപ്റ്റംബർ 9-ന് രാവിലെ 9 മുതൽ 12 വരെ ഇംഗ്ലീഷ് പരീക്ഷയും ഉച്ചയ്ക്ക് 3 മുതൽ 6 വരെ കൊമേഴ്സ് പരീക്ഷയും നടക്കും. സെപ്റ്റംബർ 10-ന് രാവിലെ 9 മുതൽ 12 വരെയാണ് സോഷ്യോളജി പരീക്ഷ ക്രമീകരിച്ചിരിക്കുന്നത്. ഉദ്യോഗാർത്ഥികളിൽ നിന്ന് വ്യാപകമായ പരാതി ഉയർന്ന പശ്ചാത്തലത്തിലാണ് വിപുലമായ ഈ നടപടികൾ.