ഉറുദു ഇന്ത്യയിൽ ജനിച്ച ഭാഷ, ഏതെങ്കിലും മതവുമായി കൂട്ടിക്കെട്ടേണ്ടതില്ല -സുപ്രീംകോടതി

ന്യൂഡൽഹി: ഉറുദു ഇന്ത്യയിൽ ജനിച്ച ഭാഷയാണെന്നും അതിനെ ഏതെങ്കിലും മതവുമായി കൂട്ടിക്കെട്ടേണ്ടതില്ലെന്നും സുപ്രീംകോടതി. മഹാരാഷ്ട്രയിലെ ഉറുദുവിലുള്ള സൂചകബോർഡുകൾ നീക്കണമെന്ന ഹർജി തള്ളിയാണ് ജസ്റ്റിസ് സുധാംശു ധൂലിയ അധ്യക്ഷനായ ബെഞ്ചിൻ്റെ നിരീക്ഷണം. ഉറുദുവിനും മറാഠിക്കും ഭരണഘടനയിൽ ഒരേ സ്ഥാനമാണ്. മറാഠി മാത്രമേ ബോർഡുകളിൽ പാടുള്ളൂവെന്ന വാദം അംഗീകരിക്കാനാവില്ലെന്നും മുൻ കൗൺസിലർ വർഷാതായ് സഞ്ജയ് ബഗാഡെയുടെ ഹർജി തള്ളി സുപ്രീംകോടതി വ്യക്തമാക്കി.

ഹിന്ദിക്ക് സംസ്കൃതവുമായും ഉറുദുവിന് പേർഷ്യനുമായുമാണ് കൂടുതൽ സാമ്യം. ഹിന്ദിയെ ഹിന്ദുക്കളുടേതും ഉറുദുവിനെ മുസ്‌ലീങ്ങളുടേതുമെന്ന നിലയിൽ കൊളോണിയൽ ശക്തികൾ വിഭജനത്തിനായി ഉപയോഗിച്ചിരുന്നു. മറാഠിയും ഹിന്ദിയും പോലെ ഉറുദുവും ഈ ഭൂമിയിൽ ജനിച്ച ഇന്തോ-ആര്യൻ ഭാഷയാണെന്ന് കോടതി ചൂണ്ടിക്കാട്ടി.