റാലിയില്ല; വോട്ടർ അധികാർ യാത്ര പദയാത്രയോടെ സമാപിക്കും

ന്യൂഡൽഹി: ബിഹാറിൽ കോൺഗ്രസ് നേതാവ് രാഹുൽഗാന്ധിയുടെ നേതൃത്വത്തിൽ നടത്തുന്ന 'വോട്ടർ അധികാർ യാത്ര'യുടെ സമാപനം നേതാക്കളുടെ റാലിയിൽനിന്ന് മാറ്റി പദയാത്രയാക്കി. സെപ്റ്റംബർ ഒന്നിന് പട്‌നയിലാണ് സമാപനം. റാലിയെക്കാൾ മഹാഗഡ്‌ബന്ധൻ സഖ്യനേതാക്കളുടെ പദയാത്രയാണ് ജനങ്ങൾക്കിടയിൽ കൂടുതൽ ആവേശം കൊള്ളിക്കുകയെന്ന നിഗമനത്തിലാണ് സമാപനച്ചടങ്ങിൽ മാറ്റം കൊണ്ടുവന്നതെന്ന് കോൺഗ്രസ് വൃത്തങ്ങൾ അറിയിച്ചു.

ഭൂരിഭാഗം ഇന്ത്യസഖ്യം നേതാക്കളും ഇതിനകം യാത്രയുടെ ഭാഗമായതിനാൽ എല്ലാവരെയും റാലിക്കായി ഒരിടത്ത് എത്തിക്കുന്നതിൽ കാര്യമില്ലെന്നാണ് വിലയിരുത്തൽ.

സെപ്റ്റംബർ ഒന്നിന് പട്‌നയിൽ മെഗാ റാലി നടത്തുമെന്നാണ് കോൺഗ്രസ് ജനറൽ സെക്രട്ടറി ഇൻ ചാർജ് കെ.സി. വേണുഗോപാൽ നേരത്തേ അറിയിച്ചിരുന്നത്.

ഓഗസ്റ്റ് 17-ന് തുടങ്ങിയ യാത്ര 1300 കിലോമീറ്ററുകൾ സഞ്ചരിച്ചാണ് പട്നയിൽ സമാപിക്കുക.