ഇനിമുതൽ 'ഫുട്ബോൾ ഫെഡറേഷൻ ഓഫ് ഭാരതം': പേര് മാറ്റാനൊരുങ്ങി എ.ഐ.എഫ്.എഫ്.

ന്യൂഡൽഹി: ഓൾ ഇന്ത്യ ഫുട്ബോൾ ഫെഡറേഷൻ (AIFF) തങ്ങളുടെ ഔദ്യോഗിക പേര് മാറ്റാൻ ഒരുങ്ങുന്നതായി റിപ്പോർട്ട്. നിലവിലുള്ള പേര് പരിഷ്കരിച്ച് 'ഫുട്ബോൾ ഫെഡറേഷൻ ഓഫ് ഭാരതം' എന്നാക്കാനാണ് ഇപ്പോൾ നീക്കങ്ങൾ നടക്കുന്നത്. എ.ഐ.എഫ്.എഫിന്റെ വെർച്വൽ ജനറൽ ബോഡി യോഗത്തിലാണ് ഈ വിഷയം ചർച്ച ചെയ്തത്. എന്നാൽ, പേരുമാറ്റത്തിന് എക്സിക്യൂട്ടീവ് കമ്മിറ്റിയുടെ അന്തിമ അംഗീകാരം ലഭിക്കേണ്ടതുണ്ട്. അതിനുശേഷം മാത്രമേ കായിക മന്ത്രാലയത്തിന് ഇതുസംബന്ധിച്ച ഔദ്യോഗിക ശുപാർശ സമർപ്പിക്കാൻ സാധിക്കൂ.

​പേരുമാറ്റ ചർച്ചകൾക്ക് പുറമെ ആഭ്യന്തര ഫുട്ബോൾ സീസണുമായി ബന്ധപ്പെട്ട നിർണായക തീരുമാനങ്ങളും യോഗത്തിൽ പ്രഖ്യാപിച്ചു. ഇന്ത്യയിലെ മുൻനിര ഫുട്ബോൾ ലീഗായ ഇന്ത്യൻ സൂപ്പർ ലീഗിന്റെ (ISL) 2026-27 സീസൺ സെപ്റ്റംബർ 4-ന് ആരംഭിക്കുമെന്ന് എ.ഐ.എഫ്.എഫ്. ഭാരവാഹികൾ അംഗങ്ങളെ അറിയിച്ചു. എ.ഐ.എഫ്.എഫിന്റെ നേരിട്ടുള്ള മേൽനോട്ടത്തിൽ നടക്കുന്ന ഇത്തവണത്തെ ഐ.എസ്.എൽ. ഏഴു മാസം നീണ്ടുനിൽക്കുന്ന ഒരു പൂർണ്ണ സീസൺ ആയിരിക്കുമെന്ന പ്രത്യേകതയുമുണ്ട്.

​രാജ്യത്തെ മറ്റൊരു പ്രമുഖ ഫുട്ബോൾ ടൂർണമെന്റായ ഡ്യൂറൻഡ് കപ്പ് ജൂൺ 25-നും ജൂലൈ 25-നും ഇടയിലായി നടത്തുമെന്നും ഫെഡറേഷൻ വ്യക്തമാക്കിയിട്ടുണ്ട്. ഇന്ത്യൻ ഫുട്ബോളിൽ ഘടനാപരമായ വലിയ മാറ്റങ്ങൾക്ക് വഴിതുറക്കുന്ന തീരുമാനങ്ങളാണ് പുതിയ സീസണിന് മുന്നോടിയായി പുറത്തുവരുന്നത്.