പോലീസ് സ്റ്റേഷനുകളിൽ സിസിടിവി ക്യാമറകളില്ല; കേസെടുത്ത് സുപ്രീംകോടതി

ന്യൂഡൽഹി: പോലീസ് സ്റ്റേഷനുകളിൽ കാര്യക്ഷമമായി പ്രവർത്തിക്കുന്ന സിസിടിവി ക്യാമറകളുടെ അഭാവം സംബന്ധിച്ച വിഷയത്തിൽ സ്വമേധയ കേസെടുത്ത് സുപ്രീംകോടതി, പോലീസ് സ്റ്റേഷനിലെ മനുഷ്യാവകാശലംഘനങ്ങൾ തടയാൻ ലക്ഷ്യമിട്ടാണ് സിസിടിവി ക്യാമറകൾ സ്ഥാപിക്കാൻ 2018-ൽ സുപ്രീംകോടതി ഉത്തരവിട്ടത്. എന്നാൽ, കഴിഞ്ഞ എട്ടുമാസത്തിനിടെ രാജ്യത്ത് പോലീസ് കസ്റ്റഡിയിൽ 11 പേർ കൊല്ലപ്പെട്ടെന്ന മാധ്യമറിപ്പോർട്ട് പരിഗണിച്ചാണ് കേസെടുത്തത്.

പോലീസ് സ്റ്റേഷനുകൾക്ക് പുറമേ സിബിഐ, ഇഡി, എൻഐഎ ഓഫീസുകളിലും പരിസരത്തും സിസിടിവി ക്യാമറകൾ റെക്കോഡ് ചെയ്യാനുള്ള സംവിധാനങ്ങൾ ഏർപ്പെടുത്തണമെന്ന് 2020 ഡിസംബറിൽ സുപ്രീംകോടതി ഉത്തരവിട്ടിരുന്നു.