വ്യാപ്തിയേറി സി.ജെ.പി പ്രക്ഷോഭം; ഡൽഹിയിൽ വൻ പ്രതിഷേധം, 16 മെട്രോ സ്റ്റേഷനുകൾ അടച്ചുപൂട്ടി

ന്യൂ ഡൽഹി: രാജ്യതലസ്ഥാനത്തെ നിശ്ചലമാക്കി സമീപകാലത്ത് രാജ്യം കണ്ടിട്ടില്ലാത്ത വിധത്തിലുള്ള അതിശക്തമായ സി.ജെ.പി പ്രക്ഷോഭം തുടരുന്നു. ആയിരക്കണക്കിന് പ്രതിഷേധക്കാർ ഒഴുക്കോടെ എത്തുന്ന പശ്ചാത്തലത്തിൽ സുരക്ഷാ മുൻകരുതലിന്റെ ഭാഗമായി നഗരത്തിലെ പ്രധാനപ്പെട്ട 16 മെട്രോ സ്റ്റേഷനുകൾ താൽക്കാലികമായി അടച്ചുപൂട്ടി. രാജീവ് ചൗക്ക്, ലോക് കല്യാൺ മാർഗ്, ഐ.ടി.ഒ, സെൻട്രൽ സെക്രട്ടറിയേറ്റ് തുടങ്ങിയ പ്രധാന സ്റ്റേഷനുകളിലാണ് നിയന്ത്രണം ഏർപ്പെടുത്തിയത്. മെട്രോയ്ക്ക് അകത്ത് പ്രതിഷേധക്കാർ കൂട്ടത്തോടെ മുദ്രാവാക്യം വിളിച്ചത് സുരക്ഷാ ഉദ്യോഗസ്ഥർക്ക് വലിയ വെല്ലുവിളിയായെങ്കിലും, വൈകുന്നേരത്തോടെ മെട്രോ സർവീസുകൾ പുനഃസ്ഥാപിച്ച് സാധാരണ നിലയിലാക്കാൻ അധികൃതർക്ക് കഴിഞ്ഞിട്ടുണ്ട്.

​സ്ഥിതിഗതികൾ നിയന്ത്രണവിധേയമാക്കാൻ 20 കമ്പനി സി.ആർ.പി.എഫ് (CRPF) സേനയെക്കൂടി അധികമായി ഡൽഹിയിൽ വിന്യസിക്കാൻ തീരുമാനിച്ചിട്ടുണ്ട്. ഇതിന്റെ ഭാഗമായി പശ്ചിമ ബംഗാളിൽ നിന്നുള്ള പോലീസ് ഉദ്യോഗസ്ഥരെ പ്രത്യേക വിമാനങ്ങളിൽ വ്യോമമാർഗം അടിയന്തരമായി ദില്ലിയിലേക്ക് എത്തിക്കുകയാണ്. അതിനിടെ പാർലമെന്റ് മാർച്ചിനിടെ സമരക്കാർക്ക് നേരെ ദ്രുത കർമ്മ സേന പെല്ലറ്റ് ഗണ്ണുകൾ പ്രയോഗിച്ചതായും, ലേഡി ഹാർഡിങ് ആശുപത്രിയിൽ പ്രവേശിപ്പിച്ച ഒരു യുവാവിന്റെ കണ്ണിൽ നിന്ന് പെല്ലറ്റ് നീക്കം ചെയ്തതായും ഗുരുതര ആരോപണങ്ങൾ ഉയർന്നിട്ടുണ്ട്. എന്നാൽ ജെ.പി നദ്ദ ഈ യുവാവിനെ ആശുപത്രിയിൽ സന്ദർശിച്ചിരുന്നുവെന്ന് വ്യക്തമാക്കി ബി.ജെ.പി വക്താവ് അമിത് മാളവ്യ ആരോപണങ്ങൾ തള്ളിക്കളഞ്ഞു. പെല്ലറ്റ് പ്രയോഗം പൂർണ്ണമായി നിഷേധിച്ച പോലീസ്, സമരവുമായി ബന്ധപ്പെട്ട് പത്തോളം കേസുകൾ രജിസ്റ്റർ ചെയ്തതായി അറിയിച്ചു.

​പ്രതിഷേധങ്ങൾക്കിടെ പോലീസ് നടപടികളിൽ അടിയന്തര ഇടപെടൽ ആവശ്യപ്പെട്ട് സമർപ്പിക്കപ്പെട്ട ഹർജി സുപ്രീം കോടതി തള്ളിക്കളഞ്ഞു. കോടതിയുടെ സമയം പാഴാക്കരുതെന്ന് വ്യക്തമാക്കിയ ചീഫ് ജസ്റ്റിസ് സൂര്യകാന്ത്, അതിക്രമത്തിന്റെ ദൃശ്യങ്ങൾ കോടതിയിൽ പ്രദർശിപ്പിക്കാനുള്ള അഭിഭാഷകന്റെ ശ്രമവും തടഞ്ഞു. അതേസമയം, സമരക്കാർക്കെതിരെയുള്ള പോലീസ് നടപടിയെ ചോദ്യം ചെയ്ത് സമർപ്പിച്ച മറ്റൊരു ഹർജിയിൽ ഡൽഹി ഹൈക്കോടതി കേന്ദ്ര സർക്കാരിനും ഡൽഹി പോലീസിനും നോട്ടീസ് അയച്ചിട്ടുണ്ട്. സമരം അടിച്ചമർത്താനുള്ള ശ്രമങ്ങളും കോടതി വ്യവഹാരങ്ങളും രാജ്യതലസ്ഥാനത്ത് വലിയ രാഷ്ട്രീയ-സാമൂഹിക ചർച്ചകൾക്ക് വഴിതുറന്നിരിക്കുകയാണ്.