എടച്ചേരി ചുണ്ടയിൽത്താഴെ വയൽഭാഗം വെള്ളത്തിനടിയിൽ: ഗതാഗതം പൂർണമായി തടസ്സപ്പെട്ടു

എടച്ചേരി: എടച്ചേരി - പുറമേരി തുരുത്തി മുക്ക് റോഡിലെ ചുണ്ടയിൽത്താഴെ വയൽ ഭാഗം പൂർണമായും വെള്ളത്തിൽ മുങ്ങി. ശനിയാഴ്‌ച മുതൽ ഇതുവഴിയുള്ള വാഹന ഗതാഗതം പൂർണമായി തടസ്സപ്പെട്ടതോടെ കുട്ടികൾ ഉൾപ്പെടെയുള്ളവരുടെ യാത്ര ദുരിതത്തിലായിരിക്കുകയാണ്.

​റോഡ് ഉയർത്തുന്നതിനായി ഈ വർഷത്തെ ബജറ്റിൽ രണ്ടുകോടി രൂപ വകയിരുത്തിയിട്ടുണ്ടെങ്കിലും അത് ശാശ്വത പരിഹാരമാകില്ലെന്നാണ് ചൂണ്ടിക്കാണിക്കപ്പെടുന്നത്. സമീപത്തുകൂടി ഒഴുകുന്ന ചെറിയ പുഴയിലെ മണ്ണ് നീക്കം ചെയ്താൽ മാത്രമേ വെള്ളപ്പൊക്ക ഭീഷണിക്ക് വലിയ അളവിൽ കുറവുണ്ടാകൂ.

​ഇക്കാര്യത്തിൽ ഉൾനാടൻ ജലഗതാഗതവകുപ്പും പൊതുമരാമത്ത് വകുപ്പും അടിയന്തരമായി ഇടപെടണമെന്ന് ആർ.ജെ.ഡി. ജില്ലാ സെക്രട്ടറി ഇ.കെ. സജിത്ത്കുമാർ ആവശ്യപ്പെട്ടു. റോഡ് ഉയർത്തണമെന്ന് ആവശ്യപ്പെട്ട് മുൻപ് രണ്ടുതവണ പൊതുമരാമത്ത് വകുപ്പ് മന്ത്രിക്ക് നിവേദനം നൽകിയിരുന്ന കാര്യവും അദ്ദേഹം ഓർമ്മിപ്പിച്ചു.