വാണിജ്യ എൽപിജി സിലിണ്ടർ വില കുറച്ചു; ഹോട്ടൽ മേഖലയ്ക്ക് ആശ്വാസം, ഗാർഹിക സിലിണ്ടറിന് മാറ്റമില്ല

ന്യൂഡല്‍ഹി: രാജ്യത്ത് വാണിജ്യ ആവശ്യങ്ങൾക്കുള്ള എൽപിജി സിലിണ്ടറുകളുടെ വില കേന്ദ്ര സർക്കാർ കുറച്ചു. വാണിജ്യ സിലിണ്ടറൊന്നിന് 183.50 രൂപയാണ് കുറച്ചത്. ഇതോടെ പുതുക്കിയ വില 2951 രൂപയായി. മെയ് മാസത്തിലെ കടുത്ത വിലക്കയറ്റത്തിന് ശേഷം എത്തിയ ഈ വിലക്കുറവ് ഹോട്ടൽ, റെസ്റ്റോറന്റ് മേഖലയ്ക്ക് വലിയ തോതിൽ ആശ്വാസം പകരുന്നതാണ്. എന്നാൽ ഗാർഹിക ആവശ്യങ്ങൾക്കുള്ള സിലിണ്ടർ വിലയിൽ മാറ്റമൊന്നും വരുത്തിയിട്ടില്ല.

​പശ്ചിമേഷ്യൻ യുദ്ധത്തെ തുടർന്ന് എൽപിജി ഇറക്കുമതി തടസ്സപ്പെട്ട പശ്ചാത്തലത്തിൽ വാണിജ്യ സിലിണ്ടറുകൾക്ക് ഏർപ്പെടുത്തിയിരുന്ന കർശന നിയന്ത്രണങ്ങൾ കേന്ദ്ര സർക്കാർ പൂർണ്ണമായും നീക്കിയിട്ടുണ്ട്. വിതരണത്തിൽ നേരിട്ട കുറവ് കാരണം മെയ് ആദ്യവാരം വാണിജ്യ സിലിണ്ടറുകൾക്ക് ഒന്നിച്ച് 900 രൂപയിലേറെ വർദ്ധിപ്പിച്ചിരുന്നു. ഇത് വിപണിയിൽ വലിയ പ്രതിസന്ധിയാണ് സൃഷ്ടിച്ചത്.

​നിലവിൽ യുദ്ധത്തിന് മുൻപുള്ള അവസ്ഥയിലേക്ക് എൽപിജി വിതരണം സാധാരണ നിലയിലാക്കാനാണ് തീരുമാനമെന്ന് കേന്ദ്ര പെട്രോളിയം മന്ത്രാലയം അറിയിച്ചു.

പശ്ചിമേഷ്യൻ പ്രതിസന്ധി മൂലം രാജ്യത്ത് കടുത്ത എൽപിജി ക്ഷാമം നേരിട്ടപ്പോൾ, വിതരണത്തിൽ പ്രഥമ പരിഗണന രാജ്യത്തെ സാധാരണ കുടുംബങ്ങൾക്കായിരിക്കുമെന്ന് കേന്ദ്രം നേരത്തെ വ്യക്തമാക്കിയിരുന്നു. ഇതിനെത്തുടർന്നാണ് വാണിജ്യ മേഖലയ്ക്ക് നിയന്ത്രണം ഏർപ്പെടുത്തിയിരുന്നത്.