ഇന്ത്യയിൽ തൊഴിലില്ലായ്മ നിരക്ക് ഉയരുന്നു: ഛത്തീസ്ഗഢും ജമ്മു കശ്മീറും മുന്നിൽ, കേരളം മൂന്നാം സ്ഥാനത്ത്

ന്യൂഡൽഹി: രാജ്യത്തെ തൊഴിലില്ലായ്മ നിരക്ക് കഴിഞ്ഞ പാദത്തിലെ 5 ശതമാനത്തിൽ നിന്ന് ഏപ്രിൽ-ജൂൺ കാലയളവിൽ 5.4 ശതമാനമായി ഉയർന്നതായി കേന്ദ്ര സ്ഥിതിവിവരക്കണക്ക് മന്ത്രാലയത്തിന്റെ പീരിയഡിക് ലേബർ ഫോഴ്സ് സർവേ (PLFS) കണക്കുകൾ വ്യക്തമാക്കുന്നു. പ്രധാനമായും ഗ്രാമീണ മേഖലയിലെ തൊഴിലില്ലായ്മ വർധിച്ചതാണ് ഈ വർധനവിന് കാരണം. ഗ്രാമീണ മേഖലയിൽ മുൻ പാദത്തിലെ 4.3 ശതമാനത്തിൽ നിന്ന് 4.8 ശതമാനമായും നഗരങ്ങളിൽ 6.6 ശതമാനത്തിൽ നിന്ന് 6.7 ശതമാനമായും നിരക്ക് ഉയർന്നു.

​സ്ത്രീകളിലെ തൊഴിലില്ലായ്മ നിരക്ക് 5.3 ശതമാനത്തിൽ നിന്ന് 5.7 ശതമാനമായും പുരുഷന്മാരിലേത് 4.8-ൽ നിന്ന് 5.3 ശതമാനമായും വർധിച്ചു. സംസ്ഥാനങ്ങളുടെ കണക്കെടുപ്പിൽ 12.8 ശതമാനം തൊഴിലില്ലായ്മ നിരക്കുള്ള ഛത്തീസ്ഗഢാണ് പട്ടികയിൽ ഒന്നാമത്. ജമ്മു കശ്മീർ (9.1%), കേരളം (8.9%), പഞ്ചാബ് (8.5%), ആന്ധ്രപ്രദേശ് (7.4%) എന്നിവയാണ് തുടർന്നുളള സ്ഥാനങ്ങളിൽ.

​യുവാക്കളുടെ (15-29 വയസ്സ്) തൊഴിലില്ലായ്മ നിരക്ക് 15 ശതമാനത്തിൽ നിന്ന് 15.9 ശതമാനമായി ഉയർന്നു. യുവതികളിലെ തൊഴിലില്ലായ്മ 17.7 ശതമാനത്തിൽ നിന്ന് 19.6 ശതമാനമായി കുത്തനെ വർധിച്ചതാണ് യുവാക്കളുടെ ആകെ കണക്കിനെ ബാധിച്ചത്. സർവേയ്ക്ക് തൊട്ടുമുമ്പുള്ള ഏഴ് ദിവസത്തെ തൊഴിൽ സ്ഥിതി (Current Weekly Status) അടിസ്ഥാനമാക്കിയാണ് കണക്കുകൾ തയ്യാറാക്കിയത്.