ഡൽഹിയിൽ വായുമലിനീകരണം അതിരൂക്ഷം; പല സ്ഥലങ്ങളും 'ഗുരുതര' വിഭാഗത്തിൽ

ന്യൂഡൽഹി: രാജ്യതലസ്ഥാനത്തെ വായുമലിനീകരണം അതിരൂക്ഷമായി തുടരുന്നു. കേന്ദ്ര മലിനീകരണ നിയന്ത്രണ ബോർഡിൻ്റെ (ഡിപിസിസി) കണക്കനുസരിച്ച് ഡൽഹിയിലെ വിവിധ മേഖലകൾ 'ഗുരുതര' വിഭാഗത്തിലായി. നഗരത്തിലെ ശരാശരി വായുനിലവാരം 'വളരെ മോശം' വിഭാഗത്തിലാണെന്നും കണക്കുകൾ പറയുന്നു. ശൈത്യകാലമായതോടെ കുറച്ചുദിവസമായി വായുനിലവാര സൂചിക കൂപ്പുകുത്തുകയാണ്. വരുംദിവസങ്ങളിലും അതു തുടരുമെന്ന് മുന്നറിയിപ്പുണ്ട്.

ഇതോടെ ഡൽഹിയിലെ സർക്കാർ ഓഫീസുകളുടെ പ്രവർത്തനസമയം രാവിലെ 10 മുതൽ വൈകീട്ട് 6.30 വരെയും മുനിസിപ്പൽ കോർപ്പറേഷൻ ഓഫീസുകൾ രാവിലെ 8.30 മുതൽ വൈകീട്ട് അഞ്ചുവരെയും ആക്കി. രാവിലെയും വൈകീട്ടും ഒരേസമയം റോഡിലുണ്ടാകുന്ന വാഹനഗതാഗതം കുറയ്ക്കുകയും അതുവഴി മലിനീകരണം കുറയ്ക്കുകയുമാണ് ലക്ഷ്യം.

എന്നാൽ, കഴിഞ്ഞവർഷത്തെ അപേക്ഷിച്ച് ഇക്കൊല്ലം നവംബറിലെ വായുനിലവാരം മെച്ചമാണെന്ന് ഡിപിസിസി പറയുന്നു.