വടകരയിൽ ബസുകളുടെ മിന്നൽ പണിമുടക്ക്; യാത്രാദുരിതത്തിന് ഒടുവിൽ ലിങ്ക് റോഡിൽ സർവീസ് തുടരാൻ തീരുമാനം

വടകര: മുന്നറിയിപ്പില്ലാതെ ബസ് സ്റ്റാൻഡ് മാറ്റിയതിൽ പ്രതിഷേധിച്ച് വടകര ലിങ്ക് റോഡ് കേന്ദ്രീകരിച്ച് സർവീസ് നടത്തുന്ന ഒരുവിഭാഗം സ്വകാര്യബസുകൾ ബുധനാഴ്ച മിന്നൽ പണിമുടക്ക് നടത്തി. വടകര-കൊയിലാണ്ടി, പയ്യോളി, പേരാമ്പ്ര, കോട്ടക്കൽ, കൊളാവിപ്പാലം റൂട്ടുകളിലെ ബസുകളാണ് സർവീസ് നിർത്തിവെച്ചത്. മുൻകൂട്ടി അറിയിക്കാതെ പെട്ടെന്ന് പഴയ സ്റ്റാൻഡിലേക്ക് മാറ്റാൻ ട്രാഫിക് പോലീസ് ആവശ്യപ്പെട്ടതാണ് തൊഴിലാളികളുടെയും ഉടമകളുടെയും പ്രതിഷേധത്തിന് ഇടയാക്കിയത്. ഇതിനുമുമ്പ് കളക്ടറുടെ സാന്നിധ്യത്തിൽ ചേർന്ന യോഗത്തിൽ ഓണം വരെ ലിങ്ക് റോഡിൽ തുടരാൻ തീരുമാനിച്ചിരുന്നു. ഈ തീരുമാനം നിലനിൽക്കെ ഔദ്യോഗിക അറിയിപ്പില്ലാതെ സ്റ്റാൻഡ് മാറ്റിയത് ആശയക്കുഴപ്പമുണ്ടാക്കുകയും പണിമുടക്കിൽ കലാശിക്കുകയുമായിരുന്നു.

​മിന്നൽ പണിമുടക്ക് വിദ്യാർഥികൾ ഉൾപ്പെടെയുള്ള യാത്രക്കാരെ കടുത്ത ദുരിതത്തിലാക്കി. വൈകീട്ട് വീടുകളിലേക്ക് മടങ്ങാനെത്തിയ യാത്രക്കാരും വിദ്യാർഥികളും ബസുകളില്ലാതെ സ്റ്റാൻഡുകളിൽ കുടുങ്ങി. തുടർന്ന് വടകര ഡിവൈ.എസ്.പി കെ.കെ. ബിജുവിന്റെ നേതൃത്വത്തിൽ ബസുടമകളും തൊഴിലാളി യൂണിയൻ പ്രതിനിധികളുമായി ചർച്ച നടത്തി. വ്യാഴാഴ്ച മുതൽ ലിങ്ക് റോഡ് കേന്ദ്രീകരിച്ചുതന്നെ സർവീസ് പുനരാരംഭിക്കാൻ യോഗത്തിൽ തീരുമാനമായി. വിഷയം സംബന്ധിച്ച് കൂടുതൽ ചർച്ചകൾക്കായി ഈ മാസം 14-ന് വീണ്ടും യോഗം ചേരും.