മണിയൂരിനുണ്ട്, സ്വന്തം രക്ഷാസേന; വിളിപ്പുറത്ത് ഓടിയെത്തി 'രക്ഷാമിത്ര'

മണിയൂർ: ഗ്രാമപ്പഞ്ചായത്തിന്റെ അഭിമാനമായി മാറിയിരിക്കുകയാണ് 'രക്ഷാമിത്ര' ദുരന്തനിവാരണ സേന. പഞ്ചായത്തിന്റെ സ്വന്തം സന്നദ്ധ രക്ഷാസേനയായ ഇവർ പ്രവർത്തനം തുടങ്ങി ചുരുങ്ങിയ ദിവസങ്ങൾക്കുള്ളിൽ തന്നെ ദുരന്തമുഖങ്ങളിൽ തത്സമയം എത്തി ശ്രദ്ധേയരായിക്കഴിഞ്ഞു.

​ഭൂമിശാസ്ത്രപരമായി ദുർഘടമായ മണിയൂരിൽ എന്തെങ്കിലും അപകടമുണ്ടായാൽ 17 കിലോമീറ്റർ അകലെയുള്ള വടകരയിൽനിന്ന് അഗ്നിരക്ഷാസേന എത്തുമ്പോഴേക്ക് അരമണിക്കൂറിലധികം സമയമെടുക്കും. ഈ കാലതാമസം ഒഴിവാക്കി അടിയന്തര ഘട്ടങ്ങളിൽ വേഗത്തിൽ സഹായമെത്തിക്കാനാണ് ഗ്രാമപ്പഞ്ചായത്ത് രക്ഷാമിത്രയ്ക്ക് രൂപം നൽകിയത്. നീന്തൽ വിദഗ്ധരും സ്നേക്ക് റെസ്ക്യൂ പരിശീലനം ലഭിച്ചവരുമടക്കം മുപ്പതോളം പേരാണ് ഈ സേനയിലുള്ളത്. വിവിധ ഘട്ടങ്ങളിലായി ഒൻപതോളം പരിശീലനങ്ങൾ പൂർത്തിയാക്കിയ ഇവർക്ക് ദേശീയ ദുരന്തനിവാരണ സേനയുടെ (NDRF) പരിശീലനം കൂടി ലഭ്യമാക്കാനുള്ള ശ്രമത്തിലാണ് പഞ്ചായത്ത്.

​കഴിഞ്ഞദിവസം മന്തരത്തൂരിൽ കിണറ്റിൽ വീണയാളെ 10 മിനിറ്റിനകം സ്ഥലത്തെത്തി രക്ഷപ്പെടുത്തിയത് രക്ഷാമിത്രയുടെ കാര്യക്ഷമതയ്ക്ക് തെളിവാണ്. വിവിധയിടങ്ങളിൽ കടന്നൽക്കൂടുകൾ നീക്കം ചെയ്തും, കർക്കടക വാവുബലി തർപ്പണവേളയിൽ മൂഴിക്കൽ ഭഗവതിക്ഷേത്രക്കടവിൽ ഭക്തർക്ക് സുരക്ഷയൊരുക്കിയും ചുരുങ്ങിയ കാലം കൊണ്ട് നാടിന്റെ രക്ഷകരായി മാറാൻ ഈ സന്നദ്ധ സേനയ്ക്ക് സാധിച്ചിട്ടുണ്ട്.