ചീഫ് ജസ്റ്റിസായി സൂര്യകാന്ത് നാളെ സ്ഥാനമേൽക്കും ; ചീഫ് ജസ്റ്റിസ് ഗവായ് ഇന്നു വിരമിക്കും

ന്യൂഡൽഹി: സുപ്രീംകോടതിയുടെ പുതിയ ചീഫ് ജസ്റ്റിസായി സൂര്യകാന്ത് തിങ്കളാഴ്ച സത്യപ്രതിജ്ഞചെയ്‌ത് സ്ഥാനമേൽക്കും, രാഷ്ട്രപതിഭവനിൽ നടക്കുന്ന ചടങ്ങിൽ ഏഴു രാജ്യങ്ങളിൽനിന്നുള്ള ന്യായാധിപന്മാർ അതിഥികളായെത്തും. ആദ്യമായാണ് ഇത്രയധികം രാജ്യങ്ങളിൽനിന്നുള്ളവർ ഒരിന്ത്യൻ ചീഫ് ജസ്റ്റിസിൻ്റെ സത്യപ്രതിജ്ഞാച്ചടങ്ങിനെത്തുന്നതെന്ന് അധികൃതർ പറഞ്ഞു.

ഭൂട്ടാൻ, കെനിയ, മലേഷ്യ, ബ്രസീൽ, മൗറീഷ്യസ്, നേപ്പാൾ, ശ്രീലങ്ക എന്നിവിടങ്ങളിൽനിന്നാണ് ജഡ്‌ജിമാരെത്തുന്നത്. ഭൂട്ടാൻ്റെയും കെനിയയുടെയും മൗറീഷ്യസിന്റെയും നേപ്പാളിൻ്റെയും ശ്രീലങ്കയുടെയും ചീഫ് ജസ്റ്റിസുമാർ പങ്കെടുക്കും. കുടുംബാംഗങ്ങളോടൊപ്പമാണ് മിക്കജഡ്ജിമാരും ചടങ്ങിനെത്തുക.

2019 മുതൽ സുപ്രീംകോടതിയിലുള്ള ജസ്റ്റിസ് സൂര്യകാന്ത് രാജ്യത്തിൻ്റെ 53-ാമത് ചീഫ് ജസ്റ്റിസായാണ് തിങ്കളാഴ്‌ച സ്ഥാനമേൽക്കുന്നത്. നേരത്തേ ഹിമാചൽപ്രദേശ് ഹൈക്കോടതിയുടെ ചീഫ് ജസ്റ്റിസായിരുന്നു. നിലവിലെ ചീഫ് ജസ്റ്റിസ് ബി.ആർ. ഗവായ് ഞായറാഴ്‌ച വിരമിക്കും.