മലബാർ ടൂറിസം മാപ്പിൽ ഇടംനേടാനൊരുങ്ങി കുനിയിൽക്കടവ്; ഇടപെടലുമായി വി. ടി. സൂരജ് എം.എൽ.എ.

അത്തോളി: പ്രകൃതിഭംഗിയും ജലസമ്പത്തും നിറഞ്ഞ അത്തോളി കുനിയിൽക്കടവിന്റെ ടൂറിസം സാധ്യതകൾ ചൂണ്ടിക്കാട്ടി മാതൃഭൂമി പ്രസിദ്ധീകരിച്ച വാർത്തയെത്തുടർന്ന് വി. ടി. സൂരജ് എം.എൽ.എ.യുടെ ഇടപെടൽ. ബാലുശ്ശേരി മണ്ഡലത്തിൽ നടപ്പാക്കുന്ന ടൂറിസം പദ്ധതികളിൽ കുനിയിൽക്കടവിന് പ്രത്യേകം പ്രാധാന്യം നൽകുമെന്നും പ്രദേശവാസികൾക്ക് പ്രയോജനകരമാകുന്ന രീതിയിലുള്ള പദ്ധതികളുടെ ചർച്ചകൾ പുരോഗമിക്കുകയാണെന്നും എം.എൽ.എ. അറിയിച്ചു. മികച്ച ജലസഞ്ചാര അനുഭവങ്ങൾക്കും ഗ്രാമീണ-മത്സ്യക്കൃഷി അധിഷ്ഠിത ടൂറിസത്തിനും സാധ്യതയുള്ള മേഖലയായിരുന്നിട്ടും കുനിയിൽക്കടവ് ഏറെക്കാലമായി അവഗണിക്കപ്പെട്ടു കിടക്കുകയായിരുന്നു.

​കണ്ടൽക്കാടുകൾ നിറഞ്ഞ തുരുത്തുകൾ, സൂര്യാസ്തമയ കാഴ്ചകൾ, പുഴയോരത്തെ മത്സ്യഫാമുകൾ, തനത് പുഴവിഭവങ്ങൾ എന്നിവയാൽ സമ്പന്നമായ കോരപ്പുഴയോരം നിലവിൽ തന്നെ നിരവധി സഞ്ചാരികളെ ആകർഷിക്കുന്നുണ്ട്. ആനപ്പാറയിൽ വർഷംതോറും നടക്കുന്ന വള്ളംകളിയും ഇവിടുത്തെ പ്രധാന സാംസ്കാരികോത്സവമാണ്. കോഴിക്കോട്-കുറ്റ്യാടി സംസ്ഥാനപാതയിൽ നിന്നും ദേശീയപാതയിൽ നിന്നും എളുപ്പത്തിൽ എത്തിച്ചേരാനാകുന്ന കുനിയിൽക്കടവിനെ സമ്പൂർണ വിനോദസഞ്ചാര കേന്ദ്രമായി വികസിപ്പിക്കുന്നതോടെ മലബാർ ടൂറിസം ഭൂപടത്തിൽ സുപ്രധാന സ്ഥാനം നേടാൻ ഈ പ്രദേശത്തിന് സാധിക്കും.