ആറ് ഭാഷകളിൽ ചാലിട്ടൊഴുകുകയാണ് , ശ്രീധരൻ മാഷിന്റെ പ്രസംഗ ധോരണി ;ചാലക്കര പുരുഷു

മാഹി:"പ്രിയ പാഠകാ: സാദരം നമസ്കാര:ഭോ സജ്ജനാ:ശ്രൂയതാം മമ വചനം...."

ഒഴുക്കാർന്ന സംസ്കൃതത്തിൽ പള്ളൂർ സ്വദേശി കുന്നുമ്മൽ ശ്രീധരൻ മാഷ് സംസാരിച്ചുതുടങ്ങുകയാണ്.

വേദി എന്തായാലും വിഷയമേതായാലും ഭാഷകളുടെ പരിമിതിയില്ലാതെ ശ്രീധരൻ മാഷിന് അയത്നലളിതമായി ഒഴുക്കോടെ സംസാരിക്കാനാവും. പുരാണകൃതികളെ ആസ്പദമാക്കി സംസ്കൃതത്തിലും, ഭാരതിയ സംസ്കൃതിയെക്കുറിച്ച് ഹിന്ദിയിലും, ശാസ്ത്ര സാങ്കേതിക രംഗത്തെക്കുറിച്ച് ഇംഗ്ലീഷിലും, മാതൃഭാഷയുടെ മാധുര്യത്തെക്കുറിച്ച് മലയാളത്തിലും ,

ദ്രാവിഡ കലകളെക്കുറിച്ച് തമിഴിലും, കന്നടയിലുമെല്ലാം മാഷ് പ്രസംഗിക്കുമ്പോൾ , കേൾവിക്കാൻ സംഗീതം പോലെ കേട്ടിരുന്ന് പോകും. സ്വച്ഛമായൊഴുകുന്ന പുഴ പോലെ ആ വാക്കുകൾ ശ്രോതാക്കളുടെ ഹൃദയതടങ്ങളിലൂടെ ഒഴുകിക്കൊണ്ടിരിക്കുകയാണ്. ആർജ്ജിതമായ ജ്ഞാനമത്രയും നൂറുകണക്കിന് ശിഷ്യരിലേക്കും ജനങ്ങളിലേക്കും പകർന്നേകാനുള്ള ഭാഷാതീതമായഈ അദ്ധ്യാപകന്റെ മിടുക്ക് ഒന്ന് വേറെ തന്നെയാണ്.

സപ്ത ഭാഷകളുടെ നാടായ കാസർകോട്ട് ദീർഘകാലം അദ്ധ്യാപകനായി ജോലി ചെയ്തത് ബഹു ഭാഷകളെ തൊട്ടറിയാൻ അവസരമൊരുക്കി. പരന്ന വായനയിലൂടേയും, തീഷ്ണമായ അനുഭവങ്ങളിലൂടേയും, നിരന്തര സാധനകളിലൂടേയും സ്വായത്തമാക്കിയ അറിവിനെ ,തന്റെ സവിശേഷമായ അവതരണത്തിലൂടെ മാഷ് മൂർച്ഛയേറ്റുകയാണ്. ശ്രീധരൻ മാഷിന്റെ വാക്കും, നോക്കും, ആശയങ്ങളുമെല്ലാം സാംസ്ക്കാരിക ഔന്നത്യം പുലർത്തുന്നവയാണ്. വാക്കുകൾ കേവലം ശബ്ദങ്ങളല്ലെന്നും, അവ ചലനാത്മകമായ ഊർജ്ജമാണെന്നും സദസ്സിനെ ബോധ്യപ്പെടുത്താൻ മാഷിന് സാധിക്കുന്നു.

ശ്രീധരൻ ബർമ്മയിലാണ് ജനിച്ചത്. 

മാതൃഭൂമി ആഴ്ചപ്പതിപ്പ് ഉപയോഗിച്ച്അമ്മയാണ് മലയാളം പഠിപ്പിച്ചത്. 

പീ. കെ. കൃഷ്ണൻ്റെ കലണ്ടർ നോക്കിയും മലയാളം പഠിച്ചു. 

