ജ്ഞാനദീപത്തിൽ തെളിയുന്ന സ്നേഹത്തിന്റെ പ്രഭാനാളം :ചാലക്കര പുരുഷു

ചിത്ര വിവരണം: പുതുച്ചേരിയിൽ മുഖ്യമന്ത്രി എൻ. രംഗസ്വാമിയിൽ നിന്നും കെ.കെ. സ്നേഹ പ്രഭ ടീച്ചർ അവാർഡ് ഏറ്റുവാങ്ങുന്നു

ഉസ്മാൻ മാസ്റ്റരുടെ ജന്മശതാബ്ദി ആഘോഷിച്ചു

മാഹി. മയ്യഴി വിമോചന സമര നായകൻ രക്ത സാക്ഷി പി.കെ. ഉസ്മാൻ മാസ്റ്ററുടെ നൂറാം ജൻമ വാർഷിക ദിനം ആഘോഷിച്ചു.

ചാലക്കര ഉസ്മാൻ ഗവ: ഹൈസ്കൂൾ പൂർവ്വ വിദ്യാർത്ഥി സംഘടനയായ സഹപാഠിയുടെ ആഭിമുഖ്യത്തിൽ കാലത്ത് ഉസ്മാൻ മാസ്റ്ററുടെ പ്രതിമയിൽ പുഷ്പാർച്ചന നടത്തി.

തുടർന്ന് ചാലക്കര എം എ എസ് എം. വായനശാലാ ഹാളിൽ നടന്ന അനുസ്മരണ സമ്മേളനം കെ.മോഹനന്റെ അദ്ധ്യക്ഷതയിൽ പൊലീസ് സർക്കിൾ ഇൻസ്പക്ടർ അനിൽകുമാർ പി.എ. ഉദ്ഘാടനം ചെയ്തു.

ചാലക്കര പുരുഷു അനുസ്മരണ ഭാഷണം നടത്തി. ആനന്ദ് കുമാർ പറമ്പത്ത്, കെ.പി. വത്സൻ , റഷീദ് അടുവാട്ടിൽ, കെ. ചിത്രൻ, പി.പി.രാജേഷ് സംസാരിച്ചു.

ചിത്രവിവരണം: മാഹി പൊലീസ് സി.ഐ. അനിൽകുമാർ പി.എ. ഉദ്ഘാടനം ചെയ്യുന്നു.

ശാസ്ത്രം നേട്ടം കൈവരിക്കുമ്പോഴും മനുഷ്യർ ഇരുളിലേക്ക് മടങ്ങുന്നു: കെ.കെ.ശൈലജ

മാഹി: കാലം ആധുനികതയിലേക്കും ശാസ്ത്രനേട്ടങ്ങളിലേക്കും അതി ധ്രുതം കടന്നുപോകുമ്പോഴും , ജാതി മത വംശീയ വൈരുദ്ധ്യങ്ങൾ രൂക്ഷമാവുകയാണെന്നും, ഇരുട്ടിലേക്കുള്ള മടക്ക യാത്രയാണ് കാണാനാവുന്നതെന്നും, അതുകൊണ്ടു തന്നെ ഗുരുദർശനങ്ങൾക്ക് പ്രസക്തിയേറി വരികയാണെന്നും കെ.കെ.ശൈലജ എം എൽ എ അഭിപ്രായപ്പെട്ടു.

വെസ്റ്റ് നിടുമ്പ്രം ശ്രീനാരായണ ഗുരു സാംസ്ക്കാരിക കേന്ദ്രം വായനശാല ആന്റ് ഗ്രന്ഥാലയത്തിന്റെ ആഭിമുഖ്യത്തിൽ നടന്ന ത്രിദിന ഗുരുജയന്തി ആഘോഷങ്ങളുടെ സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു എം എൽ എ

ചൊക്ലി പഞ്ചായത്ത് പ്രസിഡണ്ട് സി.കെ.രമ്യ ടീച്ചർ അദ്ധ്യക്ഷത വഹിച്ചു. ശ്രീനാരായണഗുരുവിന്റെ ആദർശങ്ങളും, ആനുകാലിക പ്രസക്തിയും എന്ന വിഷയത്തിൽ ചാലക്കര പുരുഷു പ്രഭാഷണം നടത്തി. വിദ്യാർത്ഥി - കലാപ്രതിഭകൾക്ക് കെ.കെ.ശൈലജ കേഷ് അവാർഡും, ഉപഹാരങ്ങളും കൈമാറി. ടി.സി. പ്രദീപൻ മാസ്റ്റർ സമ്മാനദാനം നിർവഹിച്ചു. പ്രദീപ് കുമാർ സ്വാഗതവും കെ.ടി.കെ.മോഹനൻ നന്ദിയും പറഞ്ഞു.

