കുന്ദമംഗലം ടെലിഫോൺ എക്‌സ്‌ചേഞ്ചിന് സമീപം ട്രാൻസ്ഫോർമർ കേബിളിന് തീപിടിച്ചു; വൈദ്യുതി വിതരണം പുനഃസ്ഥാപിച്ചു

കുന്ദമംഗലം: ഇവിടെ ടെലിഫോൺ എക്‌സ്‌ചേഞ്ചിനു സമീപമുള്ള 250 കെ.വി. ട്രാൻസ്ഫോർമറിൻ്റെ എൽ.ടി. ഭാഗത്തെ കേബിളിന് ശനിയാഴ്‌ച രാവിലെ തീപിടിച്ചു. സമീപത്തെ പെട്രോൾ പമ്പിലെ ജീവനക്കാർ ഉടനടി എത്തി തീയണച്ചതിനാൽ വൻ അപകടമാണ് ഒഴിവായത്.

​അപകടത്തെ തുടർന്ന് ഈ പ്രദേശത്ത് ദിവസം മുഴുവൻ വൈദ്യുതി മുടങ്ങുകയുണ്ടായി. കെ.എസ്.ഇ.ബി. അധികൃതർ സ്ഥലത്തെത്തി കേബിൾ മാറ്റിയെങ്കിലും തകരാർ പൂർണമായി പരിഹരിക്കാൻ കഴിഞ്ഞില്ല. തുടർന്ന്, നിലവിലുണ്ടായിരുന്ന ട്രാൻസ്ഫോർമർ പ്രവർത്തനക്ഷമമല്ലാത്തതിനാൽ കോഴിക്കോട് സ്റ്റോറിൽനിന്ന് പുതിയ ട്രാൻസ്ഫോർമർ എത്തിച്ച് സ്ഥാപിച്ച ശേഷമാണ് പ്രദേശത്തെ വൈദ്യുതിവിതരണം പൂർണമായി പുനഃസ്ഥാപിച്ചത്.