മഴക്കെടുതി: കേരളത്തിന് 153 കോടി

ന്യൂഡൽഹി: പ്രളയത്തിലും മണ്ണിടിച്ചിലിലും നാശമുണ്ടായ അസം, മണിപ്പുർ, മേഘാലയ, മിസോറം, ഉത്തരാഖണ്ഡ്, കേരളം എന്നീ സംസ്ഥാനങ്ങൾക്ക് 1066.8 കോടി രൂപ കേന്ദ്രം അനുവദിച്ചു. എൻഡിആർഎഫിന്റെയും സായുധസേനയുടെയും സേവനങ്ങൾക്ക് പുറമേയാണിത്.

കേരളം 153.2 കോടി, അസം 375.6 കോടി, മണിപ്പൂർ 29.2 കോടി, മേഘാലയ 30.4 കോടി, മിസോറം 22.8 കോടി, ഉത്തരാഖണ്ഡ് 455.6 കോടി എന്നിങ്ങനെയാണ് സംസ്ഥാന ദുരന്തനിവാരണഫണ്ടിന്റെ (എസ്‌ഡിആർഎഫ്) കേന്ദ്രവിഹിതമായി അനുവദിച്ചത്. ഈ വര്ഷം ഇതിനകം എസ്‌ഡിആർഎഫ്-എൻഡിആർഎഫ് ഫണ്ടിൽനിന്നായി 19 സംസ്ഥാനങ്ങൾക്ക് എണ്ണായിരം കോടി നൽകിയെന്ന് കേന്ദ്രം വ്യക്തമാക്കി.

ഇതിൽ 14 സംസ്ഥാനങ്ങൾക്ക് എസ്‌ഡിആർഎഫിൽനിന്ന് 6166 കോടി രൂപയും 12 സംസ്ഥാനങ്ങൾക്ക് എൻഡിആർഎഫിൽനിന്ന് 1988.91 കോടി രൂപയും അനുവദിച്ചു. സംസ്ഥാന ദുരന്തലഘൂകരണ ഫണ്ടിൽനിന്ന് (എസ്ഡിഎംഎഫ്) അഞ്ചുസംസ്ഥാനങ്ങൾക്ക് 726.2 കോടി രൂപയും ദേശീയ ദുരന്ത ലഘൂകരണഫണ്ടിൽനിന്ന് (എൻഡിഎംഎഫ്) രണ്ടുസംസ്ഥാനങ്ങൾക്ക് 17.55 കോടി രൂപയും കൈമാറി.