കൊയിലാണ്ടി തുവ്വപ്പാറയിൽ ബസ്സും സ്കൂട്ടറും കൂട്ടിയിടിച്ച് അപകടം; രണ്ടുപേർക്ക് പരിക്ക്, ഒരാളുടെ നില ഗുരുതരം

കോഴിക്കോട്: കൊയിലാണ്ടി തുവ്വപ്പാറയിൽ സ്വകാര്യ ബസ്സും സ്കൂട്ടറും കൂട്ടിയിടിച്ച് രണ്ടുപേർക്ക് പരിക്ക്. തുവ്വപ്പാറ അമ്പലത്തിന് സമീപമാണ് അപകടം നടന്നത്. പരിക്കേറ്റവരിൽ ഒരാളുടെ നില അതീവ ഗുരുതരമാണ്. തുവ്വപ്പാറ റൂട്ടിലോടുന്ന 'ഷെയ്ഖ്' (SHAIKHA) എന്ന സ്വകാര്യ ബസ്സും ഹോണ്ട ആക്ടിവ സ്കൂട്ടറുമാണ് അപകടത്തിൽപ്പെട്ടത്. നിയന്ത്രണം വിട്ട ബസ് സ്കൂട്ടറിലേക്ക് ഇടിച്ചുകയറുകയായിരുന്നുവെന്നാണ് പ്രാഥമിക വിവരം. ഇടിയുടെ ആഘാതത്തിൽ സ്കൂട്ടർ പൂർണ്ണമായും ബസ്സിന്റെ മുൻഭാഗത്തിനടിയിലേക്ക് ചെന്ന് തകർന്ന നിലയിലാണ്.

അപകടം നടന്നയുടൻ തന്നെ നാട്ടുകാരും ദൃക്‌സാക്ഷികളും ചേർന്ന് പരിക്കേറ്റവരെ സമീപത്തെ ആശുപത്രിയിൽ എത്തിച്ചു. എന്നാൽ, ഒരാളുടെ പരിക്ക് അതീവ ഗുരുതരമായതിനാൽ പ്രാഥമിക ചികിത്സയ്ക്ക് ശേഷം വിദഗ്ധ പരിചരണത്തിനായി ഇയാളെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.