മലയോര ഹൈവേയിൽ മണ്ണിടിച്ചിൽ തുടരുന്നു; 27-ാം മൈൽ - തലയാട് ബദൽപ്പാത നവീകരണം വേഗത്തിലാക്കണം

കൂരാച്ചുണ്ട്: കക്കയം തലയാട് മലയോര ഹൈവേയിൽ ആവർത്തിച്ച് മണ്ണിടിച്ചിലുണ്ടായി ഗതാഗതം തടസ്സപ്പെടുന്ന പശ്ചാത്തലത്തിൽ, പനങ്ങാട് കൂരാച്ചുണ്ട് പഞ്ചായത്തുകളെ ബന്ധിപ്പിക്കുന്ന പഴയ 27-ാം മൈൽ -തലയാട് ബദൽ റോഡ് നവീകരിക്കണമെന്ന ആവശ്യം ശക്തമാകുന്നു. എടയൂരിൽ തുടരുന്ന മണ്ണിടിച്ചിൽ ഭീഷണിയെത്തുടർന്ന് അധികൃതർ സ്ഥലം സന്ദർശിച്ച് സ്ഥിതിഗതികൾ വിലയിരുത്തിയിട്ടുണ്ട്.

​കക്കയം ഡാമിന്റെയും ജലവൈദ്യുത പദ്ധതിയുടെയും നിർമാണ സമയത്ത് തലയാടു നിന്ന് വാഹനങ്ങൾ സഞ്ചരിച്ചിരുന്ന ഈ പാത, പുതിയ റോഡ് വന്നതോടെ സംരക്ഷണമില്ലാതെ മൺപാതയായി മാറുകയായിരുന്നു. തലയാട് നിന്ന് ആരംഭിക്കുന്ന 2.5 കിലോമീറ്റർ നീളമുള്ള ഈ ബദൽ റോഡിൻ്റെ 800 മീറ്റർ ഭാഗം കോൺക്രീറ്റ് ചെയ്തിട്ടുണ്ടെങ്കിലും ബാക്കി ഭാഗം ഇപ്പോഴും ഗതാഗതയോഗ്യമല്ല. എട്ടുവർഷം മുൻപ് വൻ മണ്ണിടിച്ചിലുണ്ടായപ്പോൾ അന്നത്തെ കളക്‌ടർ സ്ഥലം സന്ദർശിച്ച് ഫണ്ട് അനുവദിക്കാമെന്ന് സൂചന നൽകിയിരുന്നെങ്കിലും തുടർനടപടികൾ ഉണ്ടായില്ല.

​നിലവിൽ വി.ടി. സൂരജ് എം.എൽ.എയുടെ ഇടപെടലിനെത്തുടർന്ന് സംസ്ഥാന ബജറ്റിൽ ഈ റോഡിനായി രണ്ടു കോടി രൂപ അനുവദിച്ചിട്ടുണ്ട്. മേഖലയിലെ ഇരുപതിലധികം കുടുംബങ്ങൾ ഉപയോഗിക്കുന്ന ഈ റോഡിന്റെ നിർമാണം വേഗത്തിലാക്കിയാൽ കക്കയം, കരിയാത്തുംപാറ ഭാഗങ്ങളിലേക്ക് സുരക്ഷിതമായ ഒരു ബദൽ യാത്രാമാർഗം ഉറപ്പാക്കാൻ സാധിക്കും.