ജനാഭിലാഷത്തിൻ്റെ നാൾവഴികളിലേക്ക് ഒരു തിരനോട്ടം :ചാലക്കര പുരുഷു

തന്നെ പെറ്റു വളർത്തിയ സമൂഹത്തിൻ്റെ മോചനത്തിന് ആക്കം കൂട്ടുന്നതിന് വേണ്ടി ജനപക്ഷത്ത് നിലയുറപ്പിച്ച് 'ഭരണ സിരാ കേന്ദ്രങ്ങളിലും, പരമോന്നത നീതിപീഠത്തിന് മുന്നിലും നിരന്തരം പോരാടുന്ന ഒരു മനുഷ്യൻ മയ്യഴിയിലുണ്ട്. അഡ്വ: ടി.അശോക് കുമാർ എന്ന പേര് ഇന്ന് ഒരു വ്യക്തിയുടെ നാമമല്ല. ഒരു നാടിൻ്റെ പ്രതീകവും, പ്രതീക്ഷയും, വികാരവുമാണ്.

നന്മ ആര് ചെയ്താലും അംഗീകരിക്കാനും, തിൻമ ചെയ്തത് സ്വന്തക്കാരാണെങ്കിൽ പോലും ശക്തിയുക്തം വിമർശിക്കാനും, നീതിനിഷേധം ആര് നടത്തിയാലും താൻ ധരിച്ച കറുത്ത കോട്ടിൻ്റെ വിശുദ്ധിക്ക് ഒരു ചെറു കളങ്കം പോലും വീഴാത്ത വിധം നിയമസംരക്ഷണത്തിനായി ഏതറ്റം വരെ സ്വന്തം കൈയ്യിൽ നിന്ന് പണം ചിലവഴിച്ച് പോകാനും, പുതു തലമുറയെ വിദ്യാഭ്യാസ -കലാ-കായിക - കാർഷിക മേഖലകളിൽ പരിപോഷിപ്പിക്കാനും ഇദ്ദേഹം കാണിക്കുന്ന ഔത്സുക്യം ആരേയും വിസ്മയിപ്പിക്കും. കർത്തവ്യനിർവ്വഹണത്തിനുമപ്പുറം, അത് കൊട്ടിഘോഷിക്കാനോ ഊറ്റം കൊള്ളാനോ ഈ മനുഷ്യനെ കിട്ടില്ല. ജന സേവനം ജീവിത നിയോഗമായിക്കാണുന്ന ഈ അഭിഭാഷകന് പ്രഖ്യാപിത ശത്രുക്കളോ, മിത്രങ്ങളോ ഇല്ല. എല്ലാവരേയും ഒരു പോലെ കാണാനുള്ള മതേതര -രാഷ്ട്രീയ മനസ്സ് എന്നും ഈ മനുഷ്യൻകൊണ്ടു നടന്നു. മത-രാഷ്ട്രീയ ചിന്തകൾക്കുമപ്പുറം ഉദാത്തമായ മനുഷ്യസ്നേഹത്തിൽ ഊന്നി നിന്നുള്ള ഇദ്ദേഹത്തിൻ്റെ ഇടപെടലുകളിൽ സമർത്ഥനായ ഒരു രാഷട്രീയ മീമാംസകൻ്റെ മായികമായ സമീപനം കാണാം. ഫുട്ബാൾ കളിക്കളങ്ങളിൽ സ്പോട്സ് മേൻ സ്പിരിറ്റിൻ്റെ വശ്യത കാണാം.കോടതി മുറികളിൽ വാക്കുകളുടെ മൂർച്ച പ്രകടമാണ്. കൃഷിയിടങ്ങളിലാവട്ടെ, ഹരിതാഭമായ ഒരു മനസ്സിൻ്റെ കളിർമ്മ ദർശിക്കാം. സമരപഥങ്ങളിലാവട്ടെ പോരാട്ടങ്ങളുടെ കരുത്തും, സംഘാടക ൻ്റെ അസാധാരണമായ മെയ് വഴക്കവും കാണാം. അവശ ജനവിഭാഗങ്ങളോടുള്ള സഹജീവി സ്നേഹം പ്രായത്തിനുമപ്പുറം ഇരുത്തംവന്ന കർമ്മയോഗിയുടെ നിരയിലേക്ക് ഈ മനുഷ്യനെ ഉയർത്തി നിർത്തുന്നു.

