കല്ലിൽ - കൊടക്കാട്ട് പുഴയോരത്ത് കെ.എം. അഭിജിത്ത് എം.എൽ.എ. സന്ദർശനം നടത്തി: യാത്രാപ്രശ്നത്തിന് ഉടൻ പരിഹാരമാകുമെന്ന് ഉറപ്പ്

പാറക്കടവ്: ചെക്യാട് ഈസ്റ്റ് പുളിയാവ് പതിനൊന്നാം വാർഡിലെ കല്ലിൽ - കൊടക്കാട്ട് പുഴയുടെ ഭാഗത്ത് കെ.എം. അഭിജിത്ത് എം.എൽ.എ. നേരിട്ടെത്തി സന്ദർശനം നടത്തി. കല്ലുമ്മൽ പ്രദേശത്തു നിന്ന് പുളിയാവിലേക്ക് ആളുകൾക്ക് എളുപ്പത്തിൽ എത്തിച്ചേരാൻ കഴിയുന്ന പുതിയൊരു ഗതാഗതമാർഗം എത്രയും വേഗം യാഥാർഥ്യമാക്കുക എന്ന ലക്ഷ്യത്തോടെയായിരുന്നു സന്ദർശനം. വാർഡ് മെമ്പർ നസിയത്ത് റിയാസ് മാമുണ്ടേരിയുടെ നേതൃത്വത്തിലാണ് എം.എൽ.എ. സംഭവസ്ഥലം വിലയിരുത്തിയത്.

​പ്രദേശവാസികളുടെ ഏറെക്കാലത്തെ ആവശ്യമായ ഈ യാത്രാമാർഗം യാഥാർഥ്യമാകുന്നതോടെ പ്രദേശത്തെ ഗതാഗതസൗകര്യം വലിയ രീതിയിൽ മെച്ചപ്പെടും. പ്രത്യേകിച്ച് വിദ്യാർഥികൾക്കും രോഗികൾക്കും പൊതുജനങ്ങൾക്കും ഇത് ഏറെ ആശ്വാസകരമായി മാറും. സ്ഥലത്തെ ഭൂപ്രകൃതിയും സാഹചര്യങ്ങളും നേരിൽ മനസ്സിലാക്കിയ എം.എൽ.എ., പദ്ധതി വേഗത്തിലാക്കാൻ ആവശ്യമായ തുടർനടപടികൾ സ്വീകരിക്കുമെന്ന് അറിയിച്ചു. സന്ദർശനവേളയിൽ ഇബ്രാഹിം കൊടക്കാട്ട്, മുഹമ്മദ് വയലോളി, റിയാസ് മാമുണ്ടേരി, മൊകേരി മൂസ, അഹമ്മദ് കല്ലിൽ, മൂസ കെ.എം., മൊയ്തു കല്ലിൽ എന്നിവരും പങ്കെടുത്തു.