ഗവർണറെ കുടഞ്ഞ് സുപ്രീംകോടതി; ഡിജിറ്റൽ, സാങ്കേതിക സർവകലാശാല വിസി നിയമനത്തിൽ രൂക്ഷ വിമർശനം

ന്യൂഡൽഹി: സാങ്കേതിക, ഡിജിറ്റൽ സർവകലാശാലകളിലെ വൈസ് ചാൻസലർ നിയമനക്കാര്യത്തിൽ തീരുമാനം വൈകുന്നതിൽ ഗവർണറെ വിമർശിച്ച് സുപ്രീംകോടതി.

വിസി നിയമനത്തിന് റിട്ട. ജഡ്‌ജി ജസ്റ്റിസ് സുധാംശു ധൂലിയയെ അധ്യക്ഷനാക്കി കോടതി നിയമിച്ച സെർച്ച് കമ്മിറ്റി നൽകിയ ശുപാർശയിൽ തീരുമാനമെടുക്കാൻ സർവകലാശാലകളുടെ ചാൻസലർകൂടിയായ ഗവർണർ രാമജന്ദ്ര ആർലേക്കറോട് സുപ്രീംകോടതി നിർദേശിച്ചു. ജസ്റ്റിസ് ധൂലിയ നൽകിയത് വെറും കടലാസ് കഷണമല്ലെന്നും കോടതി ഓർമ്മിപ്പിച്ചു. സുപ്രീംകോടതിയിലെ മുൻ ജഡ്‌ജിയാണ് അതു തയ്യാറാക്കിയത്. റിപ്പോർട്ട് നോക്കി വേണ്ട തീരുമാനമെടുക്കണമെന്നും ജസ്റ്റിസുമാരായ ജെ.ബി. പർദിവാല, കെ.വി. വിശ്വനാഥൻ എന്നിവരുടെ ബെഞ്ച് ഗവർണറോട് നിർദേശിച്ചു.

സമിതി റിപ്പോർട്ട് പരിശോധിച്ചോ? ഇല്ലെന്ന് ഗവർണറുടെ അഭിഭാഷകൻ

സർക്കാരും ഗവർണറും തമ്മിലെ വിസി നിയമനത്തർക്കം നീണ്ടപ്പോൾ ഓഗസ്റ്റിലാണ് ജസ്റ്റിസ് ധൂലിയയെ അധ്യക്ഷനാക്കി സുപ്രീംകോടതി സെർച്ച് കമ്മിറ്റിയുണ്ടാക്കിയത്. സമിതിയംഗങ്ങളെ ഗവർണറും സർക്കാരും നിർദേശിച്ചു. ഇതുപ്രകാരം സമിതിയുണ്ടാക്കിയ ജസ്റ്റിസ് ധൂലിയ വിസി നിയമനത്തിന് പാനൽ മുഖ്യമന്ത്രിക്ക് കൈമാറി. ഇതിൽനിന്ന് മുൻഗണനാക്രമത്തിൽ മുഖ്യമന്ത്രി പേരുകൾ നൽകിയെങ്കിലും ചാൻസലർ തീരുമാനമെടുത്തിട്ടില്ലെന്ന് സംസ്ഥാനസർക്കാരിനുവേണ്ടി മുതിർന്ന അഭിഭാഷകൻ ജയ്ദീപ് ഗുപ്‌ത വെള്ളിയാഴ്ച്‌ച കോടതിയുടെ ശ്രദ്ധയിൽപ്പെടുത്തി. റിപ്പോർട്ട് പരിശോധിച്ചോയെന്ന് ജസ്റ്റിസ് പർദിവാല ചോദിച്ചപ്പോൾ ഇല്ലെന്നായിരുന്നു ഗവർണറുടെ അഭിഭാഷകൻ ടി.ആർ. വെങ്കിട്ട സുബ്രഹ്മണ്യത്തിൻ്റെ മറുപടി. നടപടിക്രമങ്ങളുടെ ചില രേഖകൾ ആവശ്യപ്പെട്ടിട്ടുണ്ടെന്നും അതു മുഴുവനായി ലഭിച്ചിട്ടില്ലെന്നും അദ്ദേഹം പറഞ്ഞു. എന്തുരേഖയാണിതെന്ന് ജസ്റ്റിസ് പർദിവാല ചോദിച്ചപ്പോൾ തൻ്റെ അറിവിൽ എല്ലാരേഖയും കൈമാറിക്കഴിഞ്ഞിട്ടുണ്ടെന്ന് ജയ്ദീപ് ഗുപ്ത അറിയിച്ചു.

