എഐസിസി സമ്മേളനം അഹമ്മദാബാദിൽ നാളെ തുടങ്ങും

ന്യൂഡൽഹി: നീതിയുടെ വഴി, സമർപ്പണം, പ്രതിജ്ഞ, പോരാട്ടം എന്നീ മുദ്രാവാക്യങ്ങളിലൂന്നി എഐസിസിയുടെ പ്രത്യേക സമ്മേളനം അഹമ്മദാബാദിലെ സാബർമതി തീരത്ത് ചൊവ്വാഴ്‌ച തുടങ്ങും. സർദാർ വല്ലഭ്ഭായ് പട്ടേൽ സ്‌മാരകത്തിൽ വിപുലീകൃത പ്രവർത്തകസമിതി യോഗം ചേരും. എഐസിസി അധ്യക്ഷനായി മഹാത്മാഗാന്ധി ചുമതലയേറ്റതിന്റെ നൂറാംവാർഷികവും പട്ടേലിൻ്റെ നൂറ്റൻപതാം ജന്മവാർഷികവും ഒത്തുചേരുന്ന വേളയിലാണ് ഇരുവരുടെയും ജന്മസ്ഥലമായ അഹമ്മദാബാദിൽ സമ്മേളനം നടക്കുന്നത്.

പ്രവർത്തകസമിതി യോഗത്തിൽ സ്ഥിരാംഗങ്ങൾ, പ്രത്യേക ക്ഷണിതാക്കൾ, പിസിസി അധ്യക്ഷന്മാർ, മുഖ്യമന്ത്രിമാർ, ഉപമുഖ്യമന്ത്രിമാർ, നിയമസഭാ നേതാക്കൾ, കൗൺസിൽ നേതാക്കൾ, സെൻട്രൽ ഇലക്ഷൻ കമ്മിറ്റി അംഗങ്ങൾ തുടങ്ങിയവർ പങ്കെടുക്കും.