ഗതകാല മയ്യഴിയുടെ ചരിത്ര വീഥികളിലൂടെ നടത്തിയ തീർത്ഥയാത്ര പോലെ വിശുദ്ധമായ ഓർമ്മകളും, അനുഭവസാക്ഷ്യങ്ങളും ഈ മനുഷ്യൻ നിറമാർന്ന മഷിയിൽ ഈ പൊതുപ്രവർത്തകൻ എഴുതി വെച്ചിരിക്കുന്നു. മയ്യഴിയുടെ മുൻകാല ചരിത്ര പുസ്തകങ്ങൾ പലതും രചിക്കപ്പെട്ടത് ഏകമുഖ കാഴ്ചപ്പാടിലൂടെയാണെന്ന് പറയാം. ആഴത്തിലുള്ള വായനയും, ചരിത്രാന്വേഷണങ്ങളും, തീഷ്ണമായ അനുഭവസാക്ഷ്യങ്ങളും, പക്ഷം ചേരാതെയുള്ള സാക്ഷ്യപ്പെടുത്തലുകളുമെല്ലാം ചേർന്ന് ടി.അശോക് കുമാറിനെ, ചരിത്രാന്വേഷണ വഴികളിലെ വെളിച്ചം പകരുന്ന വിളക്ക് മാടമായി മാറ്റിയിരിക്കുന്നു.

നീതിയുടെ, മൗലികാവകാശങ്ങളുടെ, വാതിലുകൾ എവിടെയൊക്കെ കൊട്ടിയടക്കപ്പെടുന്നുവോ, അവിടെയൊക്കെ നീതിയുടെ കാവലാളായി കറുത്ത ഗൗണിട്ട ഈ മനുഷ്യനുമുണ്ടാകും. രാഷ്ട്രീയക്കാരും, ഭരണകൂടവും എതിർ വശത്ത് നിൽക്കുമ്പോഴും, പരമോന്നത കോടതിയിലടക്കം ദശകങ്ങൾ നീണ്ട പോരാട്ടങ്ങൾക്കൊടുവിൽ മയ്യഴിക്കാർക്കായി അദ്ദേഹം നേടിയെടുത്ത ചരിത്ര വിധികൾ മയ്യഴിയുടെ സാമുഹ്യ ജീവിതത്തിന് ഈ മനുഷ്യൻ സമർപ്പിച്ച സുവർണ്ണ സമ്മാനങ്ങളാണ്.

വിഷയമെന്തായാലും, കഠിനമായ പഠനത്തിലൂടെ അതിൻറെ ആത്മാവ് തൊടുംവിധമുള്ള അവ തരണം, കോടതിക്കകത്തും പുറ ത്തും തളരാതെ പോരാടാനുള്ള നിശ്ചയദാർഢ്യം, മാറുന്ന കാലത്തോടൊപ്പം, അപ്ഡേറ്റ് ചെയ്യപ്പെടുന്ന മനസ്സും മസ്തിഷ്ക്കവും. അരുക് വൽക്കരിക്കപ്പെട്ടവരോടുള്ള സഹാനുഭൂതി.. ഇതൊക്കെയാണ് ഈ ജനകീയ അഭിഭാഷകനെ നാടിൻ്റെ പ്രിയങ്കരനാക്കുന്നത്.

മയ്യഴിയുടെ ചരിത്രമറിയാനാഗ്ര ഹിക്കുന്നവർ, മറ്റെങ്ങും പോകണ്ട. വക്കീലിന്റെ വീടിനോട് ചേർന്നുള്ള മ്യൂസിയത്തിൽ കയറിയാൽ മതി. പോയ കാലങ്ങളുടെ ശേഷിപ്പുകളത്രയും ശേഖരിച്ചു വെച്ചിരിക്കുകയാണിവിടെ.