വീട്ടിനടുത്തുള്ള തമിഴരുടെ പിള്ളയാർ കോവിലിലെ നിശാപാഠശാലയിൽ നിന്ന് തമിഴും പഠിച്ചു. സെന്റ് ആന്റണീസ് ബോയ്സ് ഹൈസ്ളിലാണ്

ആദ്യമായി ഇംഗ്ലീഷിൽ പ്രസംഗിക്കാൻ അവസരം ലഭിച്ചത്. 

മാഹി മഹാത്മാഗാന്ധി ഗവ. കോളേജിൽ നിന്ന് ബി. ഏ. പാസ്സായി. 

തലശ്ശേരി യൂനിവേഴ്സിറ്റി സെന്ററിൽ എം. എ. കോഴ്സ്പൂർത്തിയാക്കി

മൈസൂർ രാമകൃഷ്ണ ഇൻസ്റ്റിറ്റ്യൂട്ട് ഓഫ് മോറൽആന്റ്സ്പിരിച്വൽ എഡ്യൂക്കേഷനിൽ നിന്ന് ബി. എഡ്. ഡിഗ്രിയും സംസ്കൃതം ഭാഷയും പഠിച്ചു. 

കോഴിക്കോട് ശ്രീശൈലം സത്യസന്ധമായി സീനിയർ സെക്കൻഡറി സ്കൂളിൽ ഒരു വർഷം സേവനം ചെയ്തു. 

കാസർകോട് ബോവിക്കാനം ഏ. യൂ. പി. സ്കൂളിൽ നിന്ന് അദ്ധാപകവൃത്തിയിൽ നിന്ന് വിരമിച്ചു. 

തലശ്ശേരി തിരുവങ്ങാട് ശ്രീ സുബ്രഹ്മണ്യ ക്ഷേത്രത്തിൽ സൂര്യ കിരൺ സംസ്കൃതം ഭാഷആകർഷണകേന്ദ്രം തുടങ്ങി. ഭൗതികവും

ആദ്ധ്യാത്മികവുമായ വിഷയങ്ങളിൽ പ്രഭാഷണം നടത്തിവരുന്നു.

മൂന്ന് പുസ്തകങ്ങൾ പ്രസിദ്ധീകരിച്ചിട്ടുണ്ട്. 

പള്ളൂർ ഹൈസ്കൂളിൽ വിദ്യാർത്ഥിയായിരിക്കുമ്പോൾ , പിതാവിൻ്റെ പേരിലുള്ള ശാശ്വത പൂജയുടെ പ്രസാദം വാങ്ങാൻ ജഗന്നാഥ ക്ഷേത്രത്തിൽ പോയപ്പോൾ ശാന്തി മഠത്തിൻ്റെ വരാന്തയിൽ ഒരു വന്ദ്യവയോധികൻ സംസ്കൃതം പഠിപ്പിക്കുന്നത് കണ്ടു. 

ജഗന്നാഥനെ ഇന്ത്യയിൽ ഹിന്ദുക്കളേ അറിയൂ. അദ്ദേഹം എങ്ങനെയാണ് ജഗന്നാഥനാവുക ? എന്ന് ശ്രീധരൻ സംശയം ചോദിച്ചു. 

സംസ്കൃതം പഠിക്കുക എന്നായിരുന്നു അദ്ദേഹത്തിൻ്റെ മറുപടി. 

അതുകൊണ്ടാണ് സംസ്കൃതം പഠിക്കാൻ പ്രചോദനമുണ്ടായത്. 

അദ്ദേഹം ഭക്തോത്തംസം ടി.വി. വസുമിത്രൻ എഞ്ചിനീയരുടെയും , വസുമതി ഡോക്ടരുടെയും പിതാവായ ശ്രീനാരായണഗുരുവിന്റെ അനുഗ്രഹം ലഭിച്ച വിദ്വാൻ കെ. ടി. കൃഷ്ണൻ ഗുരുക്കളായിരുന്നു. 

ബർമ്മീസ് അക്ഷരങ്ങൾ ശ്രീധരൻ മറന്നുപോയി. 

മാഹി മഹാത്മാഗാന്ധി കോളേജിൽ പഠിക്കുമ്പോൾ ദേശബന്ധു ചിത്തരഞ്ജൻ ദാസിനെ കുറിച്ച് പ്രസംഗമത്സരമു ണ്ടായിരുന്നു.ദേശബന്ധു ചിത്തരഞ്ജൻ ദാസ് ആരാണെന്ന് ശ്രീധരന് അറിയില്ലായിരുന്നു.

