അലിഗഢ് വിസി നിയമനം ചോദ്യംചെയ്യുന്ന ഹർജി തള്ളി സുപ്രീംകോടതി

ന്യൂഡൽഹി: അലിഗഢ് മുസ്‌ലിം സർവകലാശാലാ വൈസ് ചാൻസലറായി

പ്രൊഫ. നൈമാ ഖാത്തൂനിനെ നിയമിച്ചത് ചോദ്യം ചെയ്യുന്ന ഹർജി പരിഗണിക്കാൻ വിസമ്മതിച്ച് സൂപ്രീംകോടതി. പ്രൊഫ. നൈമയെ നിയമിക്കാൻ തീരുമാനിച്ച എക്‌സിക്യൂട്ടീവ് കൗൺസിൽ യോഗത്തിൽ അന്ന് വിസിയായിരുന്ന ഭർത്താവ് പ്രൊഫ. മുഹമ്മദ് ഗുൽറേസുമുണ്ടായിരുന്നെന്ന് ചൂണ്ടിക്കാട്ടിയുള്ള ഹർജിയാണ് പരിഗണിക്കാൻ വിസമ്മതിച്ചത്.

അലിഗഢ് സർവകലാശാലയുടെ ആദ്യ വനിതാ വിസിയായി പ്രൊഫ. നൈമയുടെ നിയമനം ശരിവെച്ച അലഹബാദ് ഹൈക്കോടതി വിധിക്കെതിരേ പ്രൊഫ. മുസഫർ ഉറൂജ് റബ്ബാനി, പ്രൊഫ. ഫൈസാൻ മുസ്‌തഫ എന്നിവരാണ് സുപ്രീംകോടതിയെ സമീപിച്ചത്.