മയ്യഴിയിലെ കാർഷിക മേഖല പരിപോഷിപ്പിക്കുന്നതിന് പലവിധ തൈകൾ സൗജന്യമായി വിതരണം ചെയ്യുന്നത് വർഷങ്ങളായി ഈ കർഷക മനസ്സിൻ്റെ ആത്മനിർവൃതിയാണ്. ത ൻ്റെ വീട്ടിലേക്കുള്ള വഴിയായ മാഹി റെയിൽവെ സ്റ്റേഷൻ റോ ഡിൻറെ ഇരുവശങ്ങളിലും വർ ണ്ണപുഷ്പങ്ങൾ എന്നും പൂത്തുലയുന്ന ചെടികൾ വെച്ചുപിടിപ്പിക്കുകയും, വർഷങ്ങളായി അവയെ പരിപാലിക്കുകയും ചെയ്തത് ഈ പ്രകൃതി സ്നേഹിയുടെ വിനോദമാണ്.

മയ്യഴി കളിക്കളമായ 'പ്ലാസ്‌ദ് ആംസി'ലും, ഇൻഡോർ സ്റ്റേഡി യത്തിലും ഉയരുന്ന ആരവങ്ങളിൽ ഈ മനുഷ്യൻ്റെ ശബ്ദവും കേൾക്കാം. കഴിഞ്ഞ നിരവധി വർഷങ്ങളായി മയ്യഴി മൈതാനത്ത് തുടർച്ചയായി കുട്ടികൾക്കായി നടത്തി വരുന്ന സൗജന്യ ഫുട്ബാൾ പരി ശീലനക്കളരിയുടേയും, സുധാക രൻ മാസ്റ്റർ ഫുട്ബാൾ അക്കാദ മിയുടേയും അമരക്കാരനാണ് കാ ൽപ്പന്തുകളിയുടെ ഉപാസകനും, സംഘാടകനുമായ ഈ ഫുട്ബാ ൾ താരം. പതിവ് സൈക്കിൾ സവാരിക്കാരുടെ ഗ്രൂപ്പായ കെവലിയേർസിൻ്റെ ലീഡറും, ജീവകാരുണ്യ പ്രവർത്തനങ്ങളുടെ അത്താണിയുമാണ് ഈ മനുഷ്യ സ്നേഹി.'

കേരളത്തിലെയും, പോണ്ടിച്ചേരിയിലെയും. മിക്കവാറും എല്ലാ നേതാക്കളുമായുംഭരണ കർത്താക്കളുമായും ആത്മ ബന്ധം പുലർത്തുന്ന അദ്ദേഹം, പിറന്ന നാടിൻറെ നന്മകൾക്ക് വേണ്ടി അവ പ്രയോജനപെടുത്താനും മറക്കാറില്ല.

മുപ്പത്തിയെട്ടു വർഷമായി തദ്ദേ ശ സ്ഥാപനങ്ങളിലേക്ക് 'തിരഞ്ഞെടുപ്പ് നടത്താത്ത ഇന്ത്യയിലെ ഏക സംസ്ഥാനമായി പുതുച്ചേരി മാറിയപ്പോൾ, 2006ൽ മുനിസിപ്പാൽ" തിരഞ്ഞടുപ്പ് നടത്താൻ സുപ്രീം കോടതി വിധിയിലൂടെ സാധിച്ചതും,, ഇന്നിപ്പോൾ കാലാവധി കഴിഞ്ഞ് പതിനാല് വർഷത്തിന് ശേഷവും പുതുച്ചേരി സംസ്ഥാനത്ത് തദ്ദേശ സ്വ യംഭരണ തിരഞ്ഞെടുപ്പ് നടത്തിക്കിട്ടാൻ വീണ്ടും സുപ്രീം കോടതി വിധി നേടിയെടുത്തതും ചരിത്രമാണ്. തെരഞ്ഞെടുപ്പ് നടത്താതെ നീട്ടിക്കൊണ്ടു പോകുന്ന സർക്കാർ നടപടിക്കെതിരെ വീണ്ടും അദ്ദേഹം സുപ്രീം കോടതി യിൽ പോരാടുകയാണ്.

