ചാത്തോത്ത് താഴകുനി നടപ്പാത വെള്ളത്തിൽ: ദുരിതത്തിലായി നാട്ടുകാരും സ്കൂൾ കുട്ടികളും

കാർത്തികപ്പള്ളി: ഏറാമല പഞ്ചായത്ത് ഒൻപതാം വാർഡിലെ ചാത്തോത്ത് താഴകുനി നടപ്പാത മഴക്കാലമായതോടെ പൂർണമായും വെള്ളത്തിനടിയിലായി. ചെറിയ മഴ പെയ്യുമ്പോൾ തന്നെ വെള്ളം കയറുന്ന ഈ വഴി, മഴ മാറിയാൽ കടുത്ത ചെളിക്കളമായി മാറുകയാണ്. 140 സെന്റീമീറ്റർ വീതിയും 120 മീറ്റർ നീളവുമുള്ള ഈ നടപ്പാത പ്രദേശവാസികളുടെ പ്രധാന യാത്രാമാർഗമാണ്. പ്രായമായവരും രോഗികളും സ്കൂൾ കുട്ടികളുമടക്കം നിരവധി ആളുകളാണ് നിലവിൽ ഇതുവഴി യാത്ര ചെയ്യാൻ കഴിയാതെ വലിയ പ്രയാസം നേരിടുന്നത്.

​കഴിഞ്ഞ ഭരണസമിതിയുടെ കാലത്ത് തൊഴിലുറപ്പ് പദ്ധതിയിൽ ഉൾപ്പെടുത്തി ഈ നടപ്പാത കോൺക്രീറ്റ് ചെയ്യാൻ പദ്ധതി തയ്യാറാക്കിയിരുന്നു. എന്നാൽ വർഷങ്ങൾ കഴിഞ്ഞിട്ടും ഇത് നടപ്പിലാക്കാൻ അധികൃതർക്ക് കഴിഞ്ഞിട്ടില്ല. പദ്ധതിക്കായി നീക്കിവെച്ച ഫണ്ട് പാഴായിപ്പോയി എന്ന മറുപടിയാണ് നാട്ടുകാർക്ക് ലഭിച്ചത്. നിലവിലെ വാർഡ് മെമ്പർ കൂടിയായ പഞ്ചായത്ത് പ്രസിഡന്റിന് മുന്നിൽ നാട്ടുകാർ ഈ വിഷയം നേരിട്ട് എത്തിച്ചിട്ടുണ്ടെങ്കിലും അടിയന്തര നടപടികളൊന്നും ഇതുവരെ ഉണ്ടായിട്ടില്ല.