നീറ്റ് പുനഃപരീക്ഷയുടെ ചോദ്യപേപ്പർ വിമാനത്തിലെത്തും; വിതരണത്തിന് വ്യോമസേനയുടെ സഹായം തേടാൻ കേന്ദ്രം

ന്യൂഡൽഹി: ജൂൺ 21-ന് നടത്താൻ നിശ്ചയിച്ചിരിക്കുന്ന നീറ്റ് യു.ജി. (NEET UG) പുനഃപരീക്ഷയുടെ സുരക്ഷ ഉറപ്പാക്കാൻ പ്രതിരോധസേനയുടെ സഹായം തേടാൻ കേന്ദ്രസർക്കാർ തീരുമാനം. ചോദ്യപേപ്പർ വിതരണത്തിനായി വ്യോമസേനയുടെ (IAF) സഹായം തേടുമെന്ന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ അറിയിച്ചു. മേയ് മൂന്നിന് നടത്തിയ പരീക്ഷയുടെ ചോദ്യപേപ്പർ ചോർന്നതിനെ തുടർന്ന് പരീക്ഷ റദ്ദാക്കേണ്ടി വന്ന പശ്ചാത്തലത്തിലാണ് അതീവ സുരക്ഷയോടെ വീണ്ടും പരീക്ഷ നടത്തുന്നത്.

​ചോദ്യപേപ്പർ ചോർച്ച പൂർണ്ണമായും തടയുന്നതിനും സുരക്ഷിതമായി വിതരണം ചെയ്യുന്നതിനുമായാണ് വ്യോമസേനയുടെ വിമാനങ്ങൾ ഉപയോഗപ്പെടുത്തുന്നതെന്ന് ധർമേന്ദ്ര പ്രധാൻ വ്യക്തമാക്കി. ജൂൺ മാസത്തിലെ കാലാവസ്ഥാ വ്യതിയാനങ്ങളും പ്രത്യേക സുരക്ഷാ സാഹചര്യങ്ങളും കണക്കിലെടുത്താണ് ഈ സുപ്രധാന തീരുമാനം. മുൻപ് തപാൽ വകുപ്പ് വഴിയായിരുന്നു ചോദ്യപേപ്പർ വിതരണം ചെയ്തിരുന്നത്. എന്നാൽ ഇത്തവണ തപാൽ വകുപ്പിനൊപ്പം വ്യോമസേനയെക്കൂടി പങ്കാളിയാക്കുന്നതോടെ ചോദ്യപേപ്പർ ഒട്ടും സമയനഷ്ടമില്ലാതെ അതീവ രഹസ്യമായി ലക്ഷ്യസ്ഥാനങ്ങളിൽ എത്തിക്കാൻ സാധിക്കും. വരാനിരിക്കുന്ന പരീക്ഷ തികച്ചും സുതാര്യവും സുഗമവുമായി നടത്താൻ സർക്കാർ പൂർണ്ണ സജ്ജമാണെന്നും മന്ത്രി കൂട്ടിച്ചേർത്തു.

​ചോദ്യപേപ്പർ ചോർച്ച തടയുന്നതിനും പരീക്ഷാ സുരക്ഷ ശക്തമാക്കുന്നതിനുമായി കഴിഞ്ഞ വ്യാഴാഴ്ച കേന്ദ്ര പ്രതിരോധ മന്ത്രി രാജ്‌നാഥ് സിങ്, വിദ്യാഭ്യാസ മന്ത്രി ധർമേന്ദ്ര പ്രധാൻ, കമ്മ്യൂണിക്കേഷൻസ് മന്ത്രി ജ്യോതിരാദിത്യ സിന്ധ്യ എന്നിവരുടെ നേതൃത്വത്തിൽ ഉന്നതതല യോഗം ചേർന്നിരുന്നു. ഈ യോഗത്തിലാണ് ചോദ്യപേപ്പർ വിതരണത്തിന് വ്യോമസേനയുടെ സേവനം വിട്ടുനൽകണമെന്ന നിർണായക നിർദേശം ഉയർന്നുവന്നതും അംഗീകരിക്കപ്പെട്ടതും.