മാഹിക്ക് പുതുതായി മുൻസിഫ് കോടതി ലഭിച്ചതും, അതിലൂടെ മാഹിയിലെ പതിനാലു പേർക്ക് സർക്കാർ ജോലി ലഭ്യമാക്കിയതും,, പതിനഞ്ചു വർഷത്തിലധികം കെട്ടിക്കിടന്ന കേസ്സുകളൊക്കെ തീർപ്പാക്കാനായതും, ഉപഭോക്തൃ കോടതിയുടെ സിറ്റിങ്ങ് മാഹിക്ക് ലഭ്യമാക്കിയതും,അഞ്ച് ലക്ഷം രൂപ വരെയുള്ള കേസ് നടത്തുവാനുള്ള അധികാരംമാത്രമുണ്ടാ യിരുന്ന മാഹി കോടതിക്ക് കോടിക്കണക്കിന് രൂപയുടെ കേസ് നടത്തുവാനുമുള്ള അധികാരം നേടിയെടുത്തതും , അശോക് കുമാർ ഫയൽ ചെയ്ത പൊതുതാൽപ്പര്യ ഹർജികളിലെ വിധികളിലുടെയാണ്.

മൂന്നരപ്പതിറ്റാണ്ടുകാലമായി ത ലശ്ശേരി-മാഹി ബൈപ്പാസ് ഇരകൾക്ക് മതിയായ നഷ്ടപരിഹാരം ലഭിക്കാതെ ,നൂറു കണക്കിനു കുടുംബങ്ങൾ ദുരിതക്കയത്തിലായപ്പോൾ,ചെന്നൈ ഹൈകോടതിയി ൽ നിന്നും, പ്രതിഫലത്തുകയിനത്തിൽ സർക്കാർ തീരുമാനി ച്ചതിലും 85 കോടി രൂപ അധികം ലഭ്യമാക്കാൻ കോടതി വിധിയിലൂടെ പൊരുതി നേടാൻ ഈ അഭിഭാഷകനായി. കോടതി നിർദ്ദേശപ്രകാരം തന്നെ ഡിസ്ട്രിക്ട് ലെവൽ പർച്ചേസിങ്ങ് കമ്മിറ്റിയുണ്ടാക്കാൻ അശോകൻ വക്കീലിനെ ചുമതലപ്പെടുത്തുകയും, ഭൂമി നഷ്ടപെട്ടവർക്ക് സർക്കാർ ആദ്യം അനുവദിച്ച തുകയേക്കാൾ 85 കോടി രൂപ കൂടി അനുവദിക്കപ്പെട്ടത് ന്യൂറു കണക്കിന് പാവപ്പെട്ട കുടുംബങ്ങൾക്ക് മഹാഭാഗ്യമായി മാറുകയായിരുന്നു. 'രാജ്യത്താദ്യമായി

ഒരു മജിസ്ട്രേറ്റ് കോടതിക്ക് ഔദ്യോഗികമായി സ്വന്തമായെരു കാർ അനുവദിച്ചതും അശോക് കുമാറിൻറെ ഇടപെടൽ കൊണ്ടു തന്നെ.

പുതുച്ചേരി സംസ്ഥാനത്തുള്ള പ്രൊഫഷണൽ കോളേജുകളിൽ മാഹിക്കുണ്ടായിരുന്ന ക്വാട്ട ഇല്ലാതാക്കാൻ പോണ്ടിച്ചേരി ക്കാർ,കോടതിയിലൂടെ നീക്കമാരംഭിച്ചപ്പോൾ ആ ശ്രമം പരാജയപ്പെടുത്താനും ശക്തമായ ഇട പെടലിലൂടെ സാധിതമായി.

