പ്രണയവർണ്ണങ്ങളുമായി ''ഏതം '' അഭ്രപാളിയിൽ

നാടകനടനും യുവതാരവുമായ സിദ്ധാർത്ഥ് രാജ്‌ ആണ് ഈ സിനിമയിലെ നായകൻ .യുവതാരം ശ്രാവണയാണ് നായിക .

ചിത്രീകരണം മാഹി ,വടകര ,കണ്ണൂർ ,ചെന്നൈ എന്നിവിടങ്ങളിൽ .മാഹി ചാലക്കരയിലെ പ്രമുഖ മാധ്യമ പ്രവർത്തകൻ ചാലക്കര പുരുഷു ,അജിത്കുമാർ ഒതയോത്ത് തുടങ്ങിയ ചിലരും പ്രമുഖ താരങ്ങൾക്കൊപ്പം ഈ ചിത്രത്തിൽ മുഖം കാണിക്കുന്നു .സ്‌കൂൾ ഓഫ് ഡ്രാമയിലെ ഒട്ടറെ നാടക കലാകാരന്മാരും ഈ ചിത്രത്തിൽ വേഷമിടുന്നു .

വടകരക്കടുത്ത് മേമുണ്ട മഠം നാഗക്ഷേത്രത്തിന് സമീപത്തുള്ള പ്രവീൺ ചന്ദ്രൻ മൂടാടിയുടെ വാസസ്ഥലം ഒരർത്ഥത്തിൽ ഒരു ചിത്രകലാ സങ്കേതം കൂടിയാണ് .

കലയെ സ്നേഹിക്കുന്നവർ ,ചിത്രകാരന്മാർ ,നാടകരചയിതാക്കൾ ,പാട്ടെഴുത്തുകാർ ,നർത്തകർ ,ഗായകർ ,സിനിമാ പ്രവർത്തകർ തുടങ്ങിയവർക്കൊക്കെ കൂട്ടുകൂടാനും ഒത്തുചേരാനും കലാസൃഷ്ടികൾ പ്രദർ ശിപ്പിക്കാനും വിമർശിക്കാനും വിലയിരുത്താനും അനുമോദിക്കാനുമെല്ലാം അനുയോജ്യവും അനുകൂലവുമായ വേറിട്ടൊരിടം .

 കേരളത്തിലെ ഒട്ടുമിക്ക നാടകങ്ങളുടെയും അരങ്ങുണരുന്നത് ഇവിടെയാണ് .

മയ്യഴി കേന്ദ്രമായി പ്രവർത്തിക്കുന്ന മാഹി മലയാളകലാഗ്രാമവുമായി അകലാൻ വയ്യാത്ത ഒരാത്മബന്ധമാണ് പ്രവീൺ ചന്ദ്രൻ മൂടാടിക്കുള്ളത് . പൊക്കിൾക്കൊടിബന്ധം പോലെ .

വളർച്ചയുടെ പടവുകൾ ചവുട്ടിക്കയറിയതും ഇടമുറിയാത്ത സൗഹൃദങ്ങളിലൂടെ നിരവധി മഹദ് വ്യക്തിത്വങ്ങളുമായി കൂട്ടായ്‌മയുണ്ടാക്കാനും കലാഗ്രാമം അദ്ദേഹത്തെ ഏറെ സഹായിച്ചിട്ടുണ്ട് .കലാഗ്രാമത്തലെ പഠനകാലത്ത് ഒ .അജിത്കുമാറിൻറെ നേതൃത്വത്തിൽ നിരവധി നാടകങ്ങളിൽ വേഷമിട്ടുകൊണ്ട് കലാഗ്രാമത്തിൽ രംഗാവിഷ്‌ക്കാരം നടത്താനും ഈ അനുഗ്രഹീത കലാകാരന് അവസരം ലഭിച്ചിട്ടുണ്ട് .

കലാമൂല്യമുള്ള ചലച്ചിത്രങ്ങൾ കാണാനും ചർച്ചചെയ്യാനുമായി മയ്യഴിയിലെ മഹേഷ് മംഗലാട്ടിന്റെ നേതൃത്വത്തിൽ ചലച്ചിത്രപ്രേമികളുടെ കൂട്ടായ്‌മയിൽ രൂപീകൃതമായ ഫിലിം സൊസൈറ്റിയിലും സജീവസാന്നിദ്ധ്യമായിരുന്നു പ്രവീൺ ചന്ദ്രൻ മൂടാടി .

സിനിമയെ കൂടുതൽ അടുത്തറിയാനും അനുഭവിച്ചറിയാനും ഇടയായതും അങ്ങിനെ .

.അതുകൊണ്ടുതന്നെയാവാം മേമുണ്ടയിലും നന്മയുടെ നേർക്കാഴ്ച്ചപോലെ ഒരു കലാസങ്കേതം സ്ഥാപിക്കുക എന്ന മോഹം സദാ മനസ്സിൽ സൂക്ഷിക്കുകയാണ് ഈ ചെറുപ്പക്കാരൻ .

