വിദ്വേഷപ്രസംഗം: വാക്കുകൊണ്ടുണ്ടായ മുറിവ് ഉണങ്ങില്ല -സുപ്രീംകോടതി

ന്യൂഡൽഹി: തീപ്പൊള്ളലേറ്റത് ഭേദമായാലും വാക്കുകൾകൊണ്ടുള്ള മുറിവ് ഉണങ്ങില്ലെന്ന് സുപ്രീംകോടതി. വിദ്വേഷപ്രസംഗം നമ്മളെ എവിടേക്കും നയിക്കില്ലെന്നും സുപ്രീംകോടതി പറഞ്ഞു. സാമൂഹികമാധ്യമ ഇൻഫ്ളുവൻസർ ശർമിഷ്ഠാ പാനോളിക്കെതിരേ പരാതി നൽകിയ വജാഹത്ത് ഖാൻ്റെ ഹർജി പരിഗണിക്കവേയാണ് ജസ്റ്റിസ് കെ.വി. വിശ്വനാഥൻ്റെ പരാമർശം.

കലാപാഹ്വാനം എല്ലായ്പ്പോഴും നേരിട്ടാകണമെന്നില്ല. വാക്കുകളിലൂടെയും അതുണ്ടാകാം. വജാഹത്ത് ഖാൻ സാമൂഹികമാധ്യമങ്ങളിലൂടെ നടത്തിയ പരാമർശങ്ങൾ പരിശോധിച്ച ബെഞ്ച്, ഇതിനൊന്നും അഭിപ്രായസ്വാതന്ത്ര്യത്തിൻ്റെ സംരക്ഷണമുണ്ടാവില്ലെന്ന് വ്യക്തമാക്കി. വിദ്വേഷപ്രസംഗത്തിന് തനിക്കെതിരേ വിവിധ സംസ്ഥാനങ്ങളിൽ രജിസ്റ്റർചെയ്ത എഫ്ഐആറുകൾ ഒന്നിപ്പിക്കണമെന്ന ഖാന്റെ ഹർജിയിൽ സുപ്രീംകോടതി നോട്ടീസയച്ചു.

പശ്ചിമബംഗാളിൽ ഫയൽചെയ്‌ത കേസിൽ ഖാൻ ഇപ്പോൾ കസ്റ്റഡിയിലാണ്. മറ്റ് സംസ്ഥാനങ്ങളിലെ കേസുകളിൽ ഖാനെ അറസ്റ്റുചെയ്യുന്നത് കോടതി താത്കാലികമായി തടഞ്ഞു. ഓപ്പറേഷൻ സിന്ദൂറുമായി ബന്ധപ്പെട്ട് സാമൂഹികമാധ്യമങ്ങളിൽ വിദ്വേഷപരാമർശം നടത്തിയതിന് ശർമിഷ്ഠയെ ബംഗാൾപോലീസ് അറസ്റ്റുചെയ്‌തിരുന്നു. ശർമിഷ്‌ഠയ്ക്ക് പിന്നീട് ജാമ്യം ലഭിച്ചു. വജാഹത്ത് ഖാനായിരുന്നു ശർമിഷ്‌ഠയ്ക്കെ‌തിരേ മുഖ്യപരാതിക്കാരൻ.