കുംഭമേളയ്ക്കായി 1670 മരം മുറിക്കുന്നു; 1200 ഏക്കറിൽ സന്ന്യാസിഗ്രാമം നിർമ്മിക്കാൻ പദ്ധതി

മുംബൈ: കുംഭമേളയ്ക്കായി നാസിക്കിൽ 1570 മരംമുറിച്ച് 'സാധുഗ്രാം' നിർമിക്കാനുള്ള നീക്കത്തിൽ എതിർപ്പ് ശക്തമാകുന്നു. 2026 ഒക്ടോബർ 31 മുതൽ ആരംഭിക്കുന്ന കുംഭമേളയ്ക്ക് മുന്നോടിയായി തപോവനപ്രദേശത്ത് 1200 ഏക്കറിലാണ് സന്ന്യാസികൾക്ക് വേണ്ടി സാധുഗ്രാം ആസൂത്രണം ചെയ്തിരിക്കുന്നത്. ഈ പ്രദേശത്ത് മരങ്ങൾ മുറിക്കാൻ അടയാളപ്പെടുത്തിയിട്ടുണ്ട്. ഇതിൽ ചില മരങ്ങൾക്ക് 100 വർഷം പഴക്കമുണ്ടെന്ന് പ്രകൃതിസ്നേഹികളും ജനങ്ങളും പറയുന്നു.

മരംമുറിക്കണമെന്ന് ആവശ്യപ്പെട്ട് നാസിക് മുനിസിപ്പൽ കോർപ്പറേഷൻ നൽകിയ നോട്ടീസിൽ നൂറുകണക്കിന് എതിർപ്പുകൾ ലഭിച്ചിരുന്നു. തിങ്കളാഴ്ച്‌ച നടന്ന വാദംകേൾക്കലിൽ ശക്തമായി എതിർപ്പ് ഉയർന്നു.

കുംഭമേളയുടെ മറവിൽ മരങ്ങൾ വെട്ടിമാറ്റി പ്രിയപ്പെട്ട ചില വ്യവസായികൾക്ക് ഭൂമി ദാനംചെയ്യാനാണ് സർക്കാർ പദ്ധതിയിടുന്നതെന്ന് എംഎൻ.എസ് മേധാവി രാജ്താക്കറെ ആരോപിച്ചു. സർക്കാർ ഏറ്റുമുട്ടൽ നിലപാട് സ്വീകരിച്ചാൽ തന്റെ പാർട്ടി പോരാട്ടത്തിൽ ജനങ്ങൾക്കൊപ്പം നിൽക്കുമെന്നും അദ്ദേഹം പറഞ്ഞു. ഉപമുഖ്യമന്ത്രി അജിത് പവാറിൻ്റെ നേതൃത്വത്തിലുള്ള എൻസിപി അംഗവും നടനും വൃക്ഷസംരക്ഷകനുമായ സയാജി ഷിനേ നാസിക്കിലെ തപോവൻ പ്രദേശം സന്ദർശിച്ച് മരംമുറിക്കെതിരേ പോരാടുമെന്ന് വ്യക്തമാക്കിയിട്ടുണ്ട്.

നാസിക്കിൽ ഇത് ആദ്യമല്ല കുംഭമേള നടക്കുന്നതെന്ന് രാജ് താക്കറെ സാമൂഹികമാധ്യമത്തിൽ പറഞ്ഞു. വനവാസകാലത്ത് ശ്രീരാമനും സീതയും ലക്ഷ്മണനും താമസിച്ചിരുന്നെന്നു വിശ്വസിക്കപ്പെടുന്ന സ്ഥലമാണ് തപോവൻ. ബിജെപിയുടെ ഹിന്ദുത്വം വ്യാജമാണെന്നും കരാറുകാർക്ക് നേട്ടമുണ്ടാക്കാൻവേണ്ടിയാണ് മരംമുറിയെന്നും ശിവസേന നേതാവ് ഉദ്ധവ് താക്കറെ ആരോപിച്ചിരുന്നു.