യുഎസ് ഉപരോധം: റഷ്യൻ എണ്ണയ്ക്ക് പകരക്കാരെ തേടി ഇന്ത്യ

കൊച്ചി: റഷ്യയിലെ പ്രധാന എണ്ണക്കമ്പനികളായ റോസ്നെഫ്റ്റിനും ലൂക്കോയിലിനും യുഎസ് ഉപരോധം ഏർപ്പെടുത്തിയതോടെ ബദൽ മാർഗം തേടി ഇന്ത്യൻ കമ്പനികൾ. പശ്ചിമേഷ്യ, ലാറ്റിനമേരിക്ക, യുഎസ് എന്നീ സ്രോതസ്സുകളിൽ നിന്ന് ക്രൂഡ് ഓയിൽ വാങ്ങൽ വർധിപ്പിക്കാനാണ് സാധ്യത.

ഒക്ടോബർ 22-നാണ് യുഎസ് സർക്കാർ, റഷ്യൻ ക്രൂഡോയിൽ ഉത്‌പാദകർക്ക് ഉപരോധം ഏർപ്പെടുത്തിയത്. നിലവിൽ ഇന്ത്യയുടെ ക്രൂഡ് ഇറക്കുമതിയുടെ ഏകദേശം മൂന്നിലൊന്ന് വിതരണം ചെയ്യുന്നത് റഷ്യയാണ്. 2025-ൽ ഇത് പ്രതിദിനം ശരാശരി 17 ലക്ഷം ബാരൽ ആണ്. ഇതിൽ ഏകദേശം 12 ലക്ഷം ബാരലുകൾ നേരിട്ട് റോസ്നെഫ്റ്റിൽനിന്നും ലൂക്കോയിലിൽനിന്നുമാണ്. ഈ അളവിൽ ഭൂരിഭാഗവും വാങ്ങുന്നത് സ്വകാര്യ ശുദ്ധീകരണശാലകളായ റിലയൻസ് ഇൻഡസ്ട്രീസും നയാര എനർജിയുമാണ്. പൊതുമേഖലാ ശുദ്ധീകരണശാലകൾക്കും ചെറിയ വിഹിതം ലഭിക്കുന്നുണ്ട്. റഷ്യ വിട്ട് മറ്റു പ്രദേശങ്ങളിലേക്ക് പോകുമ്പോൾ ഇന്ത്യയുടെ എണ്ണ ഇറക്കുമതിച്ചെലവ് ഗണ്യമായി വർധിക്കാനാണ് സാധ്യത.