തെരുവുനായ ശല്യത്തിൽ സുപ്രീംകോടതിയുടെ സുപ്രധാന വിധി: അപകടകാരികളായ നായ്ക്കളെ കൊല്ലാം, മൃഗസ്‌നേഹികളുടെ ഹർജി തള്ളി

ന്യൂഡൽഹി: രാജ്യത്ത് വർധിച്ചുവരുന്ന തെരുവുനായ ആക്രമണങ്ങളിൽ അതീവ നിർണായകമായ വിധി പ്രസ്താവിച്ച് സുപ്രീംകോടതി. പൊതുജനങ്ങളുടെ സുരക്ഷ മുൻനിർത്തി അപകടകാരികളായ തെരുവുനായ്ക്കളെ കൊല്ലാമെന്ന് സുപ്രീംകോടതി വ്യക്തമാക്കുകയും, ഈ നിർദേശങ്ങൾ നടപ്പിലാക്കുന്ന ഉദ്യോഗസ്ഥർക്കെതിരെ യാതൊരുവിധ ക്രിമിനൽ നടപടികളോ എഫ്.ഐ.ആറോ സ്വീകരിക്കരുതെന്ന് ഉത്തരവിടുകയും ചെയ്തു. തെരുവുനായ്ക്കളെ സംരക്ഷിക്കണമെന്നാവശ്യപ്പെട്ട് മൃഗസ്‌നേഹികൾ നൽകിയ ഹർജികളും ഇടക്കാല ഉത്തരവ് പരിഷ്‌കരിക്കണമെന്ന അപേക്ഷകളും കോടതി പൂർണ്ണമായി തള്ളി. രാജ്യത്തെ തെരുവുനായ ആക്രമണങ്ങളുടെ ഭീതിജനകമായ കണക്കുകൾ നിരത്തി സ്വമേധയാ എടുത്ത കേസിലാണ് സുപ്രീംകോടതിയുടെ ഈ സുപ്രധാന ഇടപെടൽ.

​അനിമൽ ബർത്ത് കൺട്രോൾ (ABC) ചട്ടങ്ങൾ രാജ്യത്ത് കർശനമായി പാലിക്കണമെന്നും ഇതിൽ വീഴ്ച വരുത്തുന്ന ഉദ്യോഗസ്ഥർക്കെതിരെ കടുത്ത കോടതിയലക്ഷ്യ നടപടി സ്വീകരിക്കുമെന്നും കോടതി മുന്നറിയിപ്പ് നൽകി. എല്ലാ ജില്ലകളിലും പൂർണ്ണതോതിൽ പ്രവർത്തിക്കുന്ന എബിസി സെന്ററുകൾ സ്ഥാപിക്കണം. തെരുവുനായ്ക്കളെ പിടികൂടുന്ന ഇടങ്ങളിൽ തന്നെ തിരികെ തുറന്നുവിടാൻ പാടില്ല. കൂടാതെ, എല്ലാ സർക്കാർ ആശുപത്രികളിലും ആന്റി റാബിസ് വാക്സിൻ, ഇമ്യൂണോഗ്ലോബുലിൻ എന്നിവയുടെ മതിയായ ലഭ്യത ഉറപ്പാക്കണമെന്നും, നായയുടെ കടിയേറ്റ കേസുകൾ കൈകാര്യം ചെയ്യാൻ ആശുപത്രികളിൽ പ്രത്യേക സംവിധാനങ്ങൾ ഏർപ്പെടുത്തണമെന്നും കോടതി നിർദേശിച്ചു. ദേശീയപാതകളിലും എക്സ്പ്രസ് വേകളിലും മൃഗങ്ങളുടെ സാന്നിധ്യം ഒഴിവാക്കാൻ ദേശീയപാത അതോറിറ്റി (NHAI) അടിയന്തര നടപടി സ്വീകരിക്കണം.

​തെരുവുനായ ശല്യം ഇത്രയും ഭീകരമായ അവസ്ഥയിലേക്ക് എത്തിയതിന് കാരണം സംസ്ഥാന സർക്കാരുകളുടെ നിഷ്‌ക്രിയത്വമാണെന്ന് കോടതി കഠിനമായി വിമർശിച്ചു. നിയമങ്ങൾ കൃത്യമായി നടപ്പാക്കുന്നതിൽ അധികൃതർ കാട്ടിയത് കടുത്ത അനാസ്ഥയാണെന്നും, ഉത്തരവാദപ്പെട്ടവർ സമയത്ത് ഉണർന്നു പ്രവർത്തിച്ചിരുന്നെങ്കിൽ ഇന്നത്തെ ഈ ഭയാനക സാഹചര്യം ഒഴിവാക്കാമായിരുന്നുവെന്നും കോടതി ചൂണ്ടിക്കാട്ടി. ഭരണഘടനയുടെ ആർട്ടിക്കിൾ 21 പ്രകാരം പൗരന്മാർക്ക് ജീവിക്കാനുള്ള അവകാശവും സുരക്ഷിതത്വവും ഉറപ്പാക്കാൻ സംസ്ഥാനങ്ങൾ ബാധ്യസ്ഥരാണെന്ന് കോടതി ഓർമ്മിപ്പിച്ചു. സുപ്രീംകോടതിയുടെ ഈ നിർദേശങ്ങൾ കൃത്യമായി നടപ്പാക്കുന്നുണ്ടോ എന്ന് അതത് സംസ്ഥാനങ്ങളിലെ ഹൈക്കോടതികൾ പരിശോധിക്കണമെന്നും, നടപ്പാക്കിയ കാര്യങ്ങൾ സംബന്ധിച്ച് സംസ്ഥാന ചീഫ് സെക്രട്ടറിമാർ വരാനിരിക്കുന്ന ഓഗസ്റ്റ് മാസത്തിൽ ഹൈക്കോടതികളിൽ റിപ്പോർട്ട് സമർപ്പിക്കണമെന്നും ഉത്തരവിൽ വ്യക്തമാക്കുന്നു.