ചോമ്പാല 'മന്ദാരം ' റസിഡൻസ് അസോസിയേഷന്റെ നേതൃത്വത്തിൽ ഓണാഘോഷ പരിപാടി

ചോമ്പാല: ആധുനിക സാമൂഹിക ജീവിതത്തിൽ അയൽബന്ധങ്ങളുടെ ഉഷ്മളത നിലനിർത്താനും പ്രദേശത്തിന്റെ പൊതുവികസനം സാധ്യമാക്കാനും റസിഡൻസ് അസോസിയേഷനുകളുടെ സാന്നിധ്യം അത്യന്താപേക്ഷിതമായി മാറുകയാണ്. വ്യക്തികേന്ദ്രീകൃതമായി മാറുന്ന പുതിയ കാലത്ത്, പരസ്പര സഹകരണവും സുരക്ഷിതത്വവും ഉറപ്പുവരുത്താൻ ഇത്തരം ജനകീയ കൂട്ടായ്മകൾ വലിയ പങ്കാണ് വഹിക്കുന്നത്.

ഈ സന്ദേശമുയർത്തിപ്പിടിച്ചുകൊണ്ട് ചോമ്പാല മന്ദാരം റസിഡൻസ് അസോസിയേഷന്റെ നേതൃത്വത്തിൽ ഓണാഘോഷ പരിപാടികൾ വിപുലമായി സംഘടിപ്പിച്ചു. പ്രദേശവാസികളുടെ സജീവ പങ്കാളിത്തത്തോടെ വിവിധ കലാ-കായിക മത്സരങ്ങളും സാംസ്‌കാരിക സമ്മേളനവും ഓണാഘോഷത്തിന് മാറ്റുകൂട്ടി.

ചടങ്ങിൽ അസോസിയേഷൻ പ്രസിഡന്റ് രാജൻ കുന്നുമ്മൽ അധ്യക്ഷത വഹിച്ചു. സെക്രട്ടറി ജയപ്രകാശ് ടി. പി സ്വാഗതവും പരിപാടികളുടെ വിശദീകരണവും നടത്തി. മുതിർന്ന പൗരന്മാരും കുട്ടികളും ഉൾപ്പെടെ നിരവധി പേർ ആഘോഷങ്ങളിൽ പങ്കെടുത്തു.

മത്സരങ്ങളിൽ വിജയികളായവർക്കും സാംസ്‌കാരിക പരിപാടികളിൽ പങ്കെടുത്തവർക്കുമുള്ള ഉപഹാരങ്ങളും പരിതോഷികങ്ങളും ചടങ്ങിൽ വിതരണം ചെയ്തു. വിഭവസമൃദ്ധമായ ഓണസദ്യയോടെയാണ് ആഘോഷ പരിപാടികൾ സമാപിച്ചത്.