ഇങ്ങിനേയും ഒരു മനുഷ്യൻ ഇതു വഴി കടന്നുപോയി... സി.എ. നായർ ഓർമ്മയായി :ചാലക്കര പുരുഷു

ഇങ്ങിനേയും ഒരു മനുഷ്യൻ ഇതു വഴി കടന്നുപോയി...

സി.എ. നായർ ഓർമ്മയായി

:ചാലക്കര പുരുഷു

ജ്ഞാനത്തിന്റേയും, ത്യാഗത്തിന്റേയും ആൾരൂപമായിരുന്ന സി.എ. നായർ എന്ന് നാട് ആദരപൂർവം വിളിച്ചിരുന്ന ചേലോട്ട് എടോളി അച്ചുതൻ നായർ വിടവാങ്ങി.

തൂവെള്ള മുടിയും, താടിയും നീട്ടി, നെറ്റിയിൽ ഭസ്മവും കുങ്കുമപ്പൊട്ടു മണിഞ്ഞ്, രുദ്രാക്ഷമാലയുമണിഞ്ഞ് ,കസവ് നേര്യതും പുതച്ച്, മായാത്ത പുഞ്ചിരിയുമായി വിനയാന്വിതനായി നിൽക്കുന്ന, ശിരസ്സിന് ചുറ്റിലും ഏതോ ഒരു ദിവ്യപ്രകാശം പ്രസരിക്കുമ്പോലെ തോന്നിക്കുന്ന ഈ മനുഷ്യൻ മാങ്ങോട്ടും കാവിലും ,പരിമഠം ക്ഷേത്രാങ്കണത്തിലും നിൽക്കുമ്പോൾ തന്നെ ജനങ്ങൾ അറിയാതെ കൈകൂപ്പി നിന്നു പോകും. അത്രമേൽ വ്യക്തി ചൈതന്യമുള്ള മനുഷ്യനാണിദ്ദേഹം. അറിയാത്തവരായി കൊച്ചു കുട്ടികൾ പോലുമില്ല ഈ നാട്ടിൽ. ആദ്ധ്യാത്മികതയും,ഭൗതികതയും ഒരു പോലെ ജ്വലിച്ചു നിന്ന ആ ചിന്താധാര നിലച്ചു. കാരുണ്യത്തിന്റേയും, സ്നേഹത്തിന്റെയും കണ്ണുകളടഞ്ഞു. ഐതിഹാസികമായ സ്വാതന്ത്ര്യ സമര പോരാട്ടത്തിലെ ഒടുവിലത്തേത് എന്ന് വിശേഷിപ്പിക്കാവുന്ന അഗ്നിതാരമണഞ്ഞു..

പരശുരാമനാൽ സ്ഥാപിതമായെന്ന് വിശ്വസിക്കപ്പെടുന്ന കടലിന്നഭിമുഖമായി നിലകൊളളുന്ന ചിര പുരാതനമായ പരിമഠം ശ്രീ ദുർഗ്ഗാ ക്ഷേത്രത്തിന്റെ പാരമ്പര്യ ട്രസ്റ്റി ബോർഡ് ചെയർമാനും, പ്രശസ്തമായ പെരിങ്ങാടി ശ്രീ മാങ്ങോട്ടും കാവ് ഭഗവതി ക്ഷേത്രത്തിന്റെ പാരമ്പര്യ ട്രസ്റ്റിയും, ചിറ്റാരിപ്പറമ്പ് കളരിക്കൽ പരദേവതാ ക്ഷേത്രത്തിന്റെ പാരമ്പര്യ ഊരാളനുമായിരുന്ന സി.എ. നായർ മഹത്തായ ഭാരതീയ ആദ്ധ്യാത്മിക ജ്ഞാന സംസ്കൃതിയുടെ താക്കോൽ സൂക്ഷിപ്പുകാരനായിരുന്നു.അവിസ്മരണീയമായ അനുഭവങ്ങളുടെയും, അവഗാഢമായ പാണ്ഡിത്യത്തിന്റേയും നിറകുടമായിരുന്നു ന്യൂമാഹിയുടെ തോജോഗോപുരമായി നിലകൊണ്ട ഈ മനുഷ്യൻ.രണ്ട് നൂറ്റാണ്ടുകളിലെ വിസ്മയകരമായ മാറ്റങ്ങളെ നേരിൽ കാണാനായ സുകൃത ജന്മം. പണ്ഡിത-പാരമ വ്യത്യാസമില്ലാതെ, വലുപ്പ ചെറുപ്പമില്ലാതെ, എല്ലാവരേയും ഒരുപോലെ ചേർത്തുപിടിക്കുന്ന ഈ മനുഷ്യൻ, നിസ്വാർത്ഥതയുടെ, ഹൃദയ വിശുദ്ധിയുടെ മൂർത്തിഭാവമായിരുന്നു.

