വടകര ബൈപ്പാസിലെ ഉയരപ്പാത നീട്ടൽ: ഗർഡർ നിർമാണവും പൈലിങ്ങും തുടങ്ങി

വടകര: ദേശീയപാത നവീകരണത്തിന്റെ ഭാഗമായി വടകര ബൈപ്പാസിൽ അധികമായി അനുവദിച്ച ഉയരപ്പാതയ്ക്കായുള്ള പൈലിംഗ് നിർമാണ പ്രവൃത്തികൾ ആരംഭിച്ചു. പുതിയസ്റ്റാൻഡ് പരിസരം, പാറേമ്മൽ സ്കൂൾ പരിസരം എന്നിവിടങ്ങളിലാണ് തൂൺ നിർമാണത്തിനായി പൈലിംഗ് ആരംഭിച്ചിട്ടുള്ളത്. നിർമാണക്കരാർ ഏറ്റെടുത്തിരിക്കുന്ന അദാനി എന്റർപ്രൈസസ്, ഉപകരാർ നൽകിയിട്ടുള്ള ഗൾഫാർ എൻജിനിയറിങ് കമ്പനിയുടെ നേതൃത്വത്തിലാണ് പ്രവൃത്തികൾ നടത്തുന്നത്. നാരായണനഗരം ജങ്ഷനിൽ നിലവിൽ നിർമാണം പൂർത്തിയായ ഉയരപ്പാതയുടെ നീളം വർധിപ്പിക്കുന്നതിനൊപ്പം അടയ്ക്കാത്തെരു മേൽപ്പാലത്തെയും ലിങ്ക് റോഡിലെ ഉയരപ്പാതയെയും ബന്ധിപ്പിച്ചാണ് പുതിയ ഭാഗം നിർമിക്കുന്നത്.

​കൈനാട്ടി, ചോറോട്, വടകര ബൈപ്പാസ് എന്നിവിടങ്ങളിലെ ഉയരപ്പാതകൾക്കായി ആകെ 850 പൈലിംഗുകളും 800 ഗർഡറുകളും വേണ്ടിവരും. പൈലിംഗിനൊപ്പം തന്നെ പുതിയസ്റ്റാൻഡ് പരിസരത്ത് ഗർഡറുകളുടെ വാർപ്പുജോലികളും സമാന്തരമായി നടക്കുന്നുണ്ട്. നൂറോളം തൊഴിലാളികളുമായി ആരംഭിച്ച നിർമാണത്തിൽ വൈകാതെ കൂടുതൽ തൊഴിലാളികളെ വിന്യസിക്കും. ഒപ്പം സർവീസ് റോഡുകളിലെ കുഴികൾ അടച്ചു ഗതാഗതയോഗ്യമാക്കുന്ന പ്രവൃത്തികളും, തിരക്ക് കുറയ്ക്കുന്നതിനായി ഉയരപ്പാതയുടെ അടിഭാഗത്തുകൂടി ചെറിയ വാഹന കടത്തിവിടാനുള്ള സൗകര്യമൊരുക്കലും പുരോഗമിക്കുകയാണ്.