ഒരു സർ റിയലിസ്റ്റിക് ചിത്രകാരൻറെ കഥ എന്നപേരിൽ പ്രവീൺ ചന്ദ്രൻറെ ഒരു കഥാസമാഹാരം കറന്റ് ബുക്ക്സ് നേരത്തെ പ്രസിദ്ധീകരിച്ചിട്ടുണ്ട് ,

സിനിമാ നിർമ്മാണത്തിരക്കിലും രണ്ടാമത്തെ കഥാ സമാഹാരത്തിന്റെ പണിപ്പുരയിലാണിദ്ദേഹം .കൂട്ടത്തിൽ ഡൽഹിയിൽ ചിത്രപ്രദർശനം നടത്താനുള്ള മുന്നൊരുക്കത്തിലുമാണ് ഈ ചിത്രകാരൻ . 

ജെ ആർ പ്രസാദിന്റെ നേതൃത്വത്തിലുള്ള അല ഫിലിം സൊസൈറ്റിയുമായി ചേർന്ന് പ്രവർത്തിച്ചശേഷമാണ് ഇദ്ദേഹം സിനിമയെ ഗൗരവമായതോതിൽ നോക്കിക്കാണാൻ തുടങ്ങിയതും സിനിമയോട് തീവ്രമായ അടുപ്പം തോന്നിത്തുടങ്ങിയതും .

അലയുടെ അവാർഡ് നൈറ്റ് അതിനൊരു തുടക്കമായിരുന്നു .സംവിധായകൻ ഹരിഹരനെ പരിചയപ്പെടുന്ന ശുഭമുഹൂർത്തവും അന്നായിരുന്നു .

പഴശ്ശിരാജയിൽ പ്രവർത്തിക്കുമ്പോഴാണ് എം ടി വാസുദേവൻ നായരെ പരിചയപ്പെടാൻ ഭാഗ്യമുണ്ടായത്

തുടർന്ന് എം .ടി . ഹരിഹരൻ ടീമിന്റെ ചീഫ് അസിസ്റ്റൻഡ് ഡയറക്റ്റർ പദവിയിൽ .

സ്വന്തം നിലയിൽ സംവിധാനം നിർവ്വഹിച്ച ഏതം എന്ന സിനിമ റിലീസിന് മുൻപ് ഗുരുസ്ഥാനീയരായ എം ടി വാസുദേവൻ നായരുടേയും ഹരിഹരൻറെയും മുൻപിൽ ആദ്യ പ്രേക്ഷകരെന്ന നിലയിൽ പ്രദർശിപ്പിക്കണമെന്നും പ്രവീൺ ആഗ്രഹിക്കുന്നതായി പറഞ്ഞു .

ഈ ചിത്രത്തിനുവേണ്ടി ഗാനരചനനടത്തിയത് ശിവദാസ് പുറമേരി ,സംഗീതം പ്രേംകുമാർ വടകര , ഛായാഗ്രഹണം ജയപ്രകാശ് എം .എഡിറ്റിങ് വിജീഷ് ബാലകൃഷ്ണൻ ,കലാസംവിധാനം ധർമ്മരാജ് താനൂർ ,പ്രൊഡക്ഷൻ കൺട്രോളർ മുജീബ് ഒറ്റപ്പാലം ,ചമയം മണികണ്ഠൻ മരത്താക്കര ,വസ്ത്രാലങ്കാരം സുകേഷ് താനൂർ.

കവി,അധ്യാപകൻ ഒപ്പം സാഹിത്യസാംസ്‌കാരിക രംഗത്തെ അതുല്യപ്രതിഭയും വേറിട്ട വ്യക്തിത്വവുമായ മൂടാടിദാമോദരൻറെ മകനാവാൻ ഭാഗ്യം സിദ്ധിച്ച പ്രവീൺ ചന്ദ്രൻ മൂടാടിയെ പാരമ്പര്യത്തിന്റെ കരുത്തും കർമ്മ ബന്ധങ്ങളുമാണ് തളരാതെ മുന്നോട്ടു നയിക്കുന്നതെന്ന് വ്യക്തം .

മാതൃഭൂമി സ്റ്റഡി സർക്കിളിൻറെ വടകര താലൂക്ക് മുൻ സെക്രട്ടറി കൂടിയാണിദ്ദേഹം 

പ്രകാശ് ബാരെ ,ഹരിത് ,എം ജി റോഷൻ ,അകം അശോകൻ തുടങ്ങിയ ഒട്ടേറെ നടീനടന്മാർ അഭിനേതാക്കളായ ഏതം സിനിമയുടെ കഥയും തിരക്കഥയും സംവിധാനവും നിർവ്വഹിച്ച ചിത്രകാരനും എഴുത്തുകാരനുമായ സിനിമാക്കാരനെ മലയാളികൾ നെഞ്ചിലേറ്റാതിരിക്കില്ല തീർച്ച .