കുട്ടോത്ത്-അട്ടക്കുണ്ട് കടവ് റോഡ് തകർന്നു; റോഡ് പുനരുദ്ധാരണ ടെൻഡർ നടപടികൾ മൂന്നാം ഘട്ടത്തിൽ

വടകര: പ്രമുഖ വിദ്യാഭ്യാസ-സർക്കാർ സ്ഥാപനങ്ങളിലേക്കുള്ള പ്രധാന പാതയായ കുട്ടോത്ത്-അട്ടക്കുണ്ട് കടവ് റോഡ് കടുത്ത ശോച്യാവസ്ഥയിലായതോടെ യാത്രക്കാർ വലയുന്നു. റോഡിൽ വൻ കുഴികൾ രൂപപ്പെടുകയും ഓവുചാലുകൾ അടഞ്ഞ് വെള്ളവും മണ്ണും റോഡിലേക്ക് ഒഴുകിയെത്തുകയും ചെയ്തതോടെ കാൽനടയാത്ര പോലും ദുസ്സഹമായിട്ടുണ്ട്. നടുവയൽ ടൗൺ, പണിക്കോട്ടി, പുതുക്കുടി മുക്ക്, പാലയാട്, കുറുന്തോടി മേഖലകളിൽ സ്ഥിതി രൂക്ഷമാണ്. ദേശീയപാതയിലെ ഗതാഗതക്കുരുക്ക് ഒഴിവാക്കാൻ ധാരാളം യാത്രക്കാർ പയ്യോളി ഭാഗത്തേക്ക് സഞ്ചരിക്കാൻ ഉപയോഗിക്കുന്ന വഴിയാണിത്.

​റോഡ് വീതികൂട്ടുന്നതിനുള്ള സ്ഥലം ഏറ്റെടുപ്പ് നടപടികൾ വൈകുന്ന പശ്ചാത്തലത്തിൽ, താൽക്കാലിക ആശ്വാസമെന്ന നിലയിൽ റോഡ് ഗതാഗതയോഗ്യമാക്കുന്നതിനായി കിഫ്ബി (KIIFB) 4 കോടി രൂപ അനുവദിച്ചിട്ടുണ്ട്. ഇതിന്റെ ഭാഗമായുള്ള ഉപരിതല ടാറിങ് പ്രവൃത്തികളുടെ ടെൻഡർ നടപടികൾ മൂന്നാം തവണ വീണ്ടും ക്ഷണിച്ചു. മുൻപ് വിളിച്ച ടെൻഡറുകൾ ഏറ്റെടുക്കാൻ ആളില്ലാത്തതിനെത്തുടർന്നാണ് വീണ്ടും പ്രക്രിയ തുടരുന്നത്.