ഓണത്തിന് കുരുക്കഴിയും

വടകര: ദേശീയപാത വികസനത്തിന്റെ ഭാഗമായി വടകര നഗരത്തിലുണ്ടായിരുന്ന കടുത്ത ഗതാഗതക്കുരുക്കിന് പരിഹാരമായി പുതിയ പാത നിലവിൽവന്നു. ഉയരപ്പാതയുടെ അടിവശത്തുകൂടി ചെറുവാഹനങ്ങൾക്ക് കടന്നുപോകാൻ പാകത്തിലാണ് പുതിയ വഴി സജ്ജമാക്കിയത്. പുതിയ ബസ് സ്റ്റാൻഡ് മുതൽ ലിങ്ക് റോഡ് വരെയുള്ള ഭാഗത്താണ് ഉയരപ്പാതയുടെ താഴെ കോൺക്രീറ്റ് ചെയ്ത് പാതയൊരുക്കിയത്.

​നേരത്തെ മണ്ണിട്ടുയർത്താൻ സൂക്ഷിച്ചിരുന്ന വലിയ കോൺക്രീറ്റ് പാനലുകൾ ഇരുവശങ്ങളിലേക്കും മാറ്റി നടുവിലൂടെയാണ് യാത്രാസൗകര്യം ഒരുക്കിയിട്ടുള്ളത്. കാർ, ജീപ്പ്, ഓട്ടോറിക്ഷ, ഇരുചക്രവാഹനങ്ങൾ തുടങ്ങിയ ചെറുവാഹനങ്ങൾ സർവീസ് റോഡിൽനിന്ന് മാറി ഇതുവഴി കടത്തിവിടുന്നതോടെ പ്രധാന സർവീസ് റോഡിലെ തിരക്ക് ഗണ്യമായി കുറഞ്ഞു.

​ഇരുചക്രവാഹനങ്ങൾ ഓവുചാലിനുമുകളിലെ സ്ലാബിലൂടെ കടന്നുപോകുന്നത് കാൽനടയാത്രക്കാർക്ക് സൃഷ്ടിച്ചിരുന്ന പ്രയാസത്തിനും പുതിയ സംവിധാനത്തോടെ പരിഹാരമായിട്ടുണ്ട്. ഓണത്തിരക്ക് വർധിച്ച സാഹചര്യത്തിൽ പുതിയ പാതയും സർവീസ് റോഡിൽ പൂർത്തിയായിവരുന്ന ടാറിങ് പ്രവൃത്തികളും നഗരത്തിലെ ഗതാഗതക്കുരുക്കിന് വലിയ ആശ്വാസമാണ് പകരുന്നത്.