സാധാരണക്കാരന് നീതി ലഭ്യമാക്കാനുള്ള ലക്ഷ്യത്തോടെ അഡ്വ.പി.ശശി ചെയർമാനായി ആരംഭിച്ച രാജ്യത്തിനകത്തും പുറത്തും ശാഖകളുള്ള 'ഗ്ലോബൽ ലോസി'ൻറെ സ്ഥാപക സെക്രട്ടരിയായിരുന്ന അശോക് കുമാർ, പി.ശശി മുഖ്യമന്ത്രിയുടെ പൊളിറ്റിക്കൽ സെക്രട്ടരിയായതോടെ സംഘടനയുടെ ചെയർമാനായി ' അംഗീകാരമില്ലാതെ ഫാഷൻ ഡിസൈനിങ്ങും മറ്റുമുള്ള കോഴ്സുകൾ പഠിപ്പിക്കാൻ വേണ്ടി ഒരു കോളേജ് മാഹിയിൽ തുടങ്ങിയപ്പോൾ, അതിൻ്റെ കള്ളത്തരങ്ങൾ പുറത്തുകൊണ്ടുവന്ന് 52 കുട്ടികളുടെ ഭാവി രക്ഷിച്ചതടക്കം പറഞ്ഞാലൊടുങ്ങാത്ത നേട്ടങ്ങൾ അദ്ദേഹം നാടിനു നൽകിയിട്ടുണ്ട്.

പഠന കാലത്ത് കാലിക്കറ്റ് യൂണിവേഴ്‌സിറ്റി എ സോൺ കലോത്സവത്തിലും, മംഗ്ലൂർ യൂണിവേഴ്‌സിറ്റി കലോത്സ വത്തിലും നൃത്തം ചെയ്തിട്ടുള്ള സർഗ്ഗധനനായ ഭരതനാടു നർത്തകൻ കൂടിയാണ് നൃത്തം ശാസ്ത്രീയമായി പഠിച്ച ഈ കലാകാരൻ.

മാഹി ലയൺസ് ക്ലബ്ബിനെ ജനകീയമാക്കിയ പ്രസിഡൻ്റ് കൂടിയായിരുന്നു അദ്ദേഹം.പാഴായി പോകാത്ത വാക്കും, കാപട്യമില്ലാത്ത പ്രൊഫഷണൽ തന്ത്രവും, കരൾ പറിച്ച് നൽകുംവിധമുള്ള സൗഹൃദങ്ങളുമാണ് ഈ മനുഷ്യൻറെ വിജയ മന്ത്രം. ഇതോടൊപ്പം ശരിയാണെന്ന് ഉത്തമ ബോധ്യമുള്ള ഏത് കാര്യത്തിലും, ഏതറ്റം വരെ പോകാനും, പൊരുതി ജയിക്കാനുമുള്ള ചങ്കൂറ്റവും കൗശലവും നിശ്ചയദാർഢ്യവും ഈ മനുഷ്യന്റെ രക്തത്തിൽ അലിഞ്ഞു ചേർന്ന വികാരമാണ്.

മൂല്യശോഷണം സമസ്ത മേഖലകളേയും ഗ്രസിച്ചിരിക്കെ, പഴമയുടെ നൻമകളെ ചേർത്തു പിടിക്കാനും, പുതുകാലത്തിനൊപ്പം മുമ്പേ പറക്കാനുമുള്ള ഈ മനുഷ്യൻ്റെ ചിന്താമണ്ഡലം വ്യക്തമാക്കുന്നതാണ് മയ്യഴിക്ക് വീണു കിട്ടിയ ഈ ചരിത്ര ഗ്രന്ഥം. നാട് ഏറെ പ്രതീക്ഷിക്കുന്ന ഈ മനുഷ്യൻ മയ്യഴിക്കാരൻ്റെ സ്വപ്നങ്ങളും, മിത്തുക്കളും, പ്രായോഗിക സഞ്ചാരപഥങ്ങളും ഒരുമിച്ച് കൊണ്ടു പോകുന്ന അസാധാരണ വ്യക്തിത്വമാണ്.ജനാഭിലാഷത്തിൻ്റെ നാൾവഴികളിലൂടെ ഇനി മയ്യഴിക്കാർക്ക് സഞ്ചരിക്കാം...