ട്രംപിന്റെ തീരുവ; പെപ്‌സിയും കോക്കും ബഹിഷ്കരിക്കാൻ തമിഴ്‌നാട്ടിലെ ഹോട്ടലുകൾ

ചെന്നൈ: അധികതീരുവ ഏർപ്പെടുത്തിയ യുഎസ് നടപടിയിൽ പ്രതിഷേധിച്ച് പെപ്സിയും കൊക്കകോളയും ബഹിഷ്‌കരിക്കാനൊരുങ്ങി തമിഴ്‌നാട്ടിലെ ഹോട്ടലുകൾ. അമേരിക്കൻ ഭക്ഷണ ഉത്പന്നങ്ങൾ ബഹിഷ്‌കരിക്കാൻ തങ്ങൾ തീരുമാനിച്ചതായി തമിഴ്‌നാട് ഹോട്ടൽ ഓണേഴ്‌സ് അസോസിയേഷൻ പ്രസിഡന്റ് വെങ്കട സുബ്ബു അറിയിച്ചു.

പെപ്സി, കൊക്കകോള, കെഎഫ്‌സി തുടങ്ങിയ അമേരിക്കൻ ഉത്പന്നങ്ങളും അവരുടെ മറ്റു പാനീയബ്രാൻഡുകളും ബഹിഷ്‌കരിക്കും. പകരം ഇന്ത്യൻ ഉത്പന്നങ്ങൾക്ക് മുൻഗണന നൽകും. സ്വിഗ്ഗി സൊമാറ്റോ പോലുള്ള ഭക്ഷണവിതരണ കമ്പനികളെയും ബഹിഷ്‌കരിക്കാനാണ് തീരുമാനം. തമിഴ്നാട്ടിൽനിന്ന് ഭക്ഷണവിതരണത്തിനായി പുതിയ ആപ്പ് അവതരിപ്പിക്കും. സ്വിഗ്ഗിയിലും സൊമാറ്റോയിലുമൊക്കെ ജോലിചെയ്യുന്നവർക്ക് ഈ ആപ്പിൽ ജോലിചെയ്യാൻ അവസരമൊരുക്കുമെന്നും സംഘടന വ്യക്തമാക്കി.