നൃത്തസന്ധ്യ, ഗാനമേള പരിപാടികൾ അരങ്ങേറി.

ചിത്ര വിവരണം: കെ.കെ.ശൈലജ എഎൽ എ ഉദ്ഘാടനം ചെയ്യുന്നു.

എക്സലിൽ ഓണാഘോഷം

മാഹി:എക്സൽ പബ്ലിക് സ്കൂളിൽ ഓണാഘോഷം

പരമ്പരാഗത ആവേശത്തോടെയാണ് ആഘോഷിച്ചത്. അദ്ധ്യാപകരും മറ്റ് ജീവനക്കാരും റിസപ്ഷനിൽ കൂറ്റൻ പൂക്കളമൊരുക്കി. വിദ്യാർത്ഥികൾക്കായി പരമ്പരാഗത കളികൾ ഒരുക്കിയിരുന്നു. എല്ലാ ക്ലാസുകൾക്കും പൂക്കളമത്സരം നടത്തി. വിദ്യാർഥികൾ പാട്ടും,നൃത്തവും, തിരുവാതിരക്കളിയും അവതരിപ്പിച്ചു. വൈവിധ്യമാർന്ന വിഭവങ്ങളുള്ള പരമ്പരാഗത ഓണസദ്യയുമുണ്ടായി. ട്രസ്റ്റി ഡോ.പി.രവീന്ദ്രൻ, പ്രിൻസിപ്പൽ സതി എം.കുറുപ്പ്, വൈസ് പ്രിൻസിപ്പൽമാർ, പി.ടി.എ പ്രസിഡന്റ് കൃപേഷ് കെ.വി. പിടിഎ എക്‌സിക്യൂട്ടീവ് കമ്മിറ്റി അംഗങ്ങളും പ്രതിനിധികളും അധ്യാപകരും ചടങ്ങിൽ പങ്കെടുത്തു.

ചിത്രവിവരണം:എക്സൽ സ്കൂളിൽ കുട്ടികൾ തീർത്ത കൂറ്റൻ പൂക്കളം

വീട്ടുകിണർ അമർന്നു

മാഹി. മാഹി ശ്രീകൃഷ്ണ ക്ഷേത്രത്തിനടുത്ത പൂഴിയിൽ വിനോദ് കുമാറിന്റെ വീടിനോട് ചേർന്നുള്ള കിണർ പൂർണ്ണമായി അമർന്നു.

ഇന്നലെ ഉച്ചക്ക് ശേഷം മൂന്നര മണിയോടെയാണ് യാതൊരു സൂചനയുമില്ലാതെ കിണർ അമർന്നില്ലാതായത്. ഇത് വീട്ടിനും ഭീഷണിയായിട്ടുണ്ട്. പരിസരവാസികൾ ഭീതിയോടെയാണ് കഴിയുന്നത്.

ചിത്ര വിവരണം: തകർന്ന വീട്ടുകിണർ

മത്സ്യ തൊഴിലാളികൾ ഗവ: ഹൗസിലേക്ക് മാർച്ച് നടത്തി

മാഹി: വിവിധ ആവശ്യങ്ങളുയർത്തി മത്സ്യമേഖല സംയുക്ത സമര സമതിയുടെ ആഭിമുഖ്യത്തിൽ മാഹി ഗവ: ഹൗസ് മാർച്ച് നടത്തി.

 സമര സമിതി ചെയർമൻഎൻ.ബാലകൃഷ്ണന്റെ അദ്ധ്യക്ഷതയിൽ

 രമേശ് പറമ്പത്ത് എം. എൽ. എഉദ്ഘാടനം ചെയ്തു.

പി.രാജേഷ്,പി.ശ്യാംജിത്ത് ,എ.വി. യൂസഫ് വിൻസൺ ഫെർണാണ്ടസ് ,

ദിനേശൻ,ആശാലത സംസാരിച്ചു.