 ആദ്യമായാണ് ആ പേര് കേൾക്കുന്നത് തന്നെ.

അദ്ദേഹം സ്വാതന്ത്ര്യ സമര സേനാനിയാണ് എന്ന്മാത്രം പറഞ്ഞ് ആദരാഞ്ജലികളർപ്പിച്ച് അവിടെ കോളജ് യുണിയൻചെയർമാനായിരുന്ന കോടിയേരി ബാലകൃഷ്ണൻ പ്രസംഗം അവസാനിപ്പിക്കുകയായിരുന്നു. 

 ശ്രീധരനാകട്ടെ , കപടപ്രസംഗമാണ് നടത്തിയത്. !

ഹിമാലയത്തിൽ നിന്ന് ഒരു കല്ല് എടുത്ത് ഇതാണ് ഹിമാലയം എന്ന് പറഞ്ഞാൽ ശരിയാവില്ലെന്നും,

ദേശബന്ധു ചിത്തരഞ്ജൻ ദാസ് ഒരു പ്രസ്ഥാനമായിരുന്നുവെന്ന് തുടങ്ങി  ജാലിയൻ വാലാബാഗിനെക്കുറിച്ചടക്കം സുദീർഘമായി സംസാരിച്ചു. അറിയാ വിഷയത്തെക്കുറിച്ചുള്ള പ്രസംഗത്തിന്ശ്രീധരന് ഒന്നാം സമ്മാനവും കിട്ടി ! വിഷയത്തിൽ നിന്ന് വ്യതിചലിച്ചു എന്ന് അവിടെ അദ്ധ്യാപകനായിരുന്ന പ്രശസ്ത നിരൂപകൻ കൂടിയായ മോഹനൻ ചെറുകാട് ചിരിച്ചു കൊണ്ട് പറഞ്ഞു.

പള്ളുർ ഹൈസ്കൂളിൽ ആറാം ക്ലാസ്സിൽ പഠിക്കുമ്പോൾ ബഹുമുഖപ്രതിഭയായപി. ഏ. കരുണാകരൻ മാസ്റ്റരാണ്ശ്രീധരനെ പ്രാസംഗികനാക്കിയത്.

ഏഴാം ക്ലാസ്സിൽ പഠിക്കുമ്പോൾ നവംബർ 14 ന് നെഹ്രു വേഷത്തിൽ സ്റ്റേജിൽ ഇരുന്നു. 

അദ്ധ്യാപകനുള്ള ഒരു യാത്രയയപ്പ് കൂടിയുളള യോഗത്തിൽ ഹൃദയാർദ്രമായി വിഷയമവതരിപ്പത് പരക്കെശ്ലാഘിക്കപ്പെട്ടു.

നാണു മാസ്റ്ററും അബ്ദുള്ള മാസ്റ്ററും ഒരുമിച്ച് സ്ഥലം മാറ്റപ്പെടുമ്പോൾ, മറയാൻ പോകുന്ന മഴവില്ലിൻ്റെ രണ്ട് അറ്റങ്ങളും നോക്കി പരിതപിക്കുന്ന കാർമ്മേഘങ്ങളേ എന്ന് സംബോധന ചെയ്തുകൊണ്ടായിരുന്നു ശ്രീധരൻ പ്രസംഗം തുടങ്ങിയതു തന്നെ.

ഹെഡ്മാസ്റ്റർ വിജയരാഘവൻ മാസ്റ്റർ രാജി വെച്ച് ആഫ്റിക്കയിലേക്ക് പോകുമ്പോൾപ്രസംഗിച്ചത്ഇന്നലെയെന്നപോൽ ശ്രീധരൻ ഓർക്കുന്നു.

"വിജ്ഞാനത്തിൻ്റെ ദീപശിഖയുമായി അദ്ദേഹം ഇരുണ്ട ഭൂഖണ്ഡത്തിലേക്ക് പോവുകയാണ്. 

വിജ്ഞാനഗംഗയുടെ പോഷകനദിയായി അദ്ദേഹം വിക്ടോറിയ വെള്ളച്ചാട്ടത്തിൻ്റെ നാട്ടിലെത്തുകയാണ്"  

മറുപടി പ്രസംഗത്തിൽ വിജയരാഘവൻ മാസ്റ്റർ പറഞ്ഞു:

"ശ്രീധരൻ ഇരുണ്ട ഭൂഖണ്ഡം എന്ന് പറഞ്ഞത്പാഠപുസ്തകത്തിൽ നിന്ന് പഠിച്ചതായിരിക്കും. 