സമിതിയുണ്ടാക്കിയത് ഇരുപക്ഷത്തിൻ്റെയും സമ്മതത്തോടെ

സമിതി റിപ്പോർട്ടിൽ നടപടിയെടുക്കാൻ രേഖകൾ കിട്ടിയിട്ടില്ലെന്ന് പറയുന്നത് എന്തുകൊണ്ടാണെന്ന് മനസ്സിലാകുന്നില്ലെന്ന് കോടതി നിരീക്ഷിച്ചു. കമ്മിറ്റി റിപ്പോർട്ട് പ്രകാരം ചാൻസലർ തീരുമാനമെടുക്കുമെന്നാണ് പ്രതീക്ഷ. സർക്കാരിന്റെയും ഗവർണറുടെയും സമ്മതത്തോടെയാണ് സമിതിയുണ്ടാക്കിയതെന്നും ബെഞ്ച് ഓർമ്മിപ്പിച്ചു. ചാൻസലർ തീരുമാനമെടുക്കുമെന്നാണ് പ്രതീക്ഷിക്കുന്നതെന്നും അതിലെ ശരിതെറ്റുകൾ കോടതി തീരുമാനിക്കുമെന്നും ജസ്റ്റിസ് പർദിവാല പറഞ്ഞു. ഹർജി വീണ്ടും അടുത്ത വെള്ളിയാഴ്‌ച പരിഗണിക്കും.

സാങ്കേതിക സർവകലാശാലയിൽ ഡോ. കെ. ശിവപ്രസാദിനെയും ഡിജിറ്റൽ സർവകലാശാലയിൽ ഡോ. സിസാ തോമസിനെയും താത്കാലിക വിസിമാരായി നിയമിച്ച ഗവർണറുടെ നടപടിയെ ചോദ്യംചെയ്‌തുള്ള ഹർജിയിലാണ് സ്ഥിരം വിസി നിയമനത്തിനായി ഓഗസ്റ്റിൽ സുപ്രീംകോടതി നിർണായക ഇടപെടൽ നടത്തിയത്.

മുഖ്യമന്ത്രി മെറിറ്റ് പാലിച്ചില്ലെന്ന് ഗവർണർ

: വിസി നിയമനത്തിന് ജസ്റ്റിസ് സുധാംശു ധൂലിയ സമിതി കൈമാറിയ പാനലിൽനിന്ന് മെറിറ്റ് പരിഗണിക്കാതെയാണ് മുഖ്യമന്ത്രി പേരുകൾ നിർദേശിച്ചിരിക്കുന്നതെന്നാരോപിച്ച് ചാൻസലറായ ഗവർണർ രാജേന്ദ്ര ആർലേക്കർ സുപ്രീംകോടതിയെ സമീപിച്ചു. സെർച്ച് കമ്മിറ്റിയുടെ നടപടിക്രമങ്ങളുടെ മുഴുവൻ രേഖകളും കൈമാറാൻ ജസ്റ്റിസ് ധൂലിയക്ക് നിർദേശം നൽകണമെന്ന് ഗവർണർ കോടതിയിൽ നൽകിയ അപേക്ഷയിൽ ആവശ്യപ്പെട്ടു. മുഖ്യമന്ത്രി യോഗ്യത പരിഗണിച്ചിട്ടില്ലെന്നാണ് ഗവർണറുടെ നിലപാട്.

മുഖ്യമന്ത്രിക്ക് കൈമാറിയത് നാലുപേരുകൾ

ഡിജിറ്റൽ സർവകലാശാലയിലേക്ക് അഞ്ചുപേരുകളും സാങ്കേതിക സർവകലാശാലയിലേക്ക് നാലുപേരുകളുമാണ് സെർച്ച്‌ കമ്മിറ്റി ഒക്ടോബർ 14-ന് മുഖ്യമന്ത്രിക്ക് കൈമാറിയത്. രണ്ടുപട്ടികയിലും ഉൾപ്പെട്ട രണ്ടുപേരുണ്ടായിരുന്നു.

അന്ന് കോടതി നിർദേശിച്ചത്

ബംഗാളിലെ സർവകലാശാല കേസുകളിൽ ചെയ്‌തതുപോലെ, സമിതിയുടെ പാനലിൽനിന്ന് മുഖ്യമന്ത്രി മുൻഗണനാക്രമത്തിൽ നൽകുന്ന പേരുകൾ അംഗീകരിക്കണമെന്നാണ് ചാൻസലറോട് കോടതി നിർദേശിച്ചിരുന്നത്.