പാക് പൗരർക്കുള്ള സമയപരിധി ഇന്ന് അവസാനിക്കും

ന്യൂഡൽഹി: സാർക്ക് വിസയിലുള്ള പാക് പൗരർക്ക് ഇന്ത്യ വിട്ടുപോകാനുള്ള സമയപരിധി ഞായറാഴ്‌ച അവസാനിക്കും. ഇന്ത്യ വിട്ടുപോകാൻ കേന്ദ്രസർക്കാർ അന്ത്യശാസനം നൽകിയതോടെ രണ്ടുദിവസമായി വാഗാ-അട്ടാരി അതിർത്തിയിൽ മടങ്ങാനെത്തുന്നവരുടെ വൻതിരക്കാണ്. 229 പാകിസ്താനി പൗരൻ ഇതിനകം ഇന്ത്യവിട്ടു. പാകിസ്‌താനിലായിരുന്ന 392 ഇന്ത്യക്കാർ തിരിച്ചെത്തി. ഇന്ത്യയിലുള്ള ബന്ധുക്കളെ കാണാനും വിവാഹച്ചടങ്ങുകളിൽ പങ്കെടുക്കാനും മറ്റുമായി 45 ദിവസത്തെ വിസയിലെത്തിയവരാണ് മിക്ക പാക് പൗരരും. ചടങ്ങുകളിൽ പങ്കെടുക്കാനാവാതെയാണ് പലരുടെയും മടക്കം.

14 പ്രാദേശിക ഭീകരവാദികളുടെ പട്ടിക പുറത്തുവിട്ടു

ജമ്മു-കശ്മീരിൽ സജീവമായി പ്രവർത്തിക്കുന്ന 14 പ്രാദേശികഭീകരരുടെ പട്ടിക രഹസ്യാന്വേഷണ ഏജൻസികൾ ശനിയാഴ്ച്‌ച പുറത്തുവിട്ടു. 20-നും 40-നുമിടയ്ക്ക് പ്രായമുള്ളവരാണിവർ. മൂന്നുപേർ ഹിസ്ബുൾ മുജാഹിദ്ദിൻ്റെയും എട്ടുപേർ ലഷ്‌കറെ തൊയ്ബയുടെയും മൂന്നുപേർ ജയ്ഷെ മുഹമ്മദിന്റെയും പ്രവർത്തകരാണ്. പാകിസ്‌താനിൽനിന്നുള്ള ഭീകരവാദികൾക്കാവശ്യമായ പ്രാദേശികസഹായങ്ങളും നൽകുന്നത് ഇവരാണെന്ന് വാർത്താ ഏജൻസിയായ എഎൻഐ റിപ്പോർട്ട് ചെയ്തു.