കാമുകനെ വീട്ടുകാർ കൊന്നു; നാന്ദേഡിൽ യുവതി മൃതദേഹത്തെ വിവാഹംചെയ്തു

മുംബൈ: പ്രണയത്തിൻ്റെ പേരിൽ കാമുകനെ കൊന്നതിന് പ്രതികാരമായി മൃതദേഹത്തിൽ വരണമാല്യം ചാർത്തി യുവതി. മഹാരാഷ്ട്രയിലെ നാന്ദേഡിലാണ് സംഭവം. കൊല്ലപ്പെട്ട കാമുകൻ സാക്ഷം ടേറ്റിന്റെ (20) വീട്ടിലെത്തിയാണ് യുവതി മൃതദേഹത്തിൽ വരണമാല്യം ചാർത്തിയത്.

സാക്ഷം ടേറ്റിനെ യുവതിയുടെ വീട്ടുകാർ വെടിവെച്ചും കല്ലുകൊണ്ട് തലയ്ക്കിടിച്ചും കൊലപ്പെടുത്തുകയായിരുന്നു. ശവസംസ്കാര ചടങ്ങിനെത്തിയപ്പോഴാണ് യുവതി കാമുകൻ്റെ മൃതദേഹത്തിൽ മാല ചാർത്തിയതും ഇനിയുള്ളകാലം ഈവീട്ടിൽ മരുമകളായി ജീവിക്കുമെന്ന് വ്യക്തമാക്കിയതും.

സഹോദരന്മാർ വഴിയാണ് യുവതി സാക്ഷം ടേറ്റിനെ പരിചയപ്പെട്ടത്. പ്രണയം വീട്ടുകാർ അറിഞ്ഞതോടെ പ്രശ്‌നങ്ങൾ ആരംഭിച്ചു. ജാതിവ്യത്യാസത്തെച്ചൊല്ലി വീട്ടുകാർ ബന്ധത്തെ എതിർത്തു. എന്നിട്ടും വിവാഹംനടക്കാൻ പോകുകയാണെന്ന് മനസ്സിലാക്കിയാണ് സഹോദരങ്ങളും പിതാവും ചേർന്ന് കൊലനടത്തിയതെന്ന് പോലീസ് പറഞ്ഞു.

സാക്ഷം മരിച്ചെങ്കിലും ഞങ്ങളുടെ സ്നേഹം വിജയിച്ചു. തോറ്റത് എൻ്റെ അച്ഛനും സഹോദരങ്ങളുമാണ് യുവതി പറഞ്ഞു. ടേറ്റിൻ്റെ കൊലയാളികൾക്ക് വധശിക്ഷ നൽകണമെന്നും ആവശ്യപ്പെട്ടു. സംഭവത്തിൽ യുവതിയുടെ പിതാവും സഹോദരനും ഉൾപ്പെടെ മൂന്നുപേരേ പോലീസ് അറസ്റ്റുചെയ്തു‌.