എ 320 വിമാനങ്ങളിൽ സോഫ്റ്റ്‌വേർ അപ്ഗ്രഡേഷൻ; സർവീസുകൾ വൈകി

ന്യൂഡൽഹി: ളൈറ്റ് കൺട്രോൾ ഡേറ്റാ തകരാർ സംഭവിച്ചേക്കാമെന്ന വിമാനനിർമാണക്കമ്പനി എയർബസിൻ്റെ സുരക്ഷാ മുന്നറിയിപ്പിന് പിന്നാലെ ഇന്ത്യയിൽ എ320 ശ്രേണി വിമാനങ്ങളുടെ സോഫ്റ്റ്‌വേർ അപ്ഗ്രഡേഷൻ തുടങ്ങി. ആവശ്യമായ സാങ്കേതികമാറ്റങ്ങൾ അടിയന്തരമായി നടത്താൻ ഇന്ത്യൻ വിമാനക്കമ്പനികളോട് ഡയറക്‌ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) നിർദേശിച്ചു.

ഇൻഡിഗോ, എയർ ഇന്ത്യ, എയർ ഇന്ത്യ എക്‌സ്പ്രസ് വിമാനക്കമ്പനികൾ അപ്ഗ്രഡേഷൻ ആരംഭിച്ചു. ഞായറാഴ്‌ച പുലർച്ചെ അഞ്ചരയോടെ പൂർത്തിയാകുമെന്നാണ് കണക്കുകൂട്ടൽ. അപ്ഗ്രഡേഷൻ കാരണം എ320 ശ്രേണിയിലെ വിമാനങ്ങൾ പലതും ശനിയാഴ്‌ച വൈകി. സർവീസ് റദ്ദാക്കിയില്ലെന്നും ശരാശരി ഒന്നുമുതൽ ഒന്നര മണിക്കൂർ കാലതാമസമേ ഉണ്ടായിട്ടുള്ളൂവെന്നുമാണ് റിപ്പോർട്ട്. ആഗോളതലത്തിൽ 6000 വിമാനങ്ങൾക്ക് അപ്ഗ്രഡേഷൻ വേണ്ടിവരും.

പ്രശ്നം സൗരവികിരണം

കടുത്ത സൗരവികിരണംമൂലം എ320 ശ്രേണിയിൽപ്പെട്ട വിമാനങ്ങളുടെ ഫ്ളൈറ്റ് കൺട്രോൾ ഡേറ്റയ്ക്ക് തകരാർ സംഭവിക്കാമെന്നാണ് വെള്ളിയാഴ്ച്‌ച എയർബസ് സുരക്ഷാ മുന്നറിയിപ്പ് നൽകിയത്. ഇത്തരം വിമാനങ്ങളിൽ സോഫ്റ്റ്വേർ അല്ലെങ്കിൽ ഹാർഡ്‌വേർ അപ്ഗ്രഡേഷൻ നടത്തണമെന്നും അടിയന്തര നിർദേശം നൽകിയിരുന്നു.

ആകെ 338 വിമാനങ്ങൾ

ഡിജിസിഎയുടെ കണക്കുകൾപ്രകാരം ഈ ശ്രേണിയിലുള്ള 338 വിമാനങ്ങളാണ് ഇന്ത്യയിലുള്ളത്. എ320, എ321 വിമാനങ്ങൾ ഇതിലുൾപ്പെടുന്നു. ഇൻഡിഗോയുടെ 200 വിമാനങ്ങൾക്കും എയർ ഇന്ത്യയുടെ 113 വിമാനങ്ങൾക്കും എയർ ഇന്ത്യ എക്‌സ്പ്രസിൻ്റെ 25 വിമാനങ്ങൾക്കുമാണ് അപ്ഗ്രഡേഷൻ.

പൂർത്തിയായത് 189

189 വിമാനങ്ങളുടെയും സോഫ്റ്റ്‌വേർ അപ്ഗ്രഡേഷൻ ശനിയാഴ്‌ച രാവിലെ പത്തോടെ പൂർത്തിയായി. ഡൽഹി, ബെംഗളൂരു, മുംബൈ, ചെന്നെ ഹൈദരാബാദ്, അഹമ്മദാബാദ്, കൊൽക്കത്ത എന്നിവിടങ്ങളിലാണ് അപ്ഗ്രഡേഷൻ. എയർഇന്ത്യയുടെ 42ഉം ഇൻഡിഗോ 143ഉം എയർഇന്ത്യ എക്സ്പ്രസിന്റെ നാലു വിമാനങ്ങളുടെ അപ്ഗ്രഡേഷനാണ് പൂർത്തിയാത്. സർവീസ്പ്രശ്നം ബാധിച്ച വിമാനങ്ങളിൽ പ്രവർത്തനക്ഷമമായ എലിവേറ്റർ എയറോൺ കമ്പ്യൂട്ടർ സ്ഥാപിക്കാൻ എയർബസ് വിമാനക്കമ്പനികളോട് ആവശ്യപ്പെട്ടതായി യൂറോപ്യൻ യൂണിയൻ ഏവിയേഷൻ സേഫ്റ്റി ഏജൻസി അറിയിച്ചു.