ആറുമാസം മുൻപ് നിർമിച്ച കലുങ്കിന്റെ സുരക്ഷാഭിത്തി തകർന്നു

നരിപ്പറ്റ: പയന്തോങ്ങ്-ചീയ്യൂർ-നരിപ്പറ്റ റോഡിലെ കുറത്താമ്പലത്ത് വളവിലുള്ള കലുങ്കിന്റെ ഒരുവശത്തെ സുരക്ഷാഭിത്തി അഴുക്കുചാലിലേക്ക് തെന്നിവീണു. റോഡ് പുനരുദ്ധാരണ പ്രവൃത്തിയുടെ ഭാഗമായി ആറുമാസം മുൻപാണ് ഈ കലുങ്കും രണ്ടുവശത്തെയും സുരക്ഷാഭിത്തിയും നിർമിച്ചത്. കോൺക്രീറ്റ് ചെയ്ത ഭിത്തി അഴുക്കുചാലിൽ വീണതിനെ തുടർന്ന് പ്രദേശത്തെ വെള്ളമൊഴുക്ക് പൂർണമായും തടസ്സപ്പെട്ട നിലയിലാണ്.

​നിർമാണത്തിലെ അശാസ്ത്രീയതയാണ് അപകടത്തിന് കാരണമായതെന്ന ആരോപണം ശക്തമാണ്. റോഡിന്റെയും കലുങ്കിന്റെയും പണി നടക്കുമ്പോൾ മേൽനോട്ടം വഹിക്കേണ്ട ഉദ്യോഗസ്ഥർ സ്ഥലത്തുണ്ടായിരുന്നില്ലെന്ന് നാട്ടുകാർ ആരോപിക്കുന്നു. കൂടാതെ റോഡിന്റെ വശങ്ങളിൽ ആഴത്തിൽ കലുങ്ക് നിർമിക്കാത്തതിനാൽ ആലിയോട്ട് ക്ഷേത്ര പരിസരത്തുൾപ്പെടെ മഴവെള്ളം റോഡിലൂടെ കുത്തിയൊലിക്കുന്നതും വലിയ ദുരിതം സൃഷ്ടിക്കുന്നുണ്ട്.