തൊട്ടിൽപ്പാലം-കുണ്ടുതോട് റോഡ് നിർമാണത്തിൽ അപാകതയെന്ന് ആരോപണം: നിർമാണം തടഞ്ഞ് നാട്ടുകാർ

തൊട്ടിൽപ്പാലം: തൊട്ടിൽപ്പാലം-കുണ്ടുതോട് റോഡിന്റെ വീതി കുറച്ചാണ് നിർമാണം നടത്തുന്നതെന്ന ആരോപണവുമായി നാട്ടുകാർ രംഗത്തെത്തി. തൊട്ടിൽപ്പാലം അങ്ങാടിക്ക് സമീപമുള്ള സ്വകാര്യ വ്യക്തിയുടെ സൂപ്പർമാർക്കറ്റിന് മുൻവശത്താണ് റോഡിന്റെ വീതി കുറയ്ക്കുന്നതായി പരാതി ഉയർന്നതും തുടർന്ന് നാട്ടുകാർ പ്രവൃത്തി തടഞ്ഞതും. പത്തുമീറ്റർ വീതിയുള്ള റോഡിന് ഇവിടെ മാത്രമായി വീതി കുറച്ചാണ് നിലവിൽ പണികൾ മുന്നോട്ട് പോകുന്നത്.

​ആദ്യഘട്ടത്തിൽ ബെൽമൗണ്ട് വരെയുള്ള റോഡ് നിർമാണം മറ്റൊരു കമ്പനി മികച്ച രീതിയിൽ പൂർത്തിയാക്കിയിരുന്നു. എന്നാൽ ബെൽമൗണ്ട് മുതൽ തൊട്ടിൽപ്പാലം വരെയുള്ള രണ്ടാംഘട്ട നിർമാണം ഏറ്റെടുത്ത പുതിയ കമ്പനിക്കെതിരെ തുടക്കം മുതൽ തന്നെ പരാതികൾ ഉയരുന്നുണ്ട്. നേരത്തെ ആശ്വസി പാലത്തിന് സമീപം വളവ് നിവർത്താതെ നിർമാണം നടത്തിയത് പ്രതിഷേധത്തിന് ഇടയാക്കിയിരുന്നു. ഇതിന് പിന്നാലെയാണ് ഇപ്പോൾ തൊട്ടിൽപ്പാലം ടൗണിനോട് ചേർന്ന് റോഡ് അവസാനിക്കുന്ന ഭാഗത്തും വീതി കുറയ്ക്കുന്നതായി ആരോപണമുയർന്നത്.

​നിർമാണച്ചുമതലയുള്ള കമ്പനി സ്വകാര്യവ്യക്തിക്ക് അനുകൂലമായ നിലപാടാണ് സ്വീകരിക്കുന്നതെന്ന് ആരോപിച്ച് ബി.ജെ.പി. പ്രവർത്തകർ തൊട്ടിൽപ്പാലം അങ്ങാടിയിൽ പ്രതിഷേധപ്രകടനം നടത്തി. കൂടാതെ, വീതികുറച്ച് നിർമാണം നടത്തുന്ന കടയ്ക്കുമുന്നിൽ പ്രവർത്തകർ പാർട്ടിയുടെ കൊടിനാട്ടി പ്രതിഷേധമറിയിക്കുകയും ചെയ്തു.