അപ്രോച്ച് റോഡിൽ തോടിനു കുറുകേയുള്ള പാലം നിർമാണം പൂർത്തിയായി

പെരുവണ്ണാമൂഴി: ചക്കിട്ടപാറ പഞ്ചായത്തിൽ കടന്തറ പുഴയ്ക്ക് കുറുകെ പൂഴിത്തോട് എക്കൽപ്പാലം നിർമാണത്തിന്റെ ഭാഗമായുള്ള അപ്രോച്ച് റോഡിലെ തോടിനു കുറുകേയുള്ള പാലം നിർമാണം പൂർത്തിയായി. പാലത്തിൽനിന്ന് പൂഴിത്തോട് ഭാഗത്തേക്കുള്ള വഴിയിൽ തോടിനു കുറുകേ ഒരു സ്‌പാനോടുകൂടി 16 മീറ്റർ നീളത്തിലാണ് ഈ ചെറിയ പാലം നിർമിച്ചിട്ടുള്ളത്.

​800 മീറ്ററോളം നീളത്തിൽ ഇരുഭാഗത്തുമായി അപ്രോച്ച് റോഡിന്റെ പ്രവൃത്തികളും പുരോഗമിക്കുകയാണ്. 2024 ഒക്ടോബറിലാണ് പാലത്തിന്റെയും അപ്രോച്ച് റോഡിന്റെയും നിർമാണം ആരംഭിച്ചത്. 2026 മെയ് മാസത്തിൽ നിർമാണം പൂർത്തീകരിക്കാനാണ് ലക്ഷ്യമിട്ടിരുന്നതെങ്കിലും തൂണുകളുടെ പ്രവൃത്തികൾ ഉൾപ്പെടെ ഇനിയും പൂർത്തിയാകാനുണ്ട്.

​അടങ്കൽ പുതുക്കണം

​എക്കൽപ്പാലം നിർമാണം സുഗമമായി തുടരുന്നതിനായി നിലവിൽ അടങ്കൽ (Estimate) പുതുക്കാൻ കാത്തിരിക്കുകയാണ്. ആദ്യം നിശ്ചയിച്ച പ്രവൃത്തികളിൽ ചില മാറ്റങ്ങൾ വന്നതിനാലാണ് അടങ്കൽ പുതുക്കേണ്ടി വരുന്നത്. ചക്കിട്ടപാറ, മരുതോങ്കര പഞ്ചായത്തുകളെ ബന്ധിപ്പിച്ച് 16.75 കോടി രൂപ ചെലവിലാണ് ഈ പാലം നിർമിക്കുന്നത്. നബാർഡിന്റെ ധനസഹായത്തോടെ പൊതുമരാമത്ത് വകുപ്പാണ് പാലം നിർമാണം ഏറ്റെടുത്തിരിക്കുന്നത്. അടങ്കൽ പുതുക്കിയാലും നേരത്തെ അനുവദിച്ച ഫണ്ടിൽ തന്നെ നിർമാണം പൂർത്തീകരിക്കാൻ കഴിയുമെന്നാണ് അധികൃതർ വ്യക്തമാക്കുന്നത്. പ്രശസ്തമായ ഊരാളുങ്കൽ ലേബർ കോൺട്രാക്ട് കോപ്പറേറ്റീവ് സൊസൈറ്റിയാണ് പാലം പണി ഏറ്റെടുത്തിരിക്കുന്നത്. 130 മീറ്റർ നീളത്തിലും 11 മീറ്റർ വീതിയിലുമാണ് പ്രധാനപാലം നിർമിക്കുന്നത്. മരുതോങ്കര പഞ്ചായത്തിൽ പൂഴിത്തോട് ജലവൈദ്യുത പദ്ധതി പ്രദേശത്തിന് അടുത്തായി എക്കൽ ഭാഗത്താണ് പാലം എത്തിച്ചേരുന്നത്.

​പഴയകാലത്ത് ഇരുകരകളെയും ബന്ധിപ്പിച്ച് പുഴയിൽ ഒരു കോൺക്രീറ്റ് നടപ്പാലം ഉണ്ടായിരുന്നെങ്കിലും, 1983 കാലത്തെ മലവെള്ളപ്പാച്ചിലിൽ ഇത് തകരുകയായിരുന്നു. പഴയ പാലത്തിന് മുകൾഭാഗത്തായാണ് ഇപ്പോൾ പുതിയ പാലം നിർമിക്കുന്നത്. സംസ്ഥാന സർക്കാർ 2022 വർഷത്തെ ബജറ്റിൽ പാലത്തിന്റെ അടങ്കൽ തയ്യാറാക്കാനായി അഞ്ച് ലക്ഷം രൂപ അനുവദിക്കുകയും, ഊരാളുങ്കൽ സൊസൈറ്റിയുടെ നേതൃത്വത്തിൽ അടങ്കൽ തയ്യാറാക്കിയ ശേഷം 2024 ഫെബ്രുവരിയോടെയാണ് പദ്ധതി ടെൻഡർ ചെയ്തത്.

​ഈ പുതിയ പാലം യാഥാർത്ഥ്യമാകുന്നതോടെ പ്രദേശത്തിന്റെ വികസനത്തിന് അത് ഏറെ സഹായകമാകും. പഞ്ചായത്തിലെ ഉയർന്ന പ്രദേശമായ പൂഴിത്തോടുള്ളവർക്ക് ചെമ്പനോടയിൽ എത്താതെയുളള കുറ്റ്യാടി ഭാഗത്തേക്കുള്ള യാത്ര എളുപ്പമാകും. ഇത് പ്രദേശവാസികൾക്കും വിദ്യാർഥികൾക്കുമടക്കം വലിയ തോതിൽ ആശ്വാസമാകും.