ഇന്ന് ആഫ്രിക്ക ഇരുണ്ട ഭൂഖണ്ഡമല്ല. മാംഗോ പാർക്ക് കണ്ടുപിടിച്ച കാലത്താണ് ആഫ്റിക്ക ഇരുണ്ട ഭൂഖണ്ഡം. 

ഇന്ന് വെളിച്ചമുണ്ട്. '

ഏതാനും മാസം മുമ്പ് മാഹികോളേജിൽ

തന്നെ പഠിപ്പിച്ച യതീന്ദ്രൻ മാസ്റ്റർ തലശ്ശേരിടൗണിൽവെച്ച് കണ്ടപ്പോൾ,ശ്രീധരൻ മുൻപ് കോളജിൽ പ്രസംഗിച്ച ഹിമാലയപർവതത്തിൽ നിന്ന് ഒരു കല്ല് എടുത്ത് ഇതാണ് ഹിമാലയം എന്ന് പറയുന്നത് ശരിയല്ല എന്നത് , ദശകങ്ങൾക്ക് ശേഷവും മറക്കാതെ ഓർമ്മിപ്പിച്ചു. 

മാഹി കോളേജിൽ പഠിക്കുമ്പോൾ ചതയാഘോഷത്തോടനുബന്ധിച്ച് ജഗന്നാഥ ക്ഷേത്രം നടത്തിയ പ്രസംഗമത്സരത്തിൽ സമ്മാനമായി പ്രൊഫസർ സാനു മാഷ് എഴുതിയ ശ്രീനാരായണ ഗുരുവിൻ്റെ ജീവചരിത്രവും , ഉപന്യാസ മത്സരത്തിൽ സ്വർണ്ണമെഡലും ലഭിച്ചതാണ് ഏറെ പ്രചോദിപ്പിച്ചത്. പിന്നീട് ജീവിത വഴികളിൽ ഗുരുവും, ശ്രീബുദ്ധനും വഴികാട്ടികളായി. 

ചാലക്കരയിലെ നവരംഗ് യങ്ങ് സ്റ്റേർസ് പോലെയുള്ള ഒരു സഹൃദയ സംഘം പള്ളൂരിൽ ഇല്ലാതിരുന്നത് തന്റെ കടുത്ത ദുഃഖമാണെന്ന് മാഷ് പറഞ്ഞു.

 വിദ്യാർത്ഥികൾ സ്റ്റോറി മാസ്റ്റരെന്നും, സാഹിത്യമെന്നുമൊക്കെയാണ് വിളിക്കുക പതിവ്.. ഭാരതരാമായണഭാഗവതകഥകൾ പറഞ്ഞുകൊടുക്കുന്നതാണ് കാരണം.

ശ്രീധരൻ എഴുതിയ ശ്രീബുദ്ധൻ മുതൽ ശ്രീനാരായണൻ വരെ എന്ന പുസ്തകത്തിന്, പ്രൊഫസർ ഏ. പി. സുബൈർ എഴുതിയ ആസ്വാദനക്കുറിപ്പിന്റെ തലക്കെട്ട് ശ്രീബുദ്ധനും ശ്രീനാരായണനും പിന്നെ നവനീതകൃഷ്ണനും എന്നായിരുന്നു. നവനിത കൃഷ്ണൻ എന്ന പേരിലാണ് ആനുകാലികങ്ങളിൽ തുടർച്ചയായി എഴുതിയിരുന്നത്.

പള്ളുർ ഗവ. ബ്രാഞ്ച് ലൈബ്രറി മാഷിന്റെ രണ്ടാംവീടായിരുന്നുവെന്ന്മാഷ്പറയുമായിരുന്നു.

പിന്നിട്ടജീവിത യാത്രയെക്കുറിച്ചുള്ള ചോദ്യത്തിന് ഉത്തരം

തമിഴിലായിരുന്നു ;

പുത്തകം താൻ എൻ സൊർഗ്ഗം..

ചിത്രവിവരണം: കുന്നുമ്മൽ ശ്രീധരൻ