ഉപനിഷത്തുകളുടേയും, വേദങ്ങളുടേയും

ജ്ഞാന രഹസ്യം തൊട്ടറിഞ്ഞ മഹാ പണ്ഡിതനായിരുന്നു.

ഉത്സവവേദികളിൽ, സാംസ്ക്കാരിക സദസ്സുകളിൽ, ജീവ കാരുണ്യ വീഥികളിൽ, നാടിൻ്റെ വികസനപഥങ്ങളിലെല്ലാം ഈ മനുഷ്യൻ എന്നും മുന്നിൽ നിന്നു .

 ജാതി മത രാഷ്ട്രീയത്തിന്നതീതമായി മനുഷ്യത്വത്തെ പ്രതിഷ്ഠിച്ച വലിയ മനസ്സിന്നുടമയായിരുന്നു.

ജീവിത രേഖയിലൂടെ

ന്യൂ മാഹി പെരിങ്ങാടി ജയലക്ഷ്മി ഭവനിലെ സി.എ. നായർ എന്ന ചേലോട്ട് എടോളി അച്ചുതൻ നായർ തൊണ്ണൂറ്റി ആറാം വയസ്സിലാണ് വിടവാങ്ങിയത്. ഒരു നൂറ്റാണ്ടിനോടടുക്കുന്ന തന്റെ ജീവിത സപര്യക്കിടയിൽ നാടിനും നാട്ടുകാർക്കും മാതൃകയായ നിരവധി കർമ്മപഥങ്ങളിലൂടെ അദ്ദേഹം കടന്നുപോയി.

​മേക്കപ്പുറത്ത് പുനത്തിൽ ഗോപാലൻ നായരുടെയും ചേലോട്ട് ഉമ്മു അമ്മയുടെയും മകനായി ജനിച്ച അദ്ദേഹം പരിമഠം, പെരിങ്ങാടി എൽ.പി സ്കൂളുകൾ, ന്യൂമാഹി എം.എം ഹൈസ്കൂൾ എന്നിവിടങ്ങളിൽ പ്രാഥമിക വിദ്യാഭ്യാസം പൂർത്തിയാക്കി, മാഹി ലബോർദന കോളേജിൽ ഉപരിപഠനം പൂർത്തിയാക്കി.

​വിമോചനപ്പോരാട്ടം

​നന്നെ ചെറുപ്പത്തിൽ തന്നെ

ഇന്ത്യൻ നാഷണൽ കോൺഗ്രസിന്റെ സജീവ പ്രവർത്തകനായി മാറിയ അദ്ദേഹം, കെ.കേളപ്പൻ, ഐ.കെ.കുമാരൻ മാസ്റ്റരടക്കമുള്ള പ്രമുഖ നേതാക്കളുടെ നിർദ്ദേശപ്രകാരം സ്വാതന്ത്ര്യ സമര പോരാട്ടങ്ങളിൽ സജീവമാവുകയായിരുന്നു. ഗാന്ധിജി, നെഹ്റു, ഇന്ദിരാഗാന്ധി തുടങ്ങിയ മഹാരഥന്മാരെ നേരിൽ കാണാനും ഭാഗ്യമുണ്ടായി.

​തന്റെ തൊഴിൽ ജീവിതത്തിൽ വൈവിധ്യങ്ങൾ പുലർത്തിയ വ്യക്തിത്വമായിരുന്നു അദ്ദേഹം:​ മദിരാശിയിലെ രാജപുരത്താണ് വ്യാപാരം ആരംഭിച്ചത്

എറണാകുളം ഷാലിമാർ കമ്പനിയിൽ 12 വർഷത്തോളം ഡിസ്ട്രിബ്യൂട്ടറായി സേവനമനുഷ്ഠിച്ചു.

