യുദ്ധക്കളമായി ജന്തർ മന്തർ; സിജെപി മാർച്ചിൽ ലാത്തിച്ചാർജ്, പ്രതിഷേധക്കാർക്ക് നേരെ ലാത്തിവീശി പോലീസ്

​ദില്ലി: കേന്ദ്ര വിദ്യാഭ്യാസമന്ത്രിയുടെ രാജി ആവശ്യപ്പെട്ട് പാർലമെന്റിലേക്ക് കോക്രോച്ച് ജനതാ പാർട്ടി (സിജെപി) നടത്തിയ മാർച്ച് പോലീസ് തടഞ്ഞതോടെ ജന്തർ മന്തർ യുദ്ധക്കളമായി മാറി. മാർച്ചിന് നേരെ പോലീസ് ലാത്തിവീശിയതോടെ പ്രവർത്തകരും പോലീസും തമ്മിൽ ശക്തമായ സംഘർഷം ഉടലെടുത്തു. എന്നാൽ പോലീസിന്റെ ഭാഗത്തുനിന്ന് കടുത്ത പ്രതിരോധം ഉണ്ടായിട്ടും പ്രതിഷേധ മാർച്ചിൽ നിന്ന് പിന്മാറില്ലെന്ന ഉറച്ച നിലപാടിലാണ് സിജെപി നേതൃത്വം. കനത്ത മഴയും കടുപ്പിച്ച സുരക്ഷയുമൊന്നും തങ്ങളെ ഇന്ന് തടസ്സപ്പെടുത്തില്ലെന്ന് സിജെപി തങ്ങളുടെ എക്സ് (ട്വിറ്റർ) പോസ്റ്റിലൂടെ വ്യക്തമാക്കി.

​കോക്രോച്ച് പാർട്ടിയുടെ ഈ വൻ പ്രതിഷേധത്തിന്റെ പശ്ചാത്തലത്തിൽ ദില്ലി നഗരത്തിൽ പോലീസ് അതീവ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. മുന്നൂറിലധികം പോലീസ് ഉദ്യോഗസ്ഥരെയും 25 ബറ്റാലിയൻ കേന്ദ്രസേനയെയുമാണ് സുരക്ഷയ്ക്കായി പ്രദേശത്ത് വിന്യസിച്ചിരിക്കുന്നത്. ഡെപ്യൂട്ടി കമ്മിഷണർ, അഡീഷനൽ ഡിസിപി റാങ്കിലുള്ള മുതിർന്ന പോലീസ് ഉദ്യോഗസ്ഥർ സംഭവസ്ഥലത്ത് ക്യാമ്പ് ചെയ്ത് സ്ഥിതിഗതികൾ നേരിട്ട് നിരീക്ഷിച്ചുവരികയാണ്. അതേസമയം, സാമൂഹിക പ്രവർത്തകൻ സോനം വാങ്ചുകുമായി ചർച്ച നടത്തണമെന്ന പ്രതിഷേധക്കാരുടെ നിർദ്ദേശം ഇതുവരെ അംഗീകരിക്കാൻ സർക്കാർ തയ്യാറായിട്ടില്ല.