 സമര സമിതി കൺവീനർ യു.ടി.സതീശൻസ്വാഗതവും,

പി.സുരേഷ് നന്ദിയും പറഞ്ഞു.

ചിത്രവിവരണം: രമേശ് പറമ്പത്ത് എം എൽ എ ഉദ്ഘാടനം ചെയ്യുന്നു.

ഒ.ആബുവിൻ്റെ ഗാനം മറ്റൊരാളുടെ പേരിൽ യൂട്യൂബിൽ

മാഹി: പ്രശസ്ത മാപ്പിള പാട്ട് രചയിതാവ് ഒ.ആബു സാഹിബ് രചിച്ച് പി.കെ.ആബൂട്ടി സംഗീതം നല്കി എരഞ്ഞോളി മൂസ പാടിയ 'ഓമന മുഹമ്മദിനെ ഓത്തിനയച്ചില്ല.. ' എന്ന പ്രശസ്തമായ ഗാനം, രചനയും സംഗീതവും മറ്റൊരാളുടെ പേരിൽ യൂട്യൂബിൽ അപ് ലോഡ് ചെയ്തതായി ആരോപണം. ഒരു വർഷമായി ഈ ഗാനം ഒരു പെൺകുട്ടി പാടിയത് ഒരു ലക്ഷത്തി എഴുപതിനായിരത്തിന്നടുത്ത് പേർ കണ്ടു. ഒ.ആബുവിൻ്റെ പേരമകൻ ഫനാസ് തലശ്ശേരിയാണ് ഇത് കണ്ടു പിടിച്ച് മാപ്പിള കലാകേന്ദ്രം ഭാരവാഹികളായ പ്രൊഫ.എ.പി.സുബൈർ, ഉസ്മാൻ വടക്കുമ്പാട് എന്നിവർക്ക് വിവരം നല്കിയത്. ഫനാസ് യൂട്യൂബ് ചാനലിൻ്റെ ആൾക്കാരെ ബന്ധപ്പെട്ടെങ്കിലും, വ്യക്തമായ മറുപടി ലഭിച്ചില്ല. ഉസ്മാൻ പി. വടക്കുമ്പാട് ഗായികയുടെ പിതാവും സംഗീത കലാകാരനുമായ വ്യക്തിയെബന്ധപ്പെട്ടപ്പോൾ അറിയാതെ പറ്റിയതാണെന്നും, തിരുത്താമെന്നും പറഞ്ഞു. അത് പ്രകാരം ഇന്ന് രാവിലെ ചാനൽ നോക്കിയപ്പോൾ തിരുത്തിയതായി കണ്ടു. എന്നിരുന്നാലും ഒരു വർഷമായി ഈ ചാനലിൽ ഈ ഗാനം കേട്ട 1.70 ലക്ഷം പേർ തെറ്റിദ്ധരിച്ച് വിശ്വസിച്ചു കാണും.

 നിർലജ്ജമായ മോഷണമാണ് ഇവർ നടത്തിയിരിക്കുന്നത്. സംഗീത പ്രേമികൾ ഇതിനെതിരെ പ്രതികരിക്കുകയും ഇത്തരം നികൃഷ്ട ജന്മങ്ങളെ ഒറ്റപ്പെടുത്തുകയും വേണമെന്ന് മാപ്പിള കലാകേന്ദ്രം പ്രസിഡണ്ട് പ്രഫ.എ.പി.സുബൈർ പറഞ്ഞു. ഒ.ആബു സാഹിബിൻ്റെ കുടുംബത്തിൻ്റെ പിന്തുണയോടെ നിയമ നടപടി സ്വീകരിക്കേണ്ടി വരുമെന്ന് ഉസ്മാൻ പി. വടക്കുമ്പാട് പ്രതികരിച്ചു.

