ടെലഗ്രാമിനെതിരെ ഗുരുതര ആരോപണങ്ങളുമായി കേന്ദ്രം; എല്ലാവരുടെയും അവകാശം തടയാമോ എന്ന് ഡൽഹി ഹൈക്കോടതി

ന്യൂഡൽഹി: നിയമവിരുദ്ധവും സംശയാസ്പദവുമായ ചാനലുകൾക്കെതിരെ മുൻകരുതൽ നടപടികൾ സ്വീകരിക്കാൻ നിരവധി തവണ ആവശ്യപ്പെട്ടിട്ടും ടെലഗ്രാം ഫലപ്രദമായി പ്രതികരിച്ചില്ലെന്ന് കേന്ദ്ര സർക്കാർ ഡൽഹി ഹൈക്കോടതിയിൽ വ്യക്തമാക്കി. NEET-UG പുനഃപരീക്ഷയുമായി ബന്ധപ്പെട്ട സുരക്ഷാ ആശങ്കകൾ മുൻനിർത്തി ടെലഗ്രാമിന് കേന്ദ്രം ഏർപ്പെടുത്തിയ താൽക്കാലിക വിലക്കിനെതിരെ കമ്പനി സമർപ്പിച്ച ഹർജിയിലാണ് കോടതി വാദം കേട്ടത്. ഐ.ടി. നിയമത്തിലെ സെക്ഷൻ 69A പ്രകാരം ഏർപ്പെടുത്തിയ ഈ വിലക്ക് ജൂൺ 22 വരെ പ്രാബല്യത്തിലുണ്ടാകും.

​ടെലഗ്രാമിലെ ഭൂരിഭാഗം ചാനലുകളും ബോട്ടുകൾ (Bots) വഴിയാണ് പ്രവർത്തിക്കുന്നതെന്ന് ഇന്ത്യൻ സൈബർ ക്രൈം കോർഡിനേഷൻ സെന്ററിന്റെ (I4C) റിപ്പോർട്ട് ഉദ്ധരിച്ച് സോളിസിറ്റർ ജനറൽ തുഷാർ മേത്ത കോടതിയിൽ വാദിച്ചു. ടെലഗ്രാമിൽ ഒരു അക്കൗണ്ടിന് 40 ബോട്ടുകൾ വരെ സൃഷ്ടിക്കാൻ കഴിയുമ്പോൾ വാട്‌സ്ആപ്പിൽ ഇത് ഒന്നായി പരിമിതപ്പെടുത്തിയിരിക്കുന്നു. ക്ലൗഡ് അധിഷ്ഠിത സംവിധാനമായതിനാൽ ടെലഗ്രാമിലൂടെ കുറ്റകൃത്യങ്ങൾ ചെയ്യുന്നവരെ കണ്ടെത്തുക ബുദ്ധിമുട്ടാണ്. ഒരു ചാനലിലെ ലക്ഷക്കണക്കിന് അംഗങ്ങളെ നിമിഷങ്ങൾക്കകം മറ്റൊരു ചാനലിലേക്ക് മാറ്റാമെന്നതും, അയച്ച സന്ദേശങ്ങളുടെ തീയതിയും സമയവും പിന്നീട് തിരുത്താമെന്നതും വലിയ സുരക്ഷാ ഭീഷണിയാണെന്ന് കേന്ദ്രം ചൂണ്ടിക്കാട്ടി. 2024-ൽ പരീക്ഷയ്ക്ക് ശേഷം പോസ്റ്റ് ചെയ്ത ചോദ്യപേപ്പറിന്റെ തീയതി മുൻകൂട്ടിയുള്ളതാക്കി തിരുത്തി ചോദ്യപേപ്പർ ചോർന്നെന്ന രീതിയിൽ വ്യാജ പ്രചാരണം നടത്തി വിദ്യാർത്ഥികളെ പ്രകോപിപ്പിച്ച സംഭവവും കേന്ദ്രം കോടതിയെ ബോധിപ്പിച്ചു. മുൻകാല സന്ദേശങ്ങൾ തിരുത്താനുള്ള ഈ സൗകര്യം ജൂൺ 30 വരെ പ്രവർത്തനരഹിതമാക്കാൻ ടെലഗ്രാമിനോട് കേന്ദ്രം ആവശ്യപ്പെട്ടിട്ടുണ്ട്.

​എന്നാൽ, ചിലർ പ്ലാറ്റ്‌ഫോം ദുരുപയോഗം ചെയ്യുന്നു എന്ന കാരണത്താൽ മുഴുവൻ ഉപയോക്താക്കളുടെയും അവകാശങ്ങൾ നിയന്ത്രിക്കുന്നത് ന്യായമാണോ എന്ന് ഹൈക്കോടതി കേന്ദ്ര സർക്കാരിനോട് ചോദിച്ചു. ചിലരുടെ തെറ്റായ നടപടികൾക്ക് എല്ലാവരുടെയും അവകാശങ്ങൾ തടയാനാകുമോ എന്നായിരുന്നു കോടതിയുടെ ചോദ്യം. ഇതിന് മറുപടിയായി, ഒരു പ്രദേശത്ത് ഇന്റർനെറ്റ് നിരോധനം ഏർപ്പെടുത്തുമ്പോൾ പ്രശ്നക്കാരായ 10 ശതമാനം ആളുകൾ കാരണം ബാക്കി 90 ശതമാനം ജനങ്ങളും നിയന്ത്രണങ്ങൾ നേരിടാറുണ്ടെന്ന യാഥാർത്ഥ്യം തുഷാർ മേത്ത കോടതിയിൽ വിശദീകരിച്ചു.