സ്വാശ്രയത്വത്തിൻ്റെ വഴികാട്ടി

​ സ്വന്തമായി ബിസ്കറ്റ് ഫാക്ടറിയും, ചർക്കയിൽ നൂൽനൂൽക്കുന്ന നെയ്ത്തുശാലയും ഹാൻഡ്‌ലൂം യൂണിറ്റും നടത്തി സ്വാശ്രയത്വത്തിന്റെ മാതൃകയായി.

​പ്രവാസ ജീവിതം

1976 മുതൽ ഖത്തറിലെ ഒരു ബ്രിട്ടീഷ് സ്ഥാപനത്തിൽ ജോലി ചെയ്തു. 1988-ൽ പ്രവാസ ജീവിതം അവസാനിപ്പിച്ച് നാട്ടിൽ തിരിച്ചെത്തി.

​

കലകളും ആദ്ധ്യാത്മികതയും കെട്ടുപിണഞ്ഞ ജീവിതം

​കലകളെ നെഞ്ചേറ്റിയ അദ്ദേഹം വിവിധ ക്ലബ്ബുകളുടെ നാടകങ്ങളിൽ ശ്രദ്ധേയമായ വേഷങ്ങൾ ചെയ്തിട്ടുണ്ട്. സംഗീത-നൃത്തകലകളെ ഏറെ പരിപോഷിപ്പിച്ചു. ജീവിതത്തിന്റെ രണ്ടാം പകുതി അദ്ദേഹം പൂർണ്ണമായും ആധ്യാത്മികതയ്ക്കായി സമർപ്പിക്കുകയായിരുന്നു.

​ജീവിതം തന്നെ ഒരു തീർത്ഥാടനം

അമ്പത് വർഷത്തോളം തുടർച്ചയായി ശബരിമല ദർശനം നടത്തിയിട്ടുള്ള അദ്ദേഹം അയോദ്ധ്യ, കാശി, വാരണാസി, രാമേശ്വരം തുടങ്ങിയ പുണ്യകേന്ദ്രങ്ങളും പലവട്ടം സന്ദർശിച്ചു.

 ക്ഷേത്രങ്ങളിൽ ഗീതാ പാരായണവും രാമായണ പാരായണവും നടത്തിവന്നു.

ധന്യമായ കുടുംബ ജീവിതം

​25-ാം വയസ്സിലായിരുന്നു വിവാഹം. പുതിയെടത്ത് കുങ്കൻ നായരുടെയും മേക്കപ്പുറത്ത് മാധവി അമ്മയുടെയും മകളായ ലക്ഷ്മി അമ്മയാണ് സഹ ധർമ്മിണി

സഹോദരങ്ങള്‍: പരേതയായ ദേവു അമ്മ, പരേതയായ ചിന്നമ്മു അമ്മ, പരേതയായ മാധവന്‍ നയര്‍, പരേതയായ പത്മാവതി അമ്മ.

മക്കള്‍: ജയപാലന്‍, മല്ലിക മോഹന്‍, കാഞ്ചന രാമചന്ദ്രന്‍, ശ്രീനിവാസ് ചാത്തോത്ത്, ഉമ രവീന്ദ്രന്‍, അംബിക രാധാകൃഷ്ണന്‍.

മരുമക്കള്‍: മോഹനന്‍,രാമചന്ദ്രന്‍,

രവീന്ദ്രന്‍,രാധാകൃഷ്ണന്‍, അനിത ജയന്‍,സവിത ശ്രീനിവാസ്

നാട്ടുത്സവമായി മാറിയ നവതി

 2019-ൽ ഒരു നാട്ടുത്സവത്തിൻ്റെ പ്രതീതിയോടെ അദ്ദേഹത്തിന്റെ നവതി ആഘോഷിച്ചിരുന്നു.

​ഭാരതീയ സംസ്കാരത്തോടും മൂല്യങ്ങളോടും എന്നും വിശ്വസ്തത പുലർത്തിയ ആ ധന്യജീവിതം ഇനി മായാത്ത ഓർമ്മ ശിൽപ്പമായി നാടിന്റെ ഹൃദയ ഭിത്തികളിൽ കൊത്തിവെക്കപ്പെടും.