ആച്ചുകുളങ്ങരയിൽ ഗുരു ജയന്തി ആഘോഷം

ന്യൂമാഹി:ആച്ചു കുളങ്ങര ശ്രീനാരായണ മഠത്തിൽ  വിവിധ പരിപാടികളോടെ ശ്രീനാരായണഗുരു ജയന്തി ആഘോഷിച്ചു.   ഗുരുപൂജ, ദീപാലങ്കാരംഎന്നിവയുണ്ടായി. ജയന്തി സമ്മേളനം തലശ്ശേരി നഗരസഭ അധ്യക്ഷ ജമുനാ റാണി ടീച്ചർ ഉദ്ഘാടനം ചെയ്തു മഠം പ്രസിഡണ്ട് അതിരിക്കു ന്നത്ത് പ്രേമൻ അധ്യക്ഷത വഹിച്ചു. " ആരാണ് ഗുരുദേവൻ;  എന്ന വിഷയത്തിൽ മുഖ്യപ്രഭാഷണം രഞ്ജൻ കയനാടത്ത് ധർമ്മടം നിർവഹിച്ചു. എസ്എസ്എൽസി പ്ലസ് ടു ഉന്നത വിജയം നേടിയ വിദ്യാർത്ഥികളെ റിട്ടയേഡ് ( ആർ.ടി.ഒ.) എ. കെ .രാധാകൃഷ്ണൻ അനുമോദിച്ചു പി. എൻ. സുരേഷ് ബാബു . കെ. പി. ജയചന്ദ്രൻ പി .കെ. ബാലഗംഗാധരൻ രഞ്ജിത്ത് പുന്നോൽ, ഗുരു സമാധി അനുഷ്ഠാന കർമ്മങ്ങൾക്കായുള്ള സ്ഥിര നിക്ഷേപം സതീശൻ അനശ്വര ഏറ്റുവാങ്ങി. സന്ദീഷ് കെ. രാജേഷ് കെ. സി. എന്നിവർ പങ്കെടുത്തു തുടർന്ന് തിരുവാതിര, നൃത്ത നൃത്യങ്ങൾ നടന്നു. ഉച്ചക്ക് അന്നദാനവുമുണ്ടായി.

ചിത്രവിവരണം: ഗുരു ജയന്തി സാംസ്കാരിക സമ്മേളനം ജുമുനാ റാണി ടീച്ചർ ഉദ്ഘാടനം ചെയ്യുന്നു

സമന്വയ റസിഡൻസ്: ഓണാഘോഷ പരിപാടി നടത്തി

മാഹി: ചാലക്കര സമന്വയ റസിഡൻസ് അസോസിയേഷൻ വിവിധ പരിപാടികളോടെ ഓണം ആഘോഷിച്ചു. ഇന്ദിരാഗാന്ധി പോളിടെക്കനിക്ക് കോളേജിൽ നടന്ന ഓണാഘോഷ പരിപാടിയുടെ ഉദ്ഘടനവും സമ്മാനദാനവും മാഹി പോലിസ് സബ്ബ് ഇൻസ്പെക്ടർ സുനിൽ പ്രശാന്ത് നിർവ്വഹിച്ചു. പൂക്കളമത്സരം , ഉറിയടി, ലെമൺ സ്പൂൺ, കസേരക്കളി, സുന്ദരിക്ക് പൊട്ടു തൊട്ടൽ, കമ്പവലി തുടങ്ങിയ മത്സരങ്ങളും നടന്നു

ചിത്രവിവരണം: പൊലീസ് എസ്.ഐ. സുനിൽ പ്രശാന്ത് ഉദ്ഘാടനം ചെയ്യുന്നു

നാല് പതിറ്റാണ്ട് മുമ്പുളള വിദ്യാലയ സ്മരണയിൽ..

കാവുംഭാഗം ഗവ:ഹൈസ്കൂളിലെ 1983 - 84 എസ്.എസ്.എൽ.സി.ബാച്ചിലെ വിദ്യാർത്ഥികൾ സംഗമിച്ചപ്പോൾ..

ഡോ .കെ .കെ .എൻ കുറുപ്പിൻ്റെ മുഖ്യകാർമ്മികത്വത്തിൽ

നവരാത്രി എഴുത്തിനിരുത്തൽ

ചോമ്പാല :മൂകാംബിക- കൊല്ലൂർ കേന്ദ്രമായി പ്രവർത്തിക്കുന്ന മഹാകവി കുട്ടമത്ത് സംസ്കൃതി കേന്ദ്രവും,വാസ്തു ഭാരതി വേദിക് റിസർച്ച് അക്കാദമി യും സംയുക്തമായി അഴിയൂർ പഞ്ചായത്തിൽ കോവുക്കൽ കടവിനടുത്ത് 'പൂമാലിക ' യിൽ നവരാത്രി വിജയദശമി നാളിൽ ഒക്ടോബർ 2 ന് എഴുത്തി നിരുത്തൽ ചടങ്ങ് നടത്തും .

 ജാതിമതഭേധമെന്യേ താല്പര്യമുള്ള ആർക്കും ഈ വിദ്യാരംഭം ചടങ്ങിൽ പങ്കെടുക്കാം .

ഗണപതി പൂജയോടെ ജ്ഞാനത്തിൻ്റെയും വിദ്യാഭ്യാസത്തിൻ്റെയും ദേവതയായ സരസ്വതിദേവിയെ സങ്കൽപ്പിച്ച് പ്രാർത്ഥന നടത്തിക്കൊണ്ട് ആരംഭിക്കുന്ന ആദ്യാക്ഷരം കുറിക്കൽ ചടങ്ങിൻ്റെ ഉദ്ഘാടനം ദക്ഷിണേന്ത്യയിലെ പ്രമുഖ വാസ്തുഗുരുവും വാസ്തു ഭാരതി വേദിക് റിസർച്ച് അക്കാദമി ചെയർമാനുമായ ഡോ .നിശാന്ത് തോപ്പിൽ (M .Phil, PhD) നിർവ്വഹിക്കും.

പ്രമുഖ ചരിത്രകാരനും ഗവേഷകനും കോഴിക്കോട് യൂണിവേഴ്സിറ്റി മുൻ വൈസ് ചാൻസലരും പണ്ഡിതനും ഭരണകർത്താവുമായിരുന്ന ഡോക്ടർ .കെ .കെ .എൻ കുറുപ്പായിരിക്കും കുഞ്ഞുങ്ങൾക്ക് ഹരിശ്രീ കുറിക്കുക .

ഒപ്പം പ്രമുഖ എഴുത്തുകാരുടെയും പണ്ഡിതന്മാരുടെയും കൂട്ടായ്മയിൽ നടക്കുന്ന ഈ പുണ്യ കർമ്മത്തിൽ ദക്ഷിണയായി ഒരു രൂപ മാത്രമേ സ്വീകരിക്കൂ എന്നും മറ്റു ഉപഹാരങ്ങളൊന്നും അരുതെന്നും സംഘാടകർ വാർത്താക്കുറിപ്പിൽ പ്രത്യേകം അറിയിക്കുന്നു

200 വർഷങ്ങളായി കേരളത്തിലെ സംസ്കൃത മലയാള ഭാഷാ -സാഹിത്യ പഠന- പ്രചാരണ കേന്ദ്രമായിരുന്ന കുട്ടമത്ത് കവികളുടെയും ,വൈദ്യ വിശാരദന്മാരുടെയും ആവാസകേന്ദ്രം കൂടിയായിരുന്നു ഇവിടം .

മഹത്തായ ഈ കുടുംബ പാരമ്പര്യത്തിൽ ഇളം തലമുറയ്ക്കാരനും ജ്ഞാനവൃദ്ധനുമായ ഡോക്ടർ .കെ .കെ .എൻ കുറുപ്പിൻ്റെ മുഖ്യ കാർമ്മികത്വത്തിൽ നടക്കുന്ന ഈ എഴുത്തിനിരുത്തൽ ചടങ്ങിൽ പങ്കെടുക്കാൻ ആഗ്രഹിക്കുന്നവർ മുൻകൂട്ടി രജിസ്റ്റർ ചെയ്യേണ്ടതാണെന്ന് സംഘാടകർ അറിയിക്കുന്നു .

നേരത്തെ ഹരിശ്രീ എഴുതാതെ സ്കൂളിൽ ചേർന്ന കുട്ടികൾക്കും( 2 വയസ്സുമുതൽ 6 വയസ്സുവരെ അപേക്ഷിക്കാം 

പ്രവേശനം രജിസ്റ്റർ ചെയ്യുന്ന ക്രമനമ്പർ അനുസരിസിച്ചായിരിക്കും ലഭിക്കുക .

മുൻകൂട്ടി രജിസ്ട്രേഷന് ബന്ധപ്പെടുക.

ഫോൺ : 8921364179 , +919447079574 ,9847832828 ,

 +919539157337 , +919846546919, 9895385000 ,9895745432