നീറ്റ് യുജി പുനഃപരീക്ഷ ജൂൺ 21-ന്: പുതിയ തീയതി പ്രഖ്യാപിച്ച് എൻടിഎ

ന്യൂഡൽഹി: ചോദ്യപേപ്പർ ചോർച്ചയെത്തുടർന്ന് റദ്ദാക്കിയ നീറ്റ് യുജി (NEET-UG 2026) പരീക്ഷയുടെ പുതുക്കിയ തീയതി നാഷണൽ ടെസ്റ്റിംഗ് ഏജൻസി (NTA) പ്രഖ്യാപിച്ചു. പുതിയ ഷെഡ്യൂൾ പ്രകാരം ജൂൺ 21 ഞായറാഴ്ച രാജ്യവ്യാപകമായി പുനഃപരീക്ഷ നടക്കും. പരീക്ഷാ തീയതിയെച്ചൊല്ലി വിദ്യാർത്ഥികൾക്കിടയിൽ നിലനിന്നിരുന്ന വലിയ അനിശ്ചിതത്വങ്ങൾക്കാണ് ഈ പ്രഖ്യാപനത്തോടെ വിരാമമായിരിക്കുന്നത്. 22 ലക്ഷത്തിലധികം വരുന്ന മെഡിക്കൽ പ്രവേശന പരീക്ഷാ ഉദ്യോഗാർത്ഥികൾക്ക് ഏറെ ആശ്വാസം നൽകുന്നതാണ് ഈ തീരുമാനം.

​കേന്ദ്ര സർക്കാരിന്റെ പ്രത്യേക അംഗീകാരത്തോടെ നിശ്ചയിച്ച പുതിയ തീയതി എൻടിഎയുടെ ഔദ്യോഗിക 'എക്സ്' (X) ഹാൻഡിൽ വഴിയാണ് പുറത്തുവിട്ടത്. മെയ് മൂന്നിന് നടന്ന പരീക്ഷയിലെ ക്രമക്കേടുകളെക്കുറിച്ചുള്ള അന്വേഷണം സിബിഐക്ക് വിട്ടതിന് പിന്നാലെയാണ് പുനഃപരീക്ഷയ്ക്കുള്ള വേഗതയേറിയ നടപടികൾ അധികൃതർ സ്വീകരിച്ചത്. പരീക്ഷയുമായി ബന്ധപ്പെട്ട് സാമൂഹമാധ്യമങ്ങളിൽ പ്രചരിക്കുന്ന വ്യാജ വാർത്തകളിൽ വിദ്യാർത്ഥികളും രക്ഷിതാക്കളും വഞ്ചിതരാകരുതെന്നും ആധികാരിക വിവരങ്ങൾക്കായി ഔദ്യോഗിക ചാനലുകൾ മാത്രം ആശ്രയിക്കണമെന്നും എൻടിഎ നിർദ്ദേശിച്ചിട്ടുണ്ട്.

​പരീക്ഷയെക്കുറിച്ചുള്ള സംശയങ്ങൾക്കും കൂടുതൽ വിവരങ്ങൾക്കുമായി വിദ്യാർത്ഥികൾക്ക് 011-40759000, 011-69227700 എന്നീ ഹെൽപ്പ്‌ലൈൻ നമ്പറുകളിലോ neet-ug@nta.ac.in എന്ന ഇമെയിൽ വിലാസത്തിലോ ബന്ധപ്പെടാം. കൂടാതെ കൂടുതൽ വിവരങ്ങൾ exams.nta.ac.in/NEET എന്ന ഔദ്യോഗിക വെബ്‌സൈറ്റിലും ലഭ്യമാണ്. മുൻപ് അപേക്ഷ സമർപ്പിച്ചവർക്ക് വീണ്ടും രജിസ്ട്രേഷൻ നടത്തേണ്ടതില്ലെന്നും പഴയ അപേക്ഷകൾ തന്നെ പുനഃപരീക്ഷയ്ക്ക് സാധുവായിരിക്കുമെന്നും എൻടിഎ വ്യക്തമാക്കിയിട